Jemes 5:1-20
5 Yufala ol rijman, yufala i lesin long mi. Yufala i mas krae mo yufala i singsingaot bigwan from ol trabol ya we bambae i kasem yufala.
2 Ol gudgudfala samting blong yufala oli roten finis, mo ol kakros* oli kakae ol klos blong yufala finis.
3 Ol gol mo ol silva blong yufala oli rosta finis. Mo rosta ya bambae i olsem wan witnes we i soemaot rong blong yufala, mo bambae i kakae bodi blong yufala. Ol samting we yufala i hivimap, bambae oli olsem faea long ol las dei.
4 Pei we yufala i no givim long ol wokman we oli karemaot kakae long garen blong yufala, hem i gohed blong singaot. Ol man blong pikimap kakae oli singaot i go long Jehova* blong ol ami blong hem i givhan long olgeta, mo hem i harem olgeta.
5 Long wol ya, yufala i gat isi laef, yufala i kasem ol samting blong mekem yufala i harem gud. Yufala i stap kakae, blong yufala i kam fatfat rere from dei ya we bambae oli kilim yufala.
6 Yufala i jajem man we i stret mo yufala i kilim hem i ded. Hemia nao from wanem hem i stap agensem yufala.
7 Ol brata. From samting ya, yufala i mas mekem tingting blong yufala i longfala gogo kasem taem we Masta i stap.* !Yufala i luk! Wan fama i gohed blong wet blong garen i karem ol gudfala kakae. Hem i soemaot se hem i gat longfala tingting blong wet gogo kasem ol faswan ren mo ol laswan ren.
8 Yufala tu i mas soemaot se tingting blong yufala i longfala, mo yufala i mekem hat blong yufala i strong, from we taem ya we Masta i stap,* i klosap finis.
9 Ol brata. Yufala i no mas toktok smosmol agensem* yufala, blong Masta bambae i no jajem yufala. !Yufala i luk! Jaj i stap stanap finis long doa.
10 Ol brata. Ol profet ya bifo we oli stap tok long nem blong Jehova,* oli stap safa long plante samting mo oli soemaot se tingting blong olgeta i longfala, i gud yufala i folem eksampol blong olgeta.
11 !Yufala i luk! Olgeta we oli stap stanap strong, yumi talem se oli glad.* Mo yufala i harem finis stori blong Job we hem i stanap strong mo ol blesing we Jehova* i givim long hem. Mo yufala i luk se Jehova* i lavem man tumas,* mo i gat sore.
12 Ol brata blong mi, antap long ol samting ya, yufala i mas stop blong talem heven no wol no eni narafala samting, blong mekem promes blong yufala i strong. Be ‘Yes’ we yufala i talem i mas minim ‘yes’ nomo, mo ‘No’ we yufala i talem i mas minim ‘no’ nomo, olsem nao, God bambae i no jajem yufala.
13 ?I gat wan long yufala we i kasem trabol? I gud hem i gohed blong prea. ?I gat wan long yufala we i harem gud? I gud hem i singsing long ol sam blong presem God.
14 ?I gat wan long yufala we i sik? I gud hem i singaot ol elda blong kongregesen blong oli kam luk hem, mo i gud oli prea long hem, mo oli putum oel long hem long nem blong Jehova.*
15 Mo prea blong man we i bilif bambae i mekem sikman ya* i gud bakegen, mo Jehova* bambae i mekem hem i strong bakegen. Mo sipos hem i bin mekem sam sin, bambae God i fogivim hem.
16 From samting ya, yufala i mas talemaot ol sin blong yufala long yufala, mo yufala i prea from yufala, blong bambae yufala i kam gud bakegen. Taem we stret man i krae i go long God, prea ya i gat paoa blong givhan.*
17 Elaeja i wan man we i gat filing olsem yumi, be hem i prea, i askem strong long God blong i no ren, ale i no gat ren nating long ples blong hem blong tri yia mo sikis manis.
18 Mo biaen hem i prea bakegen, nao ren i foldaon mo ol garen oli gat kakae.
19 Ol brata blong mi, sipos wan man i kam lidim wan long yufala i gowe long trutok, nao wan narafala i pulum hem i kambak,
20 man we i pulum hem i kambak i sevem laef* blong man ya, mo God bambae i fogivim ol sin blong man ya we i plante we i plante.
Ol futnot
^ Grik: hemia wan kaen bebet we i stap kakae klos.
^ Yu luk Diksonari.
^ Yu luk Diksonari long tok ya, “Taem Jisas i Stap.”
^ Yu luk Diksonari long tok ya, “Taem Jisas i Stap.”
^ NT: “Yufala i no mas komplen long.” PT: “yu no glad nao yu pulum nogud win.”
^ Yu luk Diksonari.
^ NT: “oli kasem blesing.”
^ Yu luk Diksonari.
^ Yu luk Diksonari.
^ NT: “hem i sore long hem from we hem i kasem save long samting we i hapen long hem.”
^ Yu luk Diksonari.
^ MNT: “man we i taed.”
^ Yu luk Diksonari.
^ PT: “prea ya i gat bigfala paoa taem i wok.”
^ NT: “sol.”
