Ol Wok 14:1-28
14 Long Ikoniam, tufala i go insaed long sinagog blong ol man Jiu, mo tufala i prij we tok blong tufala i gud tumas, nao wan bigfala hip blong ol man Jiu mo ol man Gris oli kam man blong bilif.
2 Be ol man Jiu we oli no bilif, oli goraon long ol man* blong ol narafala neson, oli pulum olgeta blong oli tingting nogud long ol brata mo agensem olgeta.
3 Be tufala i stap longtaem lelebet long ples ya, mo Jehova* i givim paoa long tufala blong tufala i no fraet blong toktok. Hem i yusum tufala blong mekem ol saen mo ol samting blong sapraes, blong soemaot se tok blong tufala i tru, taem tufala i talem se hem i kaen tumas.
4 Nao ol hip man long taon ya oli seraot, samfala oli sapotem ol man Jiu mo sam narafala oli sapotem tufala aposol.
5 Nao ol man blong ol narafala neson mo ol man Jiu wetem ol lida blong olgeta, oli traem blong mekem i nogud long tufala mo stonem tufala,
6 be taem tufala i harem plan blong olgeta, tufala i ronwe i go long ples ya Likaonia, long tufala taon ya Listra mo Debe mo long ol ples raonabaot.
7 Nao tufala i stap talemaot gud nius long ol ples ya.
8 Long Listra, i gat wan man we i sidaon i stap. Taem hem i bon, tufala leg blong hem oli nogud finis, mo hem i neva wokbaot.
9 Hem i stap lesin long Pol taem hem i stap toktok. Nao Pol i stap lukluk hem mo i luk se man ya i bilif se hem i save kam gud.
10 Nao hem i talem long strong voes se: “Yu stanap long leg blong yu.” Nao man ya i stanap wantaem mo i stat wokbaot.
11 Taem ol man oli luk samting we Pol i mekem, oli singaot bigwan long lanwis blong Likaonia, oli talem se: “!Ol god oli jenis oli kam man, mo oli kamdaon long yumi!”
12 Nao oli stat blong singaot Banabas se Sus, be oli singaot Pol se Heremes from we hem nao i stap toktok.
13 Haos tempol blong god ya Sus i stap klosap long get blong taon ya. Ale pris blong god ya i tekem sam bul mo sam flaoa we oli wivim i raon blong flasem hed, nao i go long get blong taon. Hem wetem ol man long ples ya oli wantem mekem sakrefaes i go long Pol mo Banabas.
14 Be taem tufala aposol ya tufala i harem samting ya, tufala i terem klos blong tufala, mo tufala i resis i go long medel blong ol hip man ya, tufala i singaot bigwan se:
15 “!Olgeta! ?From wanem yufala i stap mekem samting ya? Mitufala i man nomo olsem yufala. Mo mitufala i stap talemaot gud nius long yufala, blong yufala i lego ol samting ya we oli blong nating nomo, mo yufala i kam man blong God ya we i mekem heven mo wol mo solwota, mo olgeta samting we oli stap long olgeta.
16 Bifo, hem i letem ol man long olgeta neson oli folem prapa rod blong olgeta.
17 Be oltaem hem i stap mekem ol gudfala wok blong soemaot ol fasin blong hem. Hem i givim ren long yufala mo i mekem ol frut oli givim kakae long stret taem blong olgeta, mo hem i stap givim kakae long yufala mo i stap mekem yufala i glad.”
18 Nating se tufala i talem ol samting ya, be klosap tufala i no naf blong blokem olgeta blong mekem sakrefaes i go long tufala.
19 Be sam man Jiu we oli aot long Antiok mo Ikoniam, oli kam toktok blong pulum ol man ya, nao oli stonem Pol mo oli pulum hem i go afsaed long taon, mo oli livim hem i stap from we oli ting se hem i ded finis.
20 Be taem ol disaepol oli kam stanap raon long hem, hem i girap, i go insaed long taon bakegen. Nao long nekis dei, hem mo Banabas i go long Debe.
21 Afta we tufala i talemaot gud nius long taon ya mo tufala i pulum plante man lelebet oli kam disaepol, tufala i gobak long Listra, mo long Ikoniam, mo long Antiok.
22 Long ples ya, tufala i mekem ol disaepol oli kam strong mo tufala i pulum olgeta blong oli bilif oltaem. Tufala i stap talem se: “Yumi mas gotru long plante trabol, blong yumi save go insaed long Kingdom blong God.”
23 Mo tufala i putumap ol elda long ol kongregesen wanwan, blong oli givhan long ol disaepol. Mo tufala i prea mo livim kakae, mo tufala i putum olgeta ya long han blong Jehova,* from we oli bilif finis long hem.
24 Nao tufala i pastru long Pisidia mo tufala i kam long Pamfilia,
25 mo afta we tufala i talemaot tok blong God long Pega, tufala i go long Atalia.
26 Nao tufala i aot long ples ya, tufala i tekem sip i gobak long Antiok. Hemia ples we fastaem ol brata oli askem long God blong i kaen long tufala from wok ya we naoia tufala i finisim finis.
27 Taem tufala i kasem ples ya, mo tufala i singaot ol man long kongregesen oli kam wanples, tufala i tokbaot olgeta samting we God i bin yusum tufala blong mekem, mo se hem i openem doa long ol man blong ol neson, blong oli bilif.
28 Nao long ples ya, tufala i stap longtaem lelebet wetem ol disaepol.
