Ol Wok 27:1-44
27 Olgeta oli mekem desisen finis se bambae mifala i go long Itali long sip, ale oli putum Pol mo sam narafala presina long han blong wan kapten blong ol soldia, nem blong hem Julias. Hem i blong kampani ya we oli kolem kampani blong Ogastas.
2 I gat wan sip we i aot long Adramitiam i kam, nao i rere blong go long ol ples long Esia. Ale mifala i go long sip ya, mifala i aot. Mo Aristakas we i blong Tesalonaeka long Masedonia, hem tu i kam wetem mifala.
3 Long nekis dei, mifala i kamtru long Saedon. Julias i kaen tumas long Pol, nao i letem hem i go luk ol fren blong hem, mo olgeta oli lukaot gud long hem.
4 Taem mifala i aot long ples ya, mifala i stap fesem tumas win ale mifala i pas narasaed long aelan ya Saepras.
5 Nao mifala i pas afsaed long Silisia mo Pamfilia, nao mifala i goso long taon ya Maera, long Lisia.
6 Long ples ya, kapten blong ol soldia i faenem wan sip we i aot long Aleksandria blong go long Itali. Nao hem i putum mifala i go long sip ya.
7 Nao mifala i aot, mifala i stap ron slo nomo blong plante dei mo mifala i fesem hadtaem blong kam long Nidas. Win i strong tumas, mifala i no save go stret, ale mifala i pas biaen long Salmone long aelan ya Krit.
8 Mifala i pas klosap long so nomo, be mifala i fesem hadtaem yet. Nao mifala i kam kasem ples ya we nem blong hem Gudfala Pasis, we i klosap long taon ya Lasea.
9 Plante dei i pas mo naoia i denja blong ron long solwota. Mo Dei Blong Stretem Sin* tu i pas finis, nao Pol i talem wan tingting
10 long olgeta i se: “Olgeta. Mi mi luk se bambae yumi gat trabol long trip ya, ating bambae yumi lusum sip mo ol kago mo maet laef* blong yumi tu.”
11 Be kapten blong ol soldia i lesin moa long kapten blong sip mo ona blong sip ya, hem i no lesin long Pol.
12 Mo haba ya i no wan gudfala haba blong sip i stap long hem long koltaem. From samting ya, bighaf blong olgeta oli wantem se sip i aot long ples ya blong traem kasem Finiks, blong stap long ples ya long koltaem. Hem i wan haba long Krit we i open long tu saed, long notis mo long saotis.
13 Nao taem saot win i stap blu smosmol, oli ting se i stret nao blong folem plan blong olgeta. Nao oli pulum angka, mo oli pas klosap long so blong aelan ya Krit.
14 Be i no longtaem, wan bigfala win we oli kolem notis win* i girap, i blu i kam,
15 i kasem sip ya nao mifala i no save tanem blong i fesem win. Ale mifala i letem win ya i tekem mifala i go.
16 Nao mifala i go pas biaen long smol aelan ya Kaoda, blong haed long win ya. Mo mifala i traehad blong sevem dinggi* we i stap biaen long sip.
17 Be afta we oli pulum dinggi i kam antap, oli pulum rop i goraon long sip, mo oli taetem strong blong holem sip ya. Olgeta oli fraet se bambae oli rek long Siritis,* nao oli slakem sam rop, mo win nomo i tekem sip i go.
18 Strong win ya i stap saksakem sip ya olbaot, nao long nekis dei oli stat sakemaot ol kago i go long solwota.
19 Mo long namba tri dei, oli holem ol rop blong sip ya, oli sakemaot.
20 Plante dei finis mifala i no luk san mo ol sta. Mo strong win* ya i gohed, i meksave mifala, nao mifala i ting se bambae mifala i no moa save laef.
21 Olgeta oli stap plante dei finis we oli no kakae, ale Pol i stanap long fes blong olgeta, i talem se: “Olgeta. Sipos yufala i bin lesin long advaes blong mi, nao yumi no lego Krit, bambae yufala i no kasem trabol mo lusum plante samting olsem.
22 Be naoia yufala i no mas fraet. Bambae i no gat wan long yufala i lusum laef* blong hem, sip ya nomo bambae i lus.
23 Las naet, God blong mi we mi stap mekem wok blong hem, hem i sanem wan enjel i kam long mi,
24 mo i talem se: ‘Pol, yu no fraet. Yu mas stanap long fes blong Sisa. Mo from samting ya, God i glad blong sevem laef blong ol man ya we oli stap wetem yu long sip.’
25 Taswe ol fren, yufala i no mas fraet. Mi mi bilif long God, se bambae evri samting oli save kamtru stret olsem we enjel ya i talem long mi.
26 Be yumi mas rek long wan aelan.”
27 Nao long namba fotin dei, long naet blong hem win ya i stap dragem sip ya i go olbaot long Adria Si. Nao long medel naet, ol boskru oli ting se mifala i stap kam klosap long wan aelan.
28 Nao oli jekem botom blong solwota se i dip olsem wanem, nao oli faenemaot se hem i twanti fatom.* Ale oli go smol moa, nao oli jekem bakegen, nao oli faenemaot se hem i fiftin fatom.*
29 Nao oli fraet se sip ya bambae i rek long ol ston, ale oli slakem fo angka biaen long sip, mo oli wantem tumas se i delaet kwik.
30 Ol boskru oli traem ronwe long sip. Oli slakem daon dinggi, nao oli giaman se bambae oli go slakem sam angka long fored.
31 Be Pol i talem long kapten blong ol soldia wetem ol soldia i se: “Olgeta ya oli mas stap long sip, sipos no bambae yufala i no save laef.”
32 Nao ol soldia oli katem rop blong dinggi ya, mo oli letem i go.
33 Klosap i brok delaet, nao Pol i talem strong long olgeta se oli mas kakae. Hem i talem se: “Tede hem i namba fotin dei we yufala i stap wet, yufala i wari mo yufala i no kakae nating.
34 Naoia yufala i mas kakae sipos yufala i wantem laef, from we bambae i no gat wan hea long hed blong yufala i lus.”
35 Hem i talem samting ya finis, hem i tekem bred, nao long fes blong olgeta evriwan hem i talem tangkiu long God from, nao i brekem mo i kakae.
36 Nao olgeta evriwan oli no moa fraet, ale olgeta tu oli kakae.
37 Long sip ya, mifala tu handred seventi sikis man* evriwan.
38 Taem olgeta evriwan oli kakae we oli fulap gud, oli sakem ol bag wit i go long solwota blong mekem sip i emti.
39 Taem i delaet, oli luk wan aelan, be oli no save se hem i wanem aelan. Mo oli luk wan pasis we i gat sanbij long hem, nao oli traem blong mekem sip i goso long ples ya.
40 Ale oli katem ol rop blong ol angka ya biaen long sip, oli lego i go, mo oli tektekemaot ol rop we oli fasem ol bigfala parel ya we oli yusum blong stia. Nao biaen oli pulum sel long fored, blong win i tekem sip i goso.
41 Be i gat wan ples we solwota i no dip, nao fored blong sip i fas long sanbij long ples ya, nao i no save muf, ale ol bigbigfala wef oli brekemaot ol timba blong hem biaen.
42 Taem ol soldia oli luk samting ya, oli wantem kilim i ded ol presina blong oli no save swim i goso mo ronwe.
43 Be kapten blong ol soldia i wantem sevem Pol, ale hem i blokem plan ya blong olgeta. Nao hem i talem long ol man we oli save swim, blong oli jamdaon, mo oli swim i goso fastaem,
44 mo ol narafala man bambae oli swim long ol plang no sam pis blong sip i go biaen. Nao olgeta evriwan oli kasem so we i no gat wan i lus.
Ol futnot
^ Hemia i hapen long manis Tisri we i Septemba mo Oktoba. Long manis ya, taem blong ren i stat mo solwota i raf.
^ NT: “sol.”
^ Grik: Eurakylon.
^ Wan smol bot we oli yusum olsem laef bot.
^ Yu luk Diksonari.
^ PT: “i no wan smol win.”
^ NT: “sol.”
^ Hemia i samwe long 36 meta. Yu luk Diksonari.
^ Hemia i samwe long 27 meta. Yu luk Diksonari.
^ NT: “sol.”
