Mak 3:1-35
3 Hem i go bakegen insaed long wan sinagog, mo long ples ya, i gat wan man we han blong hem i ded.
2 Nao ol Farisi oli stap wajem gud hem, blong luk se bambae hem i mekem man ya i kam gud bakegen long Sabat dei no nogat. Hemia from we oli wantem faenem sam poen long hem.
3 Nao hem i talem long man ya we han blong hem i ded se: “Yu kam stanap long medel ya.”
4 Afta hem i askem long olgeta se: “?Folem Loa, i stret blong man i mekem i gud, no i mekem i nogud long narafala long Sabat dei? ?I stret blong sevem laef* blong narafala, no blong kilim narafala i ded?” Be oli no talem wan samting.
5 Hem i kros, nao i luklukraon long olgeta mo hem i harem nogud tu from we hat blong olgeta i strong tumas. Nao hem i talem long man ya se: “Yu stretem han blong yu.” Ale man ya i stretem han blong hem, mo han ya i kam gud bakegen.
6 Ale ol Farisi oli go afsaed mo kwiktaem nomo oli go joen wetem ol sapota blong King Herod, nao oli mekem miting agens long Jisas blong kilim hem i ded.
7 Be hem wetem ol disaepol blong hem oli godaon long bigfala lugun, mo bigfala hip blong ol man long Galili mo long ol ples long Judia oli folem hem.
8 Mo bigfala hip blong ol man oli harem nius blong ol samting we hem i stap mekem, nao oli kam long hem. Ol man ya oli kamaot long Jerusalem, mo long Idumia, mo long narasaed Jodan Reva, mo long ol ples raonabaot long Taea mo Saedon.
9 Nao hem i talem long ol disaepol blong hem blong oli putumrere wan bot i stap blong hem, blong ol hip man ya oli no puspusum hem tumas.
10 Hemia from we hem i mekem plante sikman oli kam gud bakegen, nao olgeta we oli kasem ol bigfala sik, oli stap puspusum olgeta blong kam tajem hem.
11 Mo ol rabis spirit tu, taem oli luk hem, oli foldaon long fored blong hem, mo oli stap singaot bigwan se: “Yu yu Pikinini blong God.”
12 Be plante taem, hem i talem strong long olgeta se oli no mas talemaot hem long ol man.
13 Hem i go antap long wan bigfala hil mo i singaot olgeta we hem i jusum, nao oli kam long hem.
14 Nao hem i statem* wan grup we i gat twelef man long hem, mo i putum nem blong olgeta ya se ol aposol. Olgeta ya bambae oli stap folem hem, mo bambae hem i sanem olgeta oli go prij,
15 mo bambae oli gat paoa blong ronemaot ol rabis spirit.
16 Mo long grup ya we i gat twelef man insaed, i gat Saemon ya we hem i givim narafala nem blong hem se Pita,
17 Jemes mo brata blong hem Jon, we tufala i pikinini blong Sebedi (hem i givim nem ya Boanejes long tufala, we i min se “Tufala Pikinini Blong Tanda”),
18 mo Andru, mo Filip, mo Batolomiu, mo Matiu, mo Tomas, mo Jemes we i pikinini blong Alfeas, mo Tadeas, mo Saemon we i gat strong tingting blong mekem samting,*
19 mo Judas Iskariot we biaen i letem Jisas i go long han blong ol enemi blong hem.
Nao hem i go long wan haos,
20 mo bakegen, plante plante man oli stap kam hivap, mekem se i no gat taem tu blong kakae.
21 Taem ol famle blong hem oli harem nius blong samting ya, oli kam blong holem hem, from we oli stap talem se: “Hed blong hem i krangke ya.”
22 Mo ol tija blong Loa tu we oli aot long Jerusalem oli kam long ples ya, oli stap talem se: “Bielsebal* i stap long hem, mo hem i stap ronemaot ol rabis spirit long paoa blong jif ya blong ol rabis spirit.”
23 Afta we hem i singaot olgeta oli kam long hem, hem i toktok long olgeta long parabol, i se: “?Olsem wanem Setan i save ronemaot Setan?
24 Sipos ol man blong wan gavman oli seraot nao oli stap agensem olgeta bakegen, bambae gavman ya i mas foldaon.
25 Mo sipos ol man long wan haos oli seraot nao oli stap agensem olgeta bakegen, bambae haos ya i foldaon.
26 Mo tu, sipos Setan i agensem hem wan bakegen, nao ol man blong hem oli seraot, bambae hem i no save stanap, hem i mas foldaon.
27 Man we i wantem go insaed long haos blong wan strong man blong stilim olting blong hem, fastaem hem i mas fasem strong man ya. Biaen nomo, hem i save go tekemaot olting blong hem.
28 Tru mi talem long yufala, God bambae i fogivim olgeta sin we ol man oli mekem, mo evri tok nogud we oli talem.
29 Be man we i tok nogud agens long tabu spirit, God bambae i no fogivim hem samtaem, sin ya bambae i stap olwe.”
30 Hem i talem olsem, from we olgeta oli stap talem se: “Wan rabis spirit i stap long hem.”
31 Nao mama blong hem mo ol brata blong hem, oli kam stanap afsaed, mo oli sanem wan man i go blong singaot hem.
32 I gat plante man oli stap sidaon raon long hem, nao oli talem long hem se: “!Yu luk! Mama blong yu mo ol brata blong yu oli stap afsaed, oli stap askem yu.”
33 Be hem i ansa long olgeta se: “?Hu i mama blong mi, mo hu ya ol brata blong mi?”
34 Nao hem i lukluk olgeta we oli stap sidaon raon long hem, mo i talem se: “!Yufala i luk! !Hemia mama blong mi mo ol brata blong mi!
35 Man we i mekem samting we God i wantem, hem nao i brata mo sista mo mama blong mi.”
Ol futnot
^ NT: “sol.”
^ NT: “putumap.”
^ NT: “Saemon we i blong Kenan.”
^ Hemia wan nem blong Setan. Yu luk Diksonari.
