Revelesen 11:1-19
11 Nao mi kasem wan stik we i olsem wan longfala rula, mo wan voes i talem long mi se: “Yu girap, yu go long haos tempol blong God, yu makem ol rum* ya we oli tabu mo olta, mo yu kaontem olgeta we oli stap mekem wosip long ples ya.
2 Be yad we i stap raonabaot long hem, yu livim i stap mo yu no makem, from we ples ya i go finis long ol man blong ol narafala neson, mo bambae olgeta ya oli stap purumbut long taon ya we i tabu, blong foti tu manis.
3 Mi bambae mi sanem tu witnes blong mi, we tufala i putum ol klos we oli wokem long selbag, blong tufala i talemaot ol profet tok blong wan taosen tu handred sikisti dei.”
4 Tufala ya i minim tufala oliftri, mo tufala ples blong putum laet, mo tufala i stap stanap long fored blong Masta blong wol.
5 Sipos ol enemi oli wantem spolem tufala, faea bambae i kamaot long maot blong tufala, i bonem olgeta. Hemia nao samting we bambae i hapen long man we i wantem spolem tufala.
6 Tufala ya i gat paoa blong blokem skae* blong i no gat ren long taem ya we tufala i stap talemaot profet tok. Mo tufala i gat paoa blong tanem ol wota i kam blad, mo blong mekem ol defdefren kaen sik i kam spolem wol. Tufala i save mekem ol samting ya enitaem nomo, olsem we tufala i wantem.
7 Taem tufala witnes ya i finisim wok blong tufala, bigfala wael anamol we i kamaot long bigfala hol ya we i godaon we i godaon, bambae i faet agensem tufala, i winim tufala, mo i kilim tufala i ded.
8 Mo bambae dedbodi blong tufala i stap long bigrod blong bigfala taon ya we Sodom mo Ijip, tufala i pija blong hem. Long taon ya nao, ol man oli nilim Masta blong tufala i ded long wan pos.
9 Mo long tri dei haf, olgeta grup blong man, mo ol man blong olgeta kantri, mo blong olgeta laen, mo blong olgeta lanwis, bambae oli stap lukluk dedbodi blong tufala. Mo bambae oli no letem ol man oli berem tufala.
10 Mo olgeta we oli stap long wol, oli glad tumas mo oli mekem lafet, mo bambae oli givgivim presen long olgeta from we tufala profet ya, tufala i stap mekem olgeta oli harem nogud.
11 Biaen long tri dei haf ya, paoa blong laef* we i kam long God i go insaed long tufala, nao tufala i stanap. Mo olgeta we oli luk samting ya, oli fraet tumas.
12 Nao tufala i harem wan bigfala voes i kamaot long heven, i talem long tufala se: “Yutufala i kam antap long ples ya.” Nao stret long fes blong ol enemi blong tufala, wan klaod i tekem tufala i go antap long heven.
13 Nao stret long taem ya, graon i seksek bigwan. Nao wan haf blong bigfala taon ya i brobrok, naen haf blong hem i stap, mo i gat seven taosen man oli ded. Mo ol narafala man we oli laef i stap oli fraet tumas, nao oli stap leftemap nem blong God we i stap long heven.
14 Seken trabol ya i kamtru finis, be !yu luk! nambatri trabol i stap kam kwiktaem nomo.
15 Namba seven enjel i blo long trampet long hem. Nao olbaot long heven, mi harem we olgeta oli stap singaot bigwan, oli talem se: “Kingdom blong wol i kam Kingdom blong Masta blong yumi mo blong Kraes blong hem, mo hem bambae i rul oltaem gogo i no save finis.”
16 Nao ol twanti fo elda ya we oli stap sidaon long jea blong olgeta long fored blong God, oli bodaon we fes blong olgeta i kasem graon, mo oli wosipim God,
17 oli talem se: “Jehova* God, yu yu gat olgeta paoa, mo yu yu stap we yu stap, mo yu stap fastaem, bifo olgeta. Mifala i talem tangkiu long yu, from we yu yusum bigfala paoa blong yu, mo yu stat blong rul.
18 Be ol neson oli kros tumas, mo yu tu yu kam kros, mo stret taem i kam blong yu jajem ol dedman, mo blong givim pei long ol profet we oli slef blong yu, mo long ol tabu man, mo long olgeta we oli fraet gud long nem blong yu, mo long olgeta we oli no gat nem, mo long olgeta we oli haeman, mo blong spolem ol man ya we oli stap spolem wol.”
19 Nao haos tempol blong God long heven i open, mo mi luk bokis blong kontrak blong hem insaed long hem. Nao laetning i laet long skae, tanda i faerap, mo graon i seksek, mo ol bigbigfala ston blong aes oli folfoldaon, mo mi harem ol voes.
Ol futnot
^ Hemia Rum we i Tabu, mo Rum We i Tabu We i Tabu.
^ NT: “heven.”
^ NT: “spirit blong laef.”
^ Yu luk Diksonari.
