Ol Wok 25:1-27
25 Nao Festas i kam long provins ya mo i statem wok blong hem, mo tri dei afta, hem i aot long Sisaria, i go long Jerusalem.
2 Nao ol jif pris mo ol haeman blong ol man Jiu oli go luk Festas, oli talem sam samting agensem Pol. Nao oli stap askem long hem
3 blong i lesin long olgeta,* i sanem tok blong oli tekem Pol i kam long Jerusalem. Be olgeta oli mekem plan finis se bambae oli haed long rod blong kilim Pol i ded.
4 Be Festas i talem se Pol i mas stap long kalabus nomo long Sisaria, mo bambae i no longtaem, hem i gobak long ples ya.
5 Hem i talem se: “I gud ol haeman blong yufala oli kam wetem mi, mo oli talemaot ol poen agensem man ya, sipos i tru se hem i mekem samting we i rong.”
6 Hem i stap eit dei no ten dei wetem olgeta, nao i godaon long Sisaria. Mo long nekis dei, hem i go sidaon long ples blong jajem man, mo i talem blong oli tekem Pol i kam.
7 Taem hem i kam, ol man Jiu we oli aot long Jerusalem, oli kam stanap raon long hem, mo oli stap talemaot plante bigfala poen agens long hem, be oli no save pruvum se tok blong olgeta i tru.
8 Nao Pol i talem se: “Mi mi no mekem wan sin nating agensem Loa blong ol man Jiu, no agensem haos tempol, no agensem Sisa.”
9 Be Festas i wantem mekem ol man Jiu oli glad long hem, nao hem i talem long Pol se: “?Yu yu wantem go long Jerusalem blong mi jajem yu longwe, long ol poen ya we oli stap talem?”
10 Be Pol i talem se: “Mi mi stanap long fored blong ples we Sisa i stap jajem ol man long hem. Mo hemia nao ples we yufala i sud jajem mi long hem. Mi mi no mekem wan samting nating we i rong long ol man Jiu, mo yu yu savegud samting ya.
11 Sipos mi mi wan man blong brekem loa, mo mi mekem wan samting we i stret blong mi ded from, bambae mi no askem blong yu tekemaot mi long panis ya. Be sipos tok ya blong olgeta i no tru, wan man i no gat raet blong putum mi long han blong olgeta blong mekem oli glad. !Mi apil long Sisa blong i jajem bisnes ya!”
12 Nao Festas i toktok wetem ol advaesa blong hem, biaen hem i talem se: “Bambae yu go long Sisa from we yu apil long Sisa.”
13 Sam dei i pas, nao King Agripa mo Benis, tufala i kam long Sisaria blong talem halo long Festas.
14 Oli stap sam dei long ples ya, nao Festas i talemaot kot kes blong Pol long king ya. Hem i se:
“I gat wan man we Filiks i lego hem i stap long kalabus,
15 mo taem mi go long Jerusalem, ol jif pris mo ol elda blong ol man Jiu oli kam talem sam samting long saed blong hem, mo oli askem blong mi jajem hem mo mi givim panis long hem.
16 Be mi talem long olgeta se ol man Rom oli no stap wok olsem, oli no letem man i go long han blong ol man we oli stap talemaot ol poen agens long hem blong mekem olgeta nomo oli glad. Fastaem, hem i mas gat janis blong stanap long fes blong olgeta, blong talemaot ansa blong hem long ol poen ya.
17 Nao taem oli kamtru long ples ya, mi no moa wet, long nekis dei blong hem, mi go sidaon long ples blong jajem man mo mi givim oda blong oli tekem man ya i kam.
18 Ol enemi blong hem oli girap, oli toktok, be oli no talem ol nogud samting we mi stap ting se maet hem i mekem.
19 Oli stap tokbaot wan rao nomo we oli gat wetem hem from fasin blong wosip* blong olgeta. Mo oli stap tokbaot wan man we nem blong hem Jisas we i ded finis, be Pol i stap talem se hem i laef.
20 Mi mi no save olsem wanem blong stretem rao ya. Taswe mi askem sipos hem i wantem go long Jerusalem, blong pas long kot longwe.
21 Be taem Pol i apil se bambae hem i stap long kalabus, i wet long desisen blong empera, mi givim oda blong hem i stap go kasem we mi sanem hem i go long Sisa.”
22 Nao Agripa i talem se: “Mi mi wantem harem tok blong man ya.” Mo Festas i talem se: “Tumora bambae yu harem hem.”
23 Nao long nekis dei, Agripa wetem Benis, tufala i kam long ples we oli stap mekem kot long hem, tufala i flasem gud tufala blong ol man oli ona long tufala. Ol komanda blong ol soldia mo ol haeman blong taon, mo ol man blong taon ya tu oli folem tufala. Mo Festas i givim oda nao oli tekem Pol i kam.
24 Nao Festas i talem se: “King Agripa mo yufala evriwan we yufala i stap long ples ya. Man ya we i stap long fes blong yufala, olgeta man Jiu long ples ya mo long Jerusalem oli stap kam luk mi oltaem from hem, oli stap singaot bigwan se i no stret blong hem i stap laef.
25 Be mi luksave se hem i no mekem wan samting we i stret blong hem i ded from. Taswe taem hem i apil i go long empera, mi mi mekem desisen blong sanem hem i go.
26 Be mi mi no save se bambae mi raetem wanem long Sisa blong tokbaot man ya. Taswe mi tekem hem i kam stanap long fes blong yufala evriwan mo long fes blong yu King Agripa, blong bambae yu jajem bisnes ya, nao biaen mi save raetem sam samting,
27 from we i no stret we mi sanem wan presina i go, be mi no talemaot klia wanem poen we oli gat agens long hem.”
