Revelesen 4:1-11
4 Afta long ol samting ya, taem mi stap lukluk, mi luk wan doa i open long heven. Mo faswan voes we mi harem, hem i olsem wan trampet we i talem long mi se: “Yu kam antap long ples ya, mo bambae mi soemaot long yu ol samting we bambae oli hapen.”
2 Wantaem nomo, paoa blong spirit i kam long mi, nao mi luk wan bigfala jea blong king i stap long heven, mo wan man i stap sidaon long hem.
3 Mo Man we i sidaon long bigfala jea ya, hem i saen we i saen olsem ston ya jaspa* mo ston ya sadius.* Mo i gat wan renbo i goraon long bigfala jea ya, mo laet blong hem i saen olsem ston ya emeral.*
4 Mo raonabaot long bigfala jea ya, i gat twanti fo narafala jea blong king i stap, mo long ol jea ya i gat twanti fo elda oli sidaon long olgeta. Olgeta ya, klos blong olgeta i waet, mo long hed blong olgeta, i gat hat blong king we oli wokem long gol.
5 Nao long bigfala jea blong king, i gat laetning i stap kamaot long hem, mo mi harem ol voes mo tanda i stap kamaot long hem. Long fored blong bigfala jea ya, i gat seven bigfala faea we oli stap laet, we oli minim ol seven spirit blong God.
6 Mo long fored blong bigfala jea ya, i gat wan samting we i olsem solwota i stap, mo i olsem glas we i saen we i saen.
Long medel blong bigfala jea ya mo raonabaot long hem, i gat fo jerubim* we ol ae oli fulap long fored mo long baksaed blong olgeta.
7 Fas jerubim, hem i olsem laeon mo sekenwan i olsem wan yang bul, mo namba tri, fes blong hem i olsem fes blong man, mo namba fo i olsem wan igel we i stap flae.
8 Ol fo jerubim ya evriwan oli gat sikis wing blong olgeta, mo ol ae oli fulap long ol wing blong olgeta, antap mo aninit. Nao long dei mo long naet, oli stap gohed blong talem se: “Jehova,* God We i Gat Olgeta Paoa, mo we i stap we i stap, mo we i stap fastaem, bifo olgeta, mo we bambae i kam, hem i tabu, we i tabu, we i tabu.”
9 Ol jerubim ya oli stap leftemap nem blong Man ya we i sidaon long bigfala jea, hemia Man ya we i laef oltaem gogo i no save finis, mo oli stap ona long hem, mo oli stap talem tangkiu long hem. Evritaem we oli mekem olsem,
10 ol twanti fo elda ya oli foldaon mo oli wosipim Man ya we i sidaon long bigfala jea ya, we i laef oltaem gogo i no save finis. Mo oli tekem hat blong olgeta, oli sakem long fored blong bigfala jea ya, mo oli stap talem se:
11 “Jehova,* God blong mifala. Yu yu gat bigfala paoa, mo yu mekem olgeta samting. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli ona long yu.”
Ol futnot
^ Yu luk Diksonari.
^ Yu luk Diksonari.
^ Yu luk Diksonari.
^ NT: “ol laef samting.” Ol jerubim hemia ol enjel we oli gat hae posisen.
^ Yu luk Diksonari.
^ Yu luk Diksonari.
