2 Jon 1:1-13
1 Mi mi wan elda,* mo mi raet i go long woman ya we God i jusumaot hem, mo long ol pikinini blong hem we mi lavem olgeta tumas, mo i no mi nomo be olgeta ya tu we naoia oli save trutok.
2 Mifala i lavem yufala, from we trutok i stap long yumi, mo bambae i stap long yumi gogo i no save finis.
3 God we i Papa long heven mo Pikinini blong hem Jisas Kraes, bambae tufala i givim trutok long yumi mo tufala i lavem yumi. Bambae tufala i kaen tumas long yumi, tufala i sore long yumi mo tufala i givim pis long yumi.
4 Mi mi glad tumas from we mi luk we sam long ol pikinini blong yu oli stap wokbaot long trutok, olsem we Papa blong yumi i talem long yumi blong mekem.
5 Taswe sista, naoia mi mi askem long yu se yumi mas lavlavem yumi. (Mi no stap raetem wan niufala loa i kam long yufala, be hemia wan loa we yumi harem long stat finis.)
6 Mo lav i min se yumi gohed blong wokbaot folem ol loa blong hem. Olsem we yufala i harem finis long stat, loa blong hem i talem se yufala i mas gohed blong soemaot lav.
7 I gat plante man blong giaman we oli go olbaot long wol finis. Olgeta ya oli no stap talemaot se Jisas Kraes i kam man. Man we i mekem olsem, hem i man blong giaman mo hem i agensem Kraes.
8 Be yufala i mas lukaot gud blong yufala i no lusum ol samting ya we mifala i wok had from, nao yufala i save kasem ful pei blong yufala.
9 Man we i no folem tijing blong Kraes, mo hem i tijim wan defren samting, God i no glad long hem. Man we i gohed blong folem tijing blong Kraes, Papa mo Pikinini tufala i glad long hem.
10 Sipos wan man i kam long yufala, be hem i tijim yufala long ol samting we oli no laenap wetem samting we Kraes i tijim, yufala i no mas tekem hem i go insaed long haos blong yufala, mo yufala i no mas talem halo long hem,
11 from we man we i talem halo long man olsem, hem i stap joen long ol rabis wok blong hem.
12 Nating se mi mi gat plante samting blong talem long yufala, mi no wantem raetemdaon long pepa. Be mi mi gat hop blong kam luk yufala mo talem ol tok ya stret long fes blong yufala. Long fasin ya, bambae yumi evriwan i save glad tumas.
13 Ol pikinini blong sista blong yu we God i jusumaot hem, oli talem halo long yu.
Ol futnot
^ NT: “olfala man.”
