Ol Wok 3:1-26
3 Nao long tri klok long aftenun* long taem blong prea, Pita mo Jon tufala i go long haos tempol.
2 Nao i gat wan man i stap long ples ya we i no save wokbaot, from we taem hem i bon, leg blong hem i nogud. Mo evri dei ol man oli stap go putum hem klosap long doa ya blong haos tempol we nem blong hem Naes Doa, blong hem i save askem long ol man we oli stap go insaed long haos tempol, blong oli sore long hem mo givim presen long hem.
3 Taem hem i luk we Pita mo Jon tufala i stap kam blong go insaed long haos tempol, hem i askem long tufala blong tufala i givim presen long hem.
4 Be Pita mo Jon, tufala i lukluk stret long man ya, mo Pita i talem se: “Yu lukluk mitufala.”
5 Nao hem i lukluk tufala, i ting se bambae tufala i givim wan samting long hem.
6 Be Pita i talem long hem se: “Mi mi no gat silva mo gol, be wan samting nomo we mi mi gat, bambae mi givim long yu. Long nem blong man Nasaret ya Jisas Kraes, mi mi talem long yu se: !Yu girap, yu wokbaot!”
7 Nao hem i holem raet han blong man ya, mo i leftemap hem. Mo wantaem nomo, ol bun blong leg blong hem oli kam strong,
8 nao hem i stanap wantaem mo i wokbaot, i folem tufala i go insaed long haos tempol. Hem i stap wokbaot, i stap jamjam mo i stap presem God.
9 Nao olgeta man oli luk we hem i stap wokbaot, mo i stap presem God.
10 Nao oli luksave se hem nao man ya we i stap sidaon klosap long Naes Doa long haos tempol, i stap wet blong ol man oli givim presen long hem, nao oli glad mo oli sapraes tumas long samting we i hapen long hem.
11 Nao from we olgeta man oli sapraes tumas, oli resis i kam long trifala long ples ya we oli singaot se vranda blong Solomon. Long ples ya, man ya i stap holemtaet han blong Pita mo Jon.
12 Taem Pita i luk ol man ya, hem i talem long olgeta se: “Ol man Isrel, ?from wanem yufala i sapraes tumas long samting ya, mo yufala i stap lukluk mitufala olsem? ?Yufala i ting se mitufala i yusum prapa paoa blong mitufala, no from we mitufala i man blong God, nao mitufala i mekem man ya i wokbaot? !Nogat!
13 God blong ol olfala blong yumi bifo, Ebraham mo Aesak mo Jekob, hem i leftemap nem blong Jisas, Man Blong Wok blong hem. Hem nao we yufala i letem hem i go long han blong ol man, mo long fes blong Paelat yufala i talem se yufala i no wantem hem, nating se hem i wantem letem hem i go fri.
14 Yes, man ya i wan stret man, mo hem i tabu, be yufala i no wantem hem. Yufala i girap yufala i askem blong oli letem wan man i go fri we hem i man blong kilim man,
15 nao yufala i kilim i ded Nambawan Man blong givim laef. Be God i mekem hem i laef bakegen, mo mifala i witnes long samting ya.
16 Man ya we leg blong hem i nogud, yufala i luk hem mo yufala i save hem, be naoia hem i kam strong from nem blong Jisas, mo from we mitufala i bilif long nem ya. Bilif ya we mitufala i gat long hem, i mekem man ya i kam gud fulwan olsem we yufala evriwan i luk.
17 Ol brata, mi mi save we yufala i bin mekem samting ya from we yufala i no save, olsem ol lida blong yufala oli bin mekem.
18 Be samting ya i hapen blong God i mekem ol tok blong hem we ol profet oli talemaot bifo, oli kamtru. Ol tok ya oli talem se Kraes blong hem bambae i safa.
19 “Taswe yufala i mas tanem tingting blong yufala, mo yufala i tanraon blong Jehova* i tekemaot sin blong yufala, nao hem bambae i mekem yufala i gat niufala paoa,
20 mo hem i save sanem Kraes we hem i putumap hem finis se i blong yufala, i kam, yes hemia Jisas.
21 Be hem i mas stap long heven gogo kasem taem we olgeta samting oli kam niuwan bakegen, olsem tok blong hem we ol tabu profet blong hem bifo oli talemaot.
22 Moses i talem se: ‘Jehova* we i God blong yufala bambae i jusumaot wan long ol brata blong yufala blong i kam profet blong yufala, olsem mi. Yufala i mas lesin long olgeta samting we hem i talem long yufala.
23 Man* we i no wantem lesin long Profet ya, God bambae i spolem gud hem.’
24 Mo olgeta profet stat long Samuel gogo kasem olgeta we oli kam biaen long hem, olgeta tu oli stap talemaot taem ya tede.
25 Yufala i pikinini blong ol profet mo blong kontrak ya we God i mekem wetem ol bubu blong yufala, taem hem i talem long Ebraham se: ‘Pikinini* blong yu bambae i mekem se olgeta famle blong wol oli kasem blesing.’
26 Afta we God i mekem Man Blong Wok blong hem i laef bakegen, hem i sanem hem i kam long yufala fastaem, blong hem i blesem yufala taem hem i pulum yufala i gowe long ol rabis wok we yufala i stap mekem.”
Ol futnot
^ PT: “namba naen aoa.”
^ PT: “gat niufala paoa long fes blong Jehova.” Yu luk Diksonari.
^ Yu luk Diksonari.
^ NT: “sol.”
^ PT: “laen.”
