Fas Buk Blong Ol King 4:1-34
4 Nao King Solomon i rul long olgeta laen blong Isrel.+
2 Mo hemia ol haeman* blong hem: Asaria we i boe blong Jadok+ hem i pris,
3 Elihoref mo Ahaejah we tufala i boe blong Sisaha, tufala i sekretari.+ Jehosafat+ we i boe blong Ahilud hem i man blong raetemdaon samting.
4 Benaea+ we i boe blong Jehoeada, hem i lidim ol ami, mo Jadok mo Abiata+ tufala i pris,
5 Asaria we i boe blong Natan+ hem i lukaot long ol deputi, Sabud we i boe blong Natan hem i pris mo i fren blong king,+
6 Ahisara i lukaot long ol man we oli stap long haos blong king, mo Adoniram+ we i boe blong Abda i lidim ol man we king i putum olgeta blong oli mekem ol strong wok.+
7 Solomon i gat 12 deputi blong hem. Olgeta ya oli bos long olgeta laen blong Isrel we oli givim kakae blong king wetem olgeta we oli stap long haos blong hem. Long wan yia, evri deputi ya wanwan i gat prapa manis blong olgeta blong givim kakae.+
8 Hemia ol twelef deputi ya: I gat boe blong Huru we i lukaot long rijen blong ol hil blong Efrem,
9 i gat boe blong Dekere we i lukaot long Makaj, Sahalbim,+ Betsemes, mo Elonbetanan,
10 i gat boe blong Esed we i lukaot long Arubot (hem i lukaot long Soko mo olgeta ples long Hefa),
11 i gat boe blong Abinadab we i lukaot long olgeta ples long saed blong hil blong Doro (waef blong hem Tafat, we i gel blong Solomon),
12 i gat Bahana we i boe blong Ahilud, hem i lukaot long Tahanak, Megido,+ mo Betsean wetem olgeta ples raonabaot long hem,+ stat long Betsean i go kasem Abelmehola mo i kasem ol ples raonabaot long Jokmeam. Ol ples raonabaot long Betsean ya oli stap klosap long Jaretan mo aninit long Jisrehel.+
13 I gat boe blong Keba we i lukaot long Ramotgilead+ (hem i lukaot long ol vilej blong Jaere we i boe blong Manase long Gilead.+ I gat ol tent nomo long ol vilej ya.+ Mo tu Keba i lukaot long ol ples raonabaot long Agob+ we i stap long Basan,+ hemia 60 bigfala taon we i gat stonwol blong olgeta mo oli lokem ol get blong olgeta long ol bigfala aean we oli wokem long kopa),
14 i gat Ahinadab we i boe blong Ido, hem i lukaot long Mahanaem,+
15 i gat Ahimahaj we i lukaot long Naftali (hem i tekem Basemat we i wan narafala gel blong Solomon blong i kam waef blong hem),
16 i gat Bahana we i boe blong Husae, hem i lukaot long Asere mo Bealot,
17 i gat Jehosafat we i boe blong Parua, hem i lukaot long Isakara,
18 i gat Simei+ we i boe blong Elaha, hem i lukaot long Benjamin,+
19 mo i gat Keba we i boe blong Uri, hem i lukaot long Gilead+ we bifo i kantri blong Sihon+ we i king blong ol laen blong Amoro, mo i kantri blong Og+ we i king blong Basan. Mo i gat wan moa deputi we i bos long olgeta deputi ya.
20 Ol man Juda mo ol man Isrel oli plante we plante olsem sanbij long solwota,+ olgeta ya oli stap kakae, oli stap dring, mo oli glad tumas.+
21 Solomon i rul long olgeta kingdom, i stat long Reva*+ i go kasem kantri blong ol man Filistia, mo i go kasem boda blong Ijip. Mo olgeta man we oli stap long ol ples ya, oli givim samting long hem mo oli wok blong hem long ful laef blong hem.+
22 Evri dei, kakae we evriwan long pales blong Solomon oli kakae, hemia 30 koro* blong flaoa we i nambawan, mo 60 koro blong flaoa,
23 10 buluk we man nomo i stap fidim olgeta, 20 buluk we oli stap kakae gras long open ples, mo 100 sipsip, wetem sam dia, gasel, robak, mo ol pijin we oli fatfatgud.
24 Solomon i gat paoa antap long evri samting we oli stap long saed ya blong Reva,*+ stat long Tifsaha i go kasem Gasa,+ mo long olgeta king tu we oli stap long saed ya. Mo hem i glad from we i gat pis long evri ples raonabaot long hem.+
25 Long olgeta taem ya we Solomon i rul, ol man Juda mo ol man Isrel i stat long Dan i go kasem long Bereseba, oli stap sefgud, olgeta evriwan oli stap aninit long prapa rop blong grep blong olgeta, mo aninit long figtri blong olgeta.
26 Mo Solomon i gat 4,000* rum blong ol hos we oli pulum ol jariot blong hem, mo hem i gat 12,000 hos.*+
27 Ol deputi ya oli givim kakae long King Solomon wetem olgeta we oli kakae long tebol blong king. Mo wanwan long olgeta i givim kakae long manis blong hem, mo i meksua se oli no sot long wan samting.+
28 Mo tu, taem i nidim, oli givim bale mo ol drae gras blong ol hos wetem ol hos blong pulum jariot. Wanwan long olgeta oli givim folem namba we oli askem long olgeta blong givim.
29 Mo God i givim waes mo fasin luksave we i bigwan we i bigwan long Solomon, mo i mekem se hat blong hem i naf blong kasemsave long plante samting gogo man i no naf blong kaontem* olsem sanbij long saed blong solwota.+
30 Waes blong Solomon i bigwan moa i bitim waes blong olgeta man long Is, mo i bitim olgeta waes blong Ijip.+
31 Hem i waes moa i bitim eni narafala man, hem i waes moa long Etan+ we i kamaot long laen blong Esrahaet, mo i bitim Heman,+ Kalkol,+ mo Darada we oli ol boe blong Mahol. Mo nius blong hem i go kasem olgeta nesen we oli stap raonabaot.+
32 Hem i wokem* 3,000 proveb,*+ mo ol singsing we hem i wokem+ i kasem 1,005.
33 Hem i tokbaot ol tri, i stat long sida long Lebanon i go kasem hisop+ we i gru olbaot long ol stonwol. Mo tu hem i tokbaot ol animol,+ ol pijin,*+ ol animol olsem snek mo lised,*+ mo ol fis.
34 Ol man long olgeta nesen oli stap kam blong lesin long waes blong Solomon, ol king tu we oli stap olbaot long wol oli kam, from we oli harem nius blong waes blong hem.+
Ol futnot
^ NT: “ol prins.”
^ Hemia Yufretes Reva.
^ Hemia long wes saed blong Yufretes Reva.
^ Namba ya oli faenem long sam olfala hanraet mo long ol narafala vas we oli tokbaot sem stori. Sam narafala olfala hanraet oli talem se 40,000.
^ NT: “man blong ron long hos.”
^ PT: “i mekem se hat blong hem i bigwan.”
^ NT: “talemaot.”
^ NT: “ol animol we oli stap flae.”
^ NT: “ol animol we oli krol.”
