Ol Wok 22:1-30
22 “Ol brata mo ol papa, yufala i lesin. Bambae mi eksplenem samting we i hapen.”
2 Nao taem olgeta oli harem we hem i toktok long olgeta long lanwis Hibru, oli kam kwaet moa. Nao hem i talem se:
3 “Mi mi man Jiu, mi bon long Tasas long Silisia, mo Gamaliel i tijim mi long taon ya. Hem i tijim mi blong mi folem gud Loa ya blong ol olfala blong yumi. Mo long taem ya, mi strong blong mekem wok blong God, stret olsem yufala tede.
4 Mi stap ronem olgeta we oli folem Rod blong bilif blong kilim olgeta oli ded, mo mi holem ol man mo ol woman, mi putum olgeta long kalabus.
5 Hae pris mo olgeta elda oli witnes long samting ya, mo olgeta nao oli givim ol leta blong mi mi karem i go long ol brata blong yumi, ol man Jiu long Damaskes. Mo mi go long ples ya blong holem mo fasem ol man ya, blong tekem olgeta oli kam long Jerusalem blong oli kasem panis.
6 “Taem mi stap go klosap long Damaskes, samwe long medel dei, wan bigfala laet long skae i saen wantaem, i kam kasem mi mo ol ples raonabaot,
7 nao mi foldaon long graon, mo mi harem wan voes i talem se: ‘Sol, Sol. ?From wanem yu stap mekem i nogud long mi?’
8 Nao mi askem se: ‘?Masta, yu yu hu?’ Hem i talem se: ‘Mi mi Jisas, man Nasaret ya we yu yu stap mekem i nogud long mi.’
9 Ol man we oli stap wetem mi, oli luk laet ya be oli no harem voes blong man ya.
10 Nao mi askem se: ‘?Masta, bambae mi mekem wanem?’ Nao Masta i talem long mi se: ‘Yu girap mo yu go long Damaskes. Long ples ya, bambae oli talem long yu olgeta samting we oli makemaot finis blong yu mekem.’
11 Bigfala laet ya i saen we i saen, i mekem se mi no save luk wan samting. Nao olgeta we oli stap wetem mi, oli holem han blong mi, oli lidim mi mi go long Damaskes.
12 “Nao i gat wan man long ples ya, nem blong hem Ananaeas. Hem i wan man blong God we i folem Loa, mo ol man Jiu long ples ya oli stap talem se hem i wan gudfala man.
13 Hem i kam luk mi, i stanap klosap long mi, mo i talem se: ‘Brata Sol. !Yu lukluk bakegen!’ Stret long taem ya, mi lukluk i go antap nao mi luk hem.
14 Nao hem i talem se: ‘God blong ol olfala blong yumi i jusumaot yu blong bambae yu save ol samting we hem i wantem, mo blong yu luk stret man ya, mo blong yu harem voes blong hem,
15 from we bambae yu yu witnes blong hem long fes blong olgeta man, yu talemaot olgeta samting we yu luk mo yu harem.
16 ?Ale from wanem yu stap wet? Yu girap, yu baptaes, mo yu singaot long nem blong hem blong wasemaot ol sin blong yu.’
17 “Be taem mi kambak long Jerusalem, mo mi stap prea long haos tempol, mi luk wan vison.
18 Mi luk Masta i stap talem long mi se: ‘Yu hareap, yu aot long Jerusalem naoia nomo, from we bambae oli no save akseptem ol tok we yu talem blong tokbaot mi.’
19 Be mi mi talem se: ‘Masta. Olgeta ya oli savegud we bifo mi stap go long ol sinagog blong putum olgeta we oli bilif long yu long kalabus, mo blong wipim olgeta.
20 Mo taem ol man oli stap kilim Steven we i witnes blong yu, be mi tu mi stap stanap wetem olgeta mo mi glad nomo long samting ya. Mo mi stap lukaot gud long kot blong olgeta ya we oli stap kilim hem i ded.’
21 Be hem i talem long mi se: ‘Yu go, from we bambae mi sanem yu yu go long ol neson we oli stap longwe.’”
22 Ol man oli stap lesin gud long ol tok ya blong Pol gogo kasem we hem i talem lastok ya. Nao oli singaot bigwan, oli se: “!Tekemaot man ya! !I no stret blong hem i laef long wol ya!”
23 Nao oli stap singsingaot bigwan, oli sakem kot blong olgeta i go olbaot, mo oli tekem asis blong graon, oli stap sakem i go antap,
24 nao komanda blong ol soldia i givim oda blong oli tekem Pol i go long barik blong ol soldia. Mo hem i talem blong oli wipim Pol blong faenemaot from wanem stret oli stap singsingaot long hem olsem.
25 Be taem oli fasemgud hem blong wipim hem, Pol i talem long kapten blong olgeta we i stap stanap long ples ya, se: “?Folem loa, i stret we yufala i wipim wan man Rom* we yufala i no jajem* hem fastaem?”
26 Taem kapten i harem tok ya, hem i go talem long komanda se: “Man ya i wan man Rom. ?Bambae yu mekem wanem nao?”
27 Nao komanda ya i kam luk hem mo i talem se: “!Yu talemgud! ?Yu yu wan man Rom?” Hem i ansa se: “Yes.”
28 Nao Komanda ya i talem se: “Mi mi pem bigfala mane blong mi gat raet blong kam sitisen blong Rom.” Nao Pol i talem se: “Be mi mi kasem raet ya taem mi bon.”
29 Nao wantaem nomo, ol soldia we oli stap rere blong wipim hem, oli muvaot long hem. Mo taem komanda ya i save se Pol i wan man Rom, hem tu i fraet from we hem i fasem hem finis long ol jen.
30 Be komanda ya i wantem save stret risen from wanem ol man Jiu oli agensem Pol. Nao long nekis dei, hem i tekemaot jen we oli fasem hem long hem, mo i sanem tok i go long ol jif pris mo olgeta memba blong Sanhedrin* blong oli kam wanples. Nao hem i tekem hem i go stanap long fes blong olgeta.
Ol futnot
^ NT: “wan man we i sitisen blong Rom.”
^ NT: “yufala i no mekem hem i pas long kot yet.”
^ Yu luk Diksonari.
