1 Tesalonaeka 3:1-13
3 Taem mifala i harem se mifala i no moa save wet, mifala i ting se i moa gud blong go stap long Atens.
2 Mo mifala i sanem brata blong yumi Timoti, we i wan man blong wok blong God* blong talemaot gud nius ya we i tokbaot Kraes. Mifala i sanem hem blong hem i mekem yufala i strong mo blong i mekem yufala i harem gud, blong bilif blong yufala i kam strong.
3 Nao bambae i no gat wan long yufala i save seksek* from ol trabol ya, from we yufala i save se yumi no save ronwe long ol trabol olsem.*
4 Long taem ya we mifala i stap yet wetem yufala, mifala i talemaot se bambae yumi kasem trabol, mo yufala i save we samting ya i hapen.
5 From samting ya, taem mi harem se mi no moa save wet, mi sanem hem i kam long yufala, blong kasem nius se yufala i stap holemstrong long bilif yet, from we sipos Man Ya Blong Traem Man, i traem yufala, be ol wok ya we mifala i mekem bambae oli no blong nating nomo.
6 Be Timoti i aot long yufala, mo i kambak long mifala finis. Mo hem i talemaot gudfala nius ya long mifala se yufala i stap holemstrong long bilif mo yufala i lavem ol man, mo hem i talemaot se yufala i stap tingbaot mifala yet, mo yufala i wantem tumas blong luk mifala, stret olsem we mifala i wantem blong luk yufala.
7 Taswe ol brata, nomata se mifala i sot long sam samting, mo mifala i kasem trabol, be mifala i harem gud from yufala mo from we yufala i stap holemstrong long bilif.
8 Hemia from we mifala i kasem paoa* taem yufala i stap stanap strong long Masta.
9 Mifala i stap talem tangkiu long God from yufala, from we yufala i stap mekem mifala i harem gud tumas long fes blong hem.
10 Long dei mo long naet, mifala i stap krae i go long hem, mo mifala i askem strong long hem blong mifala i save luk yufala bakegen,* mo blong mifala i save givhan long yufala blong bilif blong yufala i save kam strong moa.
11 Mifala i prea se God ya we i Papa blong yumi, wetem Masta blong yumi Jisas, tufala i mekem rod blong bambae mifala i kam luk yufala.
12 Mo mifala i stap prea blong Masta i mekem we yufala i lavlavem yufala moa, yes blong yufala i kam fulap long fasin ya, mo blong yufala i lavem olgeta man stret olsem we mifala i mekem long yufala.
13 Nao long fasin ya, hem i save mekem hat blong yufala i stap strong, mo i save mekem yufala i no gat poen mo yufala i tabu long fes blong God, Papa blong yumi, long taem ya we Masta blong yumi Jisas i stap wetem olgeta tabu man blong hem.
Ol futnot
^ MNT: “wan man we i wok wetem God.”
^ PT: “save gat tu tingting.”
^ NT: “from we ol samting ya oli mas kasem yumi.”
^ PT: “mifala i laef.”
^ PT: “luk fes blong yufala.”
