Ol Wok 6:1-15
6 Long ol dei ya, taem namba blong ol disaepol i stap kam antap, ol disaepol we oli toktok lanwis Grik oli stap komplen agens long ol disaepol we oli toktok lanwis Hibru, from we taem oli stap seraot kakae evri dei, oli no tingbaot ol wido we oli toktok lanwis Grik.
2 Nao ol twelef aposol oli singaot olgeta disaepol oli kam wanples, mo oli talem se: “I no stret blong* mifala i lego wok ya blong tijim ol man long tok blong God, blong mifala i go seraot kakae long ol tebol.
3 Taswe ol brata, yufala i mas jusum seven man long yufala we oli gat gud nem long fes blong ol man, mo we tabu spirit i fulap long olgeta mo oli waes, blong mifala i save putumap olgeta blong oli lukaot long bisnes ya.
4 Olsem nao bambae mifala i spenem fultaem blong mifala blong prea mo blong tijim ol man long tok blong God.”
5 Nao olgeta evriwan oli glad long samting we oli talem, nao oli jusum Steven we i gat strong bilif mo we tabu spirit i fulap long hem, mo Filip, mo Prokoras, mo Nikano, mo Timon, mo Pamenas, mo Nikolas we i wan proselaet blong Antiok.
6 Ale oli tekem olgeta oli go long ol aposol, nao ol aposol oli putum han blong olgeta long olgeta mo oli prea blong putumap olgeta.
7 Nao tok blong God i stap goaot moa long ol man, mo namba blong ol disaepol i stap kam plante moa long Jerusalem. Mo plante plante pris tu oli bilif.
8 Steven i wan man we God i glad long hem mo i givim paoa long hem, nao hem i stap mekem ol samting blong sapraes mo ol merikel long fes blong ol man.
9 Be sam man we oli memba blong Sinagog Blong Ol Man We Oli Kam Fri* wetem sam man Saerin mo Aleksandria, mo sam man Silisia mo Esia, oli kam blong rao long Steven.
10 Be tabu spirit i stap mekem hem i waes tumas, nao taem hem i toktok, olgeta oli no save winim hem.
11 Nao long fasin haed, oli pulum sam man blong oli talem se: “Mifala i harem hem i stap tok nogud long Moses mo long God.”
12 Mo oli pulum ol man, ol elda, mo ol tija blong Loa gogo olgeta evriwan oli kros, nao oli go holemtaet hem mo oli tekem hem i go long Sanhedrin.*
13 Nao oli tekem ol giaman witnes oli kam talem se: “Oltaem man ya i stap tok nogud long tabu ples ya mo i stap tok agensem Loa.
14 Mifala i harem hem i talem se man Nasaret ya Jisas bambae i brekemdaon ples ya mo i jenisim kastom we Moses i pasem i kam long yumi.”
15 Mo olgeta we oli stap sidaon long rum blong Sanhedrin,* oli stap lukluk hem, mo oli luk we fes blong hem i olsem fes blong enjel.
Ol futnot
^ PT: “God i no save glad sipos.”
^ I luk olsem se tok ya ‘Sinagog Blong Ol Man We Oli Kam Fri,’ i stap tokbaot wan grup blong ol man Isrel no blong ol proselaet we oli stap joen wanples blong prea mo ridim Baebol. I klia se fastaem olgeta ya oli stap long kalabus no oli ol slef, be biaen oli kam fri.
^ Yu luk Diksonari.
^ Yu luk Diksonari.
