Revelesen 15:1-8
15 Nao mi luk wan narafala bigfala saen bakegen long heven we i gud tumas. I gat seven enjel we oli stap tekem seven bigfala trabol i kam. Hemia ol laswan trabol, from we taem olgeta oli kamtru, kros blong God tu bambae i finis.
2 Nao mi luk wan samting we i olsem solwota we i klia olsem glas we faea i miks wetem. Mo ol man ya we oli winim wael anamol mo pija blong hem, mo namba blong nem blong hem, oli stap stanap klosap long solwota ya we i klia olsem glas, oli stap holem ol hap* blong God.
3 Mo oli stap sing long singsing blong Moses we i slef blong God, mo long singsing blong Smol Sipsip, oli se:
“Jehova* God, yu yu gat olgeta paoa. Ol wok blong yu oli bigwan olgeta mo oli gud tumas. Yu yu King oltaem nomo gogo i no save finis, mo olgeta samting we yu mekem oli stret mo oli tru.
4 Jehova,* yu nomo yu stap tru long ol man blong yu, taswe ?hu man i no save fraet long yu, mo hu man i no save leftemap nem blong yu? Ol man blong olgeta neson bambae oli kam long fored blong yu, blong mekem wosip long yu from we oli luksave se ol loa blong yu oli stret.”
5 Afta long samting ya, mi luk ol tabu rum long haos tapolen long heven i open, hemia haos tapolen we i stap olsem wan witnes,
6 mo ol seven enjel we oli stap tekem seven bigfala trabol ya i kam, oli kamaot long ol tabu rum ya. Oli werem klos we oli wokem long kaliko ya linen we i klin gud mo i saen we i saen, mo oli gat wan strap i goraon long jes blong olgeta, strap ya oli wokem long gol.
7 Nao wan long ol fo jerubim ya i tekem seven dis we oli wokem long gol, mo i givim wanwan i go long ol seven enjel ya. Ol dis ya oli fulap long kros blong God ya we i laef oltaem gogo i no save finis.
8 Nao from we bigfala laet blong God mo paoa blong hem i stap, smok i kavremap gud ol ples ya we oli tabu, nao i no gat man i save go insaed long hem gogo kasem we ol seven trabol ya we ol seven enjel ya oli tekem i kam, oli finis.
Ol futnot
^ Hemia wan samting blong plei miusik we i gat string olsem gita, be i defren.
^ Yu luk Diksonari.
^ Yu luk Diksonari.
