Fas leta i go long Korin 13:1-13
-
Lav—wan fasin we i nambawan (1-13)
13 Sipos mi mi toktok long ol lanwis blong ol man mo blong ol enjel be mi no gat lav, mi mi olsem wan bel o tu pis aean we i stap mekem bigfala noes nomo.
2 Sipos mi gat presen ya blong talemaot profet tok mo blong kasemsave olgeta tabu tokhaed mo olgeta save,+ mo sipos mi gat bilif we i naf blong seftem* ol bigfala hil, be mi no gat lav, mi mi nating nomo.*+
3 Sipos mi givimaot olgeta samting blong mi blong fidim ol narafala,+ mo sipos mi letem bodi blong mi i go olsem sakrefaes blong mi save tok flas from, be mi no gat lav,+ mi no winim wan samting nating.
4 Man we i gat lav,+ hem i gat longfala tingting+ mo i kaen.+ Man we i gat lav, hem i no jalus.+ Hem i no tok flas mo tingting blong hem i no go antap.+
5 Man we i gat lav, hem i no mekem ol samting we i no stret,*+ hem i no tingbaot hem wan nomo,+ mo hem i no kros kwik.+ Hem i no tingbaot rong we ol narafala oli mekem long hem.+
6 Hem i no glad long ol fasin we i no stret,+ be hem i glad long ol fasin we i tru.
7 Hem i no letem wan samting i daonem tingting blong hem,+ mo hem i bilif long olgeta samting,+ hem i gat hop long olgeta samting,+ mo hem i stanap strong long olgeta samting.+
8 Lav i no save finis samtaem. Be sipos i gat presen ya blong talemaot ol profet tok, presen ya bambae i lus, mo sipos i gat ol lanwis,* bambae oli finis, mo sipos i gat save, bambae oli lus,
9 from we save ya we yumi gat, hem i haf nomo,+ mo presen ya blong talemaot ol profet tok, hem i haf nomo.
10 Be taem samting ya we i fulwan i kam, samting we i haf nomo bambae i lus.
11 Taem mi pikinini, mi toktok olsem pikinini, mo mi tingting olsem pikinini, mo mi skelem ol samting olsem pikinini. Be naoia we mi bigman finis, mi lego olgeta fasin ya we oli blong pikinini.
12 Naoia yumi stap luk ol samting oli no klia,* i olsem we yumi stap lukluk olgeta long wan aean mira, be biaen bambae yumi luk olgeta klia nomo olsem we oli stap stret long fored blong yumi. Naoia save we mi mi gat, hem i haf nomo, be biaen bambae save blong mi i fulwan,* stret olsem we God i save gud mi.
13 Naoia trifala ya nomo i stap: Bilif, hop, mo lav. Be lav nao hem i impoten moa long trifala.+
Ol futnot
^ NT: “muvumaot.”
^ NT: “mi mi stap blong nating nomo.”
^ NT: “hem i no mekem ol fasin we man i sek nogud long hem.”
^ Hemia merikel ya blong toktok narafala lanwis.
^ NT: “Naoia yumi no luksave ol samting.”
^ NT: “bambae mi kasem stret save.”
