Mak 15:1-47
15 Long eli moning, olgeta memba blong Sanhedrin,* hemia ol jif pris mo ol elda mo ol tija blong Loa, oli holem wan miting mo oli fasem Jisas, nao oli tekem hem i go long Paelat.
2 Nao Paelat i askem long hem se: “?Yu yu King blong ol man Jiu?” Hem i ansa se: “I olsem we yu yu talem.”
3 Be ol jif pris oli stap talemaot plante poen agens long hem.
4 Nao Paelat i askem long hem bakegen se: “?Yu no save ansa long olgeta? Yu luk, oli talemaot plante poen agens long yu.”
5 Be Jisas i no moa ansa, nao Paelat i sapraes tumas.
6 Nao evri yia, long lafet blong Pasova, hem i stap letem wan presina we ol man oli jusum, i go fri.
7 Long taem ya, sam man oli stap long kalabus from we oli bin kilim sam man i ded long taem we oli agens long gavman. Wan long olgeta ya, nem blong hem Barabas.
8 Nao ol hip man oli kam, mo oli stat blong askem samting we oli wantem long Paelat, olsem we oli stap mekem evri yia.
9 Nao hem i talem long olgeta se: “?Yufala i wantem se mi letem King ya blong ol man Jiu i go fri?”
10 Paelat i save finis we ol jif pris oli putum Jisas long han blong hem from jalus nomo.
11 Be ol jif pris oli toktok long ol hip man gogo oli pulum olgeta blong oli askem se hem i letem Barabas i go fri, be i no Jisas.
12 Nao Paelat i talem long olgeta bakegen se: “?Be bambae mi mekem wanem long man ya we yufala i singaot hem se King blong ol man Jiu?”
13 Nao oli singaot bakegen se: “!Nilim hem long pos!”
14 Be Paelat i gohed, i se: “?From wanem? ?Hem i mekem wanem nogud samting?” Be olgeta oli gohed blong singaot bigwan moa se: “!Nilim hem long pos!”
15 Nao Paelat i letem Barabas i go fri, from we hem i wantem mekem ol hip man ya oli glad. Ale hem i givim oda, nao oli wipim Jisas, mo biaen hem i talem long ol soldia blong oli go nilim hem i ded long pos.
16 Ol soldia oli tekem hem i go insaed long yad, hemia yad blong haos blong hed gavman, mo oli singaot ful kampani blong ol soldia oli kam wanples.
17 Nao oli putum wan kaliko long hem we i pepol, mo oli wivim rop we i gat nil i kam olsem hat blong king, nao oli putum long hed blong hem,
18 nao oli stap singaot i go long hem, se: “!Halo,* King blong ol man Jiu!”
19 Mo tu, oli stap kilim hed blong hem long wan stik mo oli spet long hem, mo oli stap nildaon* long fes blong hem.
20 Taem oli jikim hem finis, oli tekemaot pepol kaliko ya long hem, mo oli mekem hem i werem klos blong hem bakegen. Nao oli tekem hem i go blong nilim hem long pos.
21 Mo tu, oli luk wan man Saerin, nem blong hem Saemon, hem i stap wokbaot i kam insaed long taon. Hem i papa blong Aleksanda mo Rufas. Ale oli fosem hem blong i karem pos* blong Jisas.
22 Nao oli tekem hem i go long ples ya we nem blong hem Golgota, we i min se “Bun Blong Hed Blong Man.”
23 Long ples ya, oli traem givim waen we oli miksim wetem drag ya mir, be hem i no wantem dring.
24 Nao oli nilim hem long pos, mo oli seraot ol klos blong hem, mo oli sakem spesel ston blong faenemaot se hu bambae i tekem weswan klos.
25 Nao samwe long naen klok long moning,* oli nilim hem long pos.
26 Mo tu, oli raetem tok ya: “King blong ol man Jiu,” blong soemaot from wanem oli jajem hem se i mas ded.
27 Mo oli nilim tu stilman klosap long hem, wan long raet saed blong hem mo wan long lef saed.
28 *—
29 Mo ol man we oli stap pas long rod oli tok nogud long hem, mo oli stap saksakem hed blong olgeta, oli talem se: “!Hemia nao! Yu we bambae yu brekemdaon haos tempol mo yu stanemap bakegen long tri dei,
30 yu traem sevem yu wan. Yu aot long pos* ya, yu kamdaon.”
31 Long sem fasin, ol jif pris mo ol tija blong Loa oli stap jikim hem, oli stap taltalem long olgeta, se: “!Hem i save sevem ol narafala, be hem i no save sevem hem wan!
32 I gud Kraes ya we i King blong Isrel, hem i kamdaon long pos* ya naoia, nao bambae yumi luk mo yumi bilif long hem.” Mo tufala we i stap hang klosap long hem, tufala tu i stap tok strong long hem.
33 Long medel dei,* tudak i kavremap olgeta ples, mo i stap gogo kasem tri klok olsem long aftenun.*
34 Klosap tri klok long aftenun, Jisas i singaot bigwan se: “?Eli, Eli, lama sabaktani?” we i min se “God blong mi, God blong mi, ?from wanem yu lego mi?”
35 Nao sam man we oli stap stanap klosap, oli harem tok ya, nao oli talem se: “Yufala i harem. Hem i stap singaot Elaeja ya.”
36 Nao wan man i resis i go, i draonem wan koten long waen we i konkon, mo i putum long wan longfala stik, mo i pusum i go long hem blong hem i dring, mo i talem se: “!Yufala i wet! Yumi traem luk se Elaeja bambae i kam tekemaot hem no nogat.”
37 Be Jisas i singaot bigwan bakegen, nao win blong hem i finis.*
38 Mo bigfala kaliko we i blokem rum ya we i tabu we i tabu, i brok long tu haf, i stat antap i go kasem daon.
39 Be taem kapten blong ol soldia we i stap stanap stret long fes blong hem, i luk we hem i ded mo i luk olgeta samting ya oli hapen, hem i talem se: “Tru ya, man ya hem i Pikinini blong God.”
40 Mo i gat plante woman we oli stap stanap longwe lelebet, oli stap lukluk. Long olgeta ya, i gat Meri ya we i woman Magdala, mo Meri ya we i mama blong Jemes* mo Joses, mo i gat Salome.
41 Olgeta ya oli stap folem Jisas mo oli stap givhan long hem taem hem i stap long Galili. Mo i gat plante narafala woman we oli folem hem i kam long Jerusalem.
42 Long dei ya, hem i Dei Blong Mekemrere Ol Samting, from we tumora i Sabat dei. Nao let long aftenun,
43 Josef blong Aramatia i kam. Hem i wan memba blong Kaonsel mo ol man oli savegud hem. Mo hem tu i stap wet long Kingdom blong God. Hem i mekem tingting blong hem i strong, nao i go stret long fes blong Paelat, i askem bodi blong Jisas.
44 Be Paelat i no save sipos Jisas i ded finis no no yet, nao hem i singaot kapten blong ol soldia i kam, mo i askem long hem.
45 Taem hem i save se hem i ded finis, hem i letem bodi blong hem i go long Josef.
46 Ale Josef i go pem gudfala kaliko ya linen, mo i go tekemaot bodi blong Jisas i kam daon, nao i kavremap long gudfala kaliko ya, mo i go putum long wan hol we oli jes katem long ston. Biaen hem i rolem wan bigfala ston i go long maot blong hol ya.
47 Be Meri we i woman Magdala mo Meri we i mama blong Joses, tufala i stap yet long ples ya, tufala i lukluk ples we oli putum bodi blong Jisas long hem.
Ol futnot
^ Yu luk Diksonari.
^ NT: “mifala i ona long yu.”
^ NT: “oli ona long hem.”
^ Yu luk Diksonari.
^ PT: “namba tri aoa.”
^ Vas ya i no stap long sam olfala hanraet, mo i klia se hem i no kamaot long God.
^ Yu luk Diksonari.
^ Yu luk Diksonari.
^ PT: “long namba sikis aoa.”
^ PT: “long namba naen aoa.”
^ NT: “hem i pulum las win blong hem.”
^ NT: “Yang Jemes.” Toktok ya “Yang” i save minim se Jemes i yangfala moa no i sotfala moa long narafala aposol ya Jemes, we i pikinini blong Sebedi.
