Hibrus 1:1-14
1 Bifo, God i toktok plante taem long ol olfala blong yumi, hem i yusum ol profet mo hem i yusum plante narafala rod tu.
2 Naoia long en blong ol dei ya, hem i yusum Pikinini blong hem blong toktok long yumi. God i putumap hem blong hem i kasem evri samting we hem i promes blong givim, mo i yusum hem blong wokem olgeta samting long heven mo long wol.*
3 Hem i mekem bigfala laet blong God i saenaot, mo hem i stret pija blong God, i stap soemaot prapa fasin blong hem. Mo long tok blong hem we i gat paoa, hem i givhan long olgeta samting blong oli stap laef. Taem hem i mekem yumi kam klin long ol sin blong yumi finis, hem i go antap, i sidaon long raet saed blong God Ya We i Hae Olgeta.
4 Nao hem i hae moa long olgeta enjel, stret olsem we nem ya we God i givim long hem i hae moa long nem blong olgeta.
5 Yufala i traem tingbaot. God i neva talem long wan enjel se: “Yu yu pikinini blong mi, mo tede mi mi kam papa blong yu.” Mo i neva talem se: “Bambae mi mi kam papa blong hem, mo hem bambae i kam pikinini blong mi.”
6 Be taem hem i sanem Fasbon blong hem i kam bakegen long wol, hem i talem se: “I gud olgeta enjel blong God oli bodaon* long hem.”
7 Mo hem i tokbaot ol enjel se: “Hem i mekem ol enjel blong hem oli strong olsem win,* mo olgeta we oli wok blong hem* oli olsem faea we i laet.”
8 Be taem hem i tokbaot Pikinini, hem i se: “God i jea blong king blong yu oltaem gogo i no save finis, mo stik* blong Kingdom blong yu hem i stik blong stret fasin.*
9 Yu yu laekem ol fasin we i stret, be ol fasin we i nogud yu agens long olgeta. Nao from samting ya, God ya we i God blong yu, hem i kafsaedem oel long yu blong makemaot yu, mo hem i mekem yu yu glad moa i bitim ol narafala king.”
10 Mo bakegen hem i talem se: “Masta, long stat yu yu putum fandesen blong wol, mo long han blong yu nomo, yu mekem heven.
11 Olgeta bambae oli lus, bambae oli brobrok olsem klos, be yu bambae yu stap oltaem nomo.
12 Bambae yu yu rolem olgeta, olsem we man i rolem kot blong hem, mo bambae yu yu jenisim olgeta samting ya. Be yu, oltaem yu yu stap sem mak nomo, mo neva bambae laef blong yu i finis.”
13 Be God i neva talem long wan enjel se: “Yu sidaon long raet saed blong mi gogo kasem we mi putum ol enemi blong yu olsem wan stul aninit long leg blong yu.”
14 Olgeta enjel ya, oli spirit nomo, we oli stap mekem ol tabu wok.* Hem i stap sanem olgeta blong oli kam givhan long ol man ya we bambae hem i sevem olgeta.
Ol futnot
^ NT: “i yusum hem blong wokem ol defdefren taem we ol samting oli hapen long olgeta.” Yu luk Diksonari.
^ NT: “ona.”
^ NT: “oli strong olsem spirit we oli gat paoa.” Yu luk Diksonari long tok ya, “Spirit.”
^ NT: “olgeta we hem i yusum olgeta blong givhan long narafala.”
^ Hemia wan stik we i minim paoa blong king.
^ NT: “blong Kingdom blong yu i mekem samting i stret.”
^ NT: “wok blong givhan long ol man.”
