Jon 8:12-59
8 12 Nao Jisas i toktok long olgeta bakegen i se: “Mi mi laet blong wol. Man we i folem mi, bambae hem i no save wokbaot long tudak, be bambae hem i gat laet ya we i save givim laef.”
13 Nao ol Farisi oli talem long hem se: “Yu nomo yu stap talemaot yu olsem, be yu no gat witnes blong yu.”
14 Jisas i talem long olgeta se: “Nating se mi nomo mi witnes blong mi, be tok blong mi i tru, from we mi mi save weples mi kamaot long hem, mo mi save weples mi stap go long hem. Be yufala i no save ples we mi kamaot long hem, mo ples we mi stap go long hem.
15 Yufala i stap jajem man folem fasin blong man nomo, be mi mi no jajem wan man nating.
16 Be sipos mi jajem man, mi jajem man long stret fasin from we mi mi no stap mi wan nomo, Papa we i sanem mi mi kam, hem i stap wetem mi.
17 Mo tu, oli raetem long Loa blong yufala se: ‘Taem tu witnes i agri long sem samting, tok blong tufala i tru.’
18 Mi mi stap witnes blong mi, mo Papa we i sanem mi mi kam, hem tu i witnes blong mi.”
19 Nao oli askem long hem se: “?Papa blong yu i stap wea?” Jisas i ansa se: “Yufala i no save mi, mo yufala i no save Papa blong mi tu. Sipos yufala i save mi, bambae yufala i save Papa blong mi tu.”
20 Hem i talem ol tok ya taem hem i stap tij long haos tempol, long ples we i gat ol bokis blong presen mane. Be i no gat wan man i holem hem, from we taem blong hem i no kam yet.
21 Nao hem i talem long olgeta bakegen se: “Bambae mi mi gowe long yufala, mo bambae yufala i lukaotem mi, be bambae yufala i ded nomo long sin blong yufala. Ples we bambae mi go long hem, yufala i no save kam long hem.”
22 Nao ol man Jiu oli talem se: “?Bambae hem i kilim hem wan? From we hem i talem se: ‘Ples we bambae mi go long hem, yufala i no save kam long hem.’”
23 Nao hem i talem long olgeta se: “Yufala i kamaot long ples daon, mi mi kamaot long ples antap. Yufala i kamaot long wol ya, be mi mi no blong wol ya.
24 Taswe mi talem long yufala: Bambae yufala i ded we sin blong yufala i stap yet long yufala. Sipos yufala i no bilif se mi ya man ya, bambae yufala i ded nomo long sin blong yufala.”
25 Nao oli talem long hem se: “?Yu yu hu?” Jisas i ansa se: “?From wanem mi stap westem taem blong toktok long yufala?
26 I gat plante samting blong yufala we mi mas tokbaot mo mi mas jajem yet. Be Man we i sanem mi mi kam, tok blong hem i tru. Mo mi mi stap talemaot long ol man long wol, ol samting ya nomo we mi bin harem long hem.”
27 Be oli no kasem save se hem i stap tokbaot Papa blong hem.
28 Jisas i talem se: “Taem yufala i leftemap Pikinini blong man* i hang antap, bambae yufala i save se mi nao mi hem, mo mi mi no mekem wan samting nating long prapa tingting blong mi. Be mi mi stap talemaot ol samting ya nomo we Papa i tijim mi finis long hem.
29 Man we i sanem mi mi kam, hem i stap wetem mi. Hem i no lego mi mi stap mi wan, from we oltaem mi mekem ol samting we hem i glad long hem.”
30 Taem hem i stap talem ol tok ya, plante man oli bilif long hem.
31 Nao Jisas i talem long ol man Jiu we oli bilif long hem se: “Sipos yufala i obei oltaem long ol tok blong mi, yufala i prapa disaepol blong mi.
32 Mo bambae yufala i save trutok, mo trutok bambae i mekem yufala i kam fri.”
33 Be oli talem long hem se: “Mifala i pikinini blong Ebraham, mo neva mifala i slef blong wan man. ?From wanem yu talem se: ‘Bambae yufala i kam fri’?”
34 Jisas i ansa se: “Tru mi talem long yufala, ol man we oli stap mekem sin, oli slef blong sin.
35 Mo tu, wan slef i no save stap olwe long haos blong masta blong hem, be pikinini blong masta yes, hem i save stap olwe.
36 Taswe, sipos Pikinini i mekem yufala i kam fri, bambae yufala i friman tru.
37 Mi mi save se yufala i pikinini blong Ebraham. Be yufala i wantem kilim mi mi ded, from we yufala i no agri long tok blong mi.
38 Mi mi stap tokbaot ol samting we mi luk long Papa blong mi, be yufala i stap mekem ol samting we yufala i harem long papa blong yufala.”
39 Nao oli ansa se: “Papa blong mifala, Ebraham.” Jisas i talem long olgeta se: “Sipos yufala i pikinini blong Ebraham, bambae yufala i mekem wok blong Ebraham.
40 Mi mi stap talemaot trutok nomo we mi harem long God, be yufala i wantem kilim mi. Ebraham i no olsem.
41 Yufala i stap mekem wok blong papa blong yufala.” Be oli talem long hem se: “Mifala i no pikinini blong rod ya, mifala i gat wan Papa nomo, hemia God.”
42 Nao Jisas i talem long olgeta se: “Sipos God i Papa blong yufala, bambae yufala i lavem mi, from we mi mi kamaot long God mo mi stap long ples ya. Mi mi no kam long prapa tingting blong mi nomo, be God nao i sanem mi mi kam.
43 ?From wanem yufala i no kasem save tok we mi stap talem? From we yufala i no wantem lesin long ol tok blong mi.
44 Yufala i kamaot long papa blong yufala Setan,* mo yufala i wantem mekem samting we papa blong yufala i wantem. Stat bifo olgeta, hem i man blong kilim man, mo hem i gowe long trutok from we trutok i no stap long hem. Taem hem i giaman, hem i stap mekem fasin blong hem nomo, from we hem i wan man blong giaman mo hem i papa blong ol giaman toktok.
45 Be mi mi stap talem trutok nomo long yufala, mo from samting ya, yufala i no save bilif long mi.
46 ?I gat wan long yufala i save pruvum se mi mi mekem sin? ?Sipos mi mi talem trutok, from wanem yufala i no bilif long mi?
47 Wan man blong God, hem i lesin long tok blong God. Be yufala i no lesin, from we yufala i no man blong God.”
48 Nao ol man Jiu oli talem long hem se: “Ating i tru se yu yu wan man Sameria mo wan rabis spirit i stap long yu.”
49 Jisas i ansa se: “Rabis spirit i no stap long mi, be mi mi stap ona long Papa blong mi, mo yufala i no respektem mi.
50 Mi mi no stap traem leftemap mi, i gat wan we i wantem mekem samting ya, mo hem nao i jaj.
51 Tru mi talem long yufala, man we i folem ol tok blong mi, bambae hem i neva ded.”
52 Nao ol man Jiu oli talem long hem se: “Naoia mifala i jes save se rabis spirit i stap long yu. Ebraham i ded finis, mo ol profet tu oli ded, be yu yu talem se: ‘Man we i folem ol tok blong mi, bambae hem i neva ded.’
53 ?Yu yu hae moa long papa blong mifala Ebraham? Hem i ded finis, mo ol profet tu oli ded. ?Yu ting se yu yu hu?”
54 Jisas i ansa se: “Sipos mi stap leftemap mi wan, hemia i blong nating nomo. Be Papa blong mi we yufala i stap tokbaot hem se i God blong yufala, hem nao i stap leftemap nem blong mi.
55 Yufala i no save hem. Be mi mi save hem, mo sipos mi talem se mi no save hem, bambae mi sem mak long yufala, mi man blong giaman. Be mi mi save hem, mo mi stap folem ol tok blong hem.
56 Papa blong yufala Ebraham, hem i glad tumas taem hem i tingbaot se bambae hem i luk dei blong mi, mo taem hem i luk, hem i glad tumas.”
57 Nao ol man Jiu oli talem long hem se: “?Yu yu no gat fifti yia yet, be yu talem se yu luk Ebraham finis?”
58 Jisas i talem se: “Tru mi talem long yufala, taem we Ebraham i no bon yet, mi mi stap finis.”
59 Nao oli pikimap ol ston blong stonem hem, be Jisas i haed nao i goaot long haos tempol.
