Jon 17:1-26
17 Jisas i talem ol samting ya finis, nao i lukluk i go antap long heven, i talem se: “Papa, taem i kamtru finis. Yu leftemap nem blong pikinini blong yu, nao hem bambae i leftemap nem blong yu.
2 Yu yu givim paoa long hem blong hem i rul long olgeta man, blong hem i save givim laef we i no save finis long olgeta we yu yu givim long hem.
3 Mo laef ya we i no save finis, hemia se man i gohed blong save yu* we yu nomo yu tru God, mo i save Jisas Kraes we yu yu sanem hem i kam.
4 Mi mi leftemap nem blong yu finis long wol ya, mo mi finisim ol wok we yu givim long mi blong mi mekem.
5 Papa. Yu tekem mi mi go stap wetem yu blong mi kasem haenem we mi gat fastaem, taem wol i no stap yet.
6 “Mi mi mekem ol man ya we yu tekemaot olgeta long wol mo yu givim long mi, oli save nem blong yu.* Ol man ya oli blong yu, mo yu givim olgeta long mi, mo olgeta oli folem* tok blong yu.
7 Mo naoia oli save se olgeta samting we yu yu givim long mi, oli kamaot long yu.
8 Oli save from we mi mi talem long olgeta ol tok ya we yu yu talem long mi, mo oli agri long hem. Nao oli save se i tru we mi mi kam long nem blong yu, mo oli bilif se yu yu sanem mi mi kam.
9 Mi mi prea from olgeta. Mi mi no prea from ol man blong wol, be mi prea from olgeta ya we yu yu givim long mi, from we olgeta oli blong yu.
10 Mo olgeta samting we oli blong mi, oli blong yu, mo olgeta samting we oli blong yu, oli blong mi. Mo olgeta oli leftemap nem blong mi.
11 “Mi mi stap kam long yu. Mi no moa stap long wol ya, be olgeta oli stap long wol. Papa, yu yu tabu. Plis yu lukaot gud long olgeta from nem blong yu we yu givim long mi. Olsem nao oli save stap wan* nomo olsem we yumitu wan* nomo.
12 Taem mi stap wetem olgeta, mi stap lukaot gud long olgeta from nem blong yu we yu givim long mi. Mi mi protektem olgeta mo mi no lusum wan long olgeta. Wan nomo i lus, hemia man ya we i blong lus nomo, mo samting ya i kamaot olsem, blong mekem ol tok blong Baebol oli kamtru.
13 Mi mi stap kam long yu, be mi stap talem ol samting ya taem mi stap yet long wol, blong olgeta oli save glad fulwan olsem mi.
14 Mi mi givim tok blong yu long olgeta finis, be ol man blong wol oli no laekem olgeta nating, from we olgeta oli no man blong wol, olsem we mi tu mi no man blong wol.
15 “Mi mi no askem blong yu tekemaot olgeta long wol, be mi askem blong yu protektem olgeta long Man ya we i rabis.*
16 Olgeta oli no man blong wol ya, olsem we mi tu mi no man blong wol ya.
17 Plis yu yusum trutok blong mekem olgeta oli tabu.* Tok blong yu i trutok.
18 Yu yu sanem mi mi kam long wol, mo long sem fasin, mi tu mi sanem olgeta oli go long wol.
19 Mo mi mekem mi mi tabu blong givhan long olgeta, blong trutok i save mekem olgeta tu oli tabu.
20 “Mi mi no prea from olgeta nomo, be mi prea from olgeta ya tu we bambae oli bilif long mi afta we oli harem tijing blong olgeta ya,
21 nao olgeta evriwan oli save kam wan nomo, olsem we yu Papa, yu joen long mi mo mi mi joen long yu. Olsem nao, olgeta oli save joen long yumitu, nao ol man blong wol oli save bilif se yu yu sanem mi mi kam.
22 Haenem we yu givim long mi, mi mi givim long olgeta, blong oli save kam wan nomo olsem we yumitu wan nomo.
23 Mi mi joen long olgeta mo yu yu joen long mi, blong olgeta oli save kam wan* nomo. Long fasin ya, ol man blong wol bambae oli save se yu yu sanem mi mi kam mo yu lavem olgeta olsem we yu lavem mi.
24 Papa, mi wantem se olgeta we yu yu givim long mi, oli stap long ples we mi mi stap long hem, blong oli save luk haenem we yu yu givim long mi. Yu givim haenem ya from we yu lavem mi bifo olgeta, stat long taem we ol man oli stat blong bon long wol.
25 Papa, yu yu stret gud. Ol man blong wol ya oli no save yu, be mi mi save yu, mo olgeta ya tu oli save we yu yu sanem mi mi kam.
26 Mi mi mekem olgeta oli save nem blong yu, mo bambae mi mekem olgeta man oli save nem ya, blong bambae oli lavem ol narafala man olsem we yu yu lavem mi, nao mi mi save joen long olgeta.”
Ol futnot
^ NT: “kasem save long yu.”
^ NT: “mi soemaot nem blong yu long olgeta.”
^ NT: “obei long.”
^ NT: “joen gud.”
^ NT: “joen gud.”
^ Hemia Setan.
^ NT: “jusumaot olgeta blong oli stap defren.”
^ NT: “joen gud fulwan.”
