Ol Wok 16:1-40
16 Nao hem i kamtru long Debe mo Listra. Long ples ya, i gat wan disaepol we nem blong hem Timoti. Mama blong hem i wan woman Jiu we hem tu i bilif, be papa blong hem i wan man Gris.
2 Ol brata long Listra mo Ikoniam, oli stap talem se Timoti i wan gudfala man.
3 Nao Pol i wantem se hem i folem hem, ale hem i mekem sakomsaes long hem from we olgeta man Jiu long ol ples ya oli save se papa blong hem i wan man Gris.
4 Nao taem oli stap gotru long ol taon, oli stap talemaot long ol brata, ol loa ya we ol aposol mo ol elda long Jerusalem oli bin putum blong oli folem.
5 Nao bilif blong ol kongregesen i stap kam strong moa, mo evri dei namba blong olgeta i stap kam antap moa.
6 Nao oli gotru long ol ples ya Frijia mo Galesia, from we tabu spirit i blokem olgeta blong oli no talemaot tok blong God long provins ya Esia.
7 Mo taem oli godaon long Misia, oli traehad blong go long Bitinia, be spirit blong Jisas i no letem olgeta.
8 Nao oli pastru long Misia mo oli kamdaon long Troas.
9 Long naet, Pol i luk wan vison. Hem i luk wan man Masedonia i stap stanap, i stap askem long hem se: “Plis yu kamkros long Masedonia, yu givhan long mifala.”
10 Taem hem i luk vison ya, wantaem nomo mifala i lukaot rod blong go long Masedonia, from we mifala i kasem save se God i singaot mifala blong go talemaot gud nius long olgeta.
11 Nao mifala i tekem sip long Troas mo mifala i go stret long Samotres, mo long nekis dei mifala i go long Neapolis.
12 Nao mifala i aot long ples ya, mifala i go long Filipae, wan taon we Rom i rul long hem, mo hem i impoten taon blong distrik blong Masedonia. Mifala i stap sam dei long taon ya.
13 Long Sabat dei, mifala i goaot long get blong taon, mo mifala i godaon long saed blong wan reva from we mifala i ting se ples ya i wan ples blong prea, nao mifala i sidaon mo mifala i stat blong prij long ol woman we oli stap finis long ples ya.
14 Nao long ples ya, i gat wan woman i stap lesin long mifala, nem blong hem Lidia. Hem i blong taon ya Tuatira, hem i stap salem ol kaliko we oli pepol mo hem i wan woman we i stap wosipim God. Nao Jehova* i openem hat blong hem blong hem i akseptem ol samting we Pol i stap talem.
15 Nao hem wetem olgeta we oli stap long haos blong hem oli baptaes. Ale hem i talem long mifala se: “Sipos yufala i ting se mi mi rili bilif long Jehova,* plis yufala i kam stap long haos blong mi.” Hem i strong long mifala, nao mifala i go long haos blong hem.
16 Nao taem mifala i stap go long ples blong prea, wan slef gel i mitim mifala. Gel ya, wan rabis spirit i stap long hem, i stap soemaot long hem ol samting we bambae oli kamtru long fiuja. Samting ya i mekem se Gel ya i stap winim plante mane blong ol masta blong hem.
17 Gel ya i stap wokbaot biaen long mifala mo Pol, i stap singaot bigwan i se: “Ol man ya oli slef blong Hae God, mo oli stap talemaot long yufala rod blong God i sevem yufala.”
18 Hem i stap mekem olsem blong plante dei. Nao Pol i taed long hem, mo i tanraon, i talem long spirit ya se: “Long nem blong Jisas Kraes, mi talem long yu, yu kamaot long gel ya.” Nao stret long taem ya, rabis spirit ya i kamaot.
19 Taem ol masta blong hem oli luk se oli lusum rod blong olgeta blong winim mane, oli holemtaet Pol mo Saelas, mo oli pulum tufala i go long ol lida long ples blong maket.
20 Nao oli mekem tufala i stanap long fes blong ol lida blong taon ya, mo oli talem se: “Tufala ya, tufala i stap mekem tumas trabol long taon blong yumi. Tufala i man Jiu,
21 mo tufala i stap tijim wan kastom we yumi ol sitisen blong Rom, yumi no save folem from we i agensem Loa blong yumi.”
22 Nao olgeta man long ples ya oli agensem tufala, mo ol lida blong taon ya oli terem klos blong tufala, mo oli givim oda blong oli wipim tufala long wud.
23 Ale oli wipim tufala plante taem, nao oli putum tufala long kalabus mo oli talem long man we i gad long kalabus se hem i mas gad gud long tufala ya.
24 Taem man ya i harem tok ya, hem i tekem tufala i go insaed long wan rum we i insaed olgeta, nao hem i lokem leg blong tufala long wan wud we i olsem wan bigfala hankaf.
25 Be long medel naet, Pol mo Saelas tufala i stap prea mo tufala i stap singsing blong presem God, mo ol narafala presina oli stap lesin long tufala.
26 Nao wantaem nomo graon i seksek bigwan, i seksekem fandesen blong kalabus ya. Mo wantaem nomo olgeta doa oli open, mo ol jen we oli fasem ol man, oli kamkamaot.
27 Taem gad ya i wekap mo i luk we ol doa blong kalabus oli open, hem i ting se ol presina oli ronwe finis. Nao hem i tekem naef blong faet blong hem, mo i wantem kilim hem i ded.
28 Be Pol i singaot bigwan i talem se: “!Yu no kilim yu wan, mifala evriwan i stap ya!”
29 Ale hem i askem blong oli karem laet i kam, nao hem i resis i go insaed, i foldaon klosap long leg blong Pol mo Saelas, we hem i seksek tumas.
30 Nao hem i tekem tufala i go afsaed mo i askem long tufala se: “?Mi mas mekem wanem blong God i sevem mi?”
31 Tufala i talem long hem se: “Yu mas bilif long Masta Jisas nao bambae God i sevem yu mo olgeta we oli stap long haos blong yu.”
32 Nao tufala i talemaot tok blong Jehova* long hem mo long olgeta evriwan we oli stap long haos blong hem.
33 Ale long naet ya nomo hem i tekem tufala, i wasem ol trak blong wip long bodi blong tufala. Mo biaen, hem wetem olgeta evriwan we oli stap long haos blong hem oli baptaes.
34 Nao hem i tekem tufala i go long haos blong hem, i putum kakae long tebol nao tufala i kakae. Mo naoia we hem i bilif long God, hem wetem olgeta evriwan we oli stap long haos blong hem, oli glad tumas.
35 Taem i delaet, ol lida blong taon ya oli sanem ol bodigad blong olgeta oli go long kalabus blong talem se: “Yufala i letem tufala man ya i go fri.”
36 Nao man we i gad long kalabus i talem tok blong olgeta long Pol, i se: “Ol lida blong taon oli sanem sam man oli kam blong mekem yutufala i go fri. Yutufala i aot, yutufala i no moa wari.”
37 Be Pol i talem long olgeta se: “Olgeta ya oli no jajem mitufala yet be oli wipim mitufala long fes blong ol man, nating se mitufala i sitisen blong Rom, mo oli sakem mitufala long kalabus. ?Be naoia oli wantem kikimaot mitufala long fasin haed? !Nogat! Olgeta nomo oli mas kam tekem mitufala i goaot.”
38 Ol bodigad ya oli go talemaot ol toktok ya long ol lida blong taon. Nao olgeta oli fraet tumas taem oli harem se tufala ya i sitisen blong Rom.
39 Nao oli kam talem sore long tufala, mo oli tekem tufala i go afsaed mo oli talem long tufala blong tufala i aot long taon ya.
40 Be taem tufala i aot long kalabus, tufala i go long haos blong Lidia. Nao taem tufala i luk ol brata, tufala i leftemap tingting blong olgeta, mo biaen tufala i aot.
