Fas Buk Blong Kronikel 19:1-19
19 Biaen Nahas, king blong ol man Amon i ded, mo boe blong hem i tekem ples blong hem, i kam king.+
2 Nao Deved i talem se: “Bambae mi soemaot se oltaem mi lavem+ Hanun we i boe blong Nahas from we papa blong hem i soem lav oltaem long mi.” Ale Deved i sanem ol mesenja blong oli go leftemap tingting blong Hanun from ded blong papa blong hem. Be taem ol man blong wok blong Deved oli kam long ples blong ol man Amon+ blong leftemap tingting blong Hanun,
3 ol prins blong ol man Amon oli talem long Hanun se: “?Yu ting se Deved i ona long papa blong yu taem i sanem ol man ya oli kam? Ol man blong wok blong hem oli kam long yu blong oli luklukgud olgeta ples mo blong oli spae long ples blong yumi, blong oli save kam faet mo winim yu.”
4 Ale Hanun i tekem ol man blong wok blong Deved, i sevemaot mustas blong olgeta+ mo i katemaot klos blong olgeta long haf, stret long as blong olgeta, mo i sanem olgeta oli go.
5 Taem Deved i harem nius blong ol man ya, kwiktaem nomo hem i sanem sam narafala man oli go mitim olgeta, from we olgeta ya oli sem tumas long wanem we i hapen long olgeta. Nao king i talem long olgeta se: “Yufala i stap fastaem long Jeriko+ go kasem we mustas blong yufala i gru bakegen, nao biaen yufala i kambak.”
6 Sam taem biaen, ol man Amon oli luksave se Deved i luk olgeta olsem wan samting we i sting, nao olgeta wetem Hanun oli sanem 1,000 talen* blong silva i go long Mesopotemia,* Aram-mahaka, mo Joba, blong oli save rentem ol jariot blong olgeta mo ol man blong ron long hos.+
7 Long fasin ya, oli rentem 32,000 jariot, wetem king blong Mahaka mo ol man blong hem. Biaen oli kam mekem kamp blong olgeta long fored blong Medebaha.+ Ol man Amon oli joen tugeta long ol taon blong olgeta mo oli goaot blong faet.
8 Taem Deved i harem samting ya, hem i sanem Joab+ mo ful ami blong hem oli go, wetem ol strong man blong faet blong hem.+
9 Nao ol man Amon oli go aotsaed long get blong taon, oli stanap rere long ol grup. Be ol king we oli bin kam, olgeta oli stap olgeta nomo aotsaed long open ples.
10 Taem Joab i luk se ol enemi ya oli stap kam long fored blong hem mo long biaen, hem i jusum sam nambawan soldia blong Isrel mo i mekem oli stanap rere long ol grup, blong oli faet wetem ol man Siria.+
11 Mo hem i putum brata blong hem Abisae+ blong i lidim ol narafala soldia,* mo blong i mekem olgeta oli stanap rere long ol grup, blong oli faet wetem ol man Amon.
12 Nao Joab i talem se: “Sipos mi no naf blong winim ol man Siria,+ yu mas kam blong sevem mi, mo sipos yu no naf blong winim ol man Amon, bambae mi sevem yu.
13 Yumi mas strong mo yumi no mas fraet blong faet+ from ol man blong yumi mo from ol taon blong God blong yumi, mo Jehova bambae i mekem samting we hem i luk se i stret.”
14 Nao Joab wetem ol man blong hem oli muv i go blong faet wetem ol man Siria, mo ol man Siria oli ronwe long fes blong hem.+
15 Taem ol man Amon oli luk se ol man Siria oli ronwe, olgeta tu oli ronwe long brata blong hem Abisae mo oli go insaed long taon. Afta long samting ya, Joab i gobak long Jerusalem.
16 Taem ol man Siria oli luk we ol man Isrel oli winim olgeta, oli sanem ol mesenja blong oli go singaot ol man Siria we oli stap long eria blong Reva,*+ mo Sovak we i lida blong ami blong Hadadesa, hem nao i lidim olgeta.+
17 Taem Deved i harem nius blong samting ya, kwiktaem nomo hem i hivimap olgeta soldia blong Isrel, mo oli krosem Jodan Reva nao oli kamtru long olgeta mo oli stanap rere long ol grup, blong fesem olgeta. Deved i mekem ol soldia blong hem oli stanap rere long ol grup blong oli mitim ol man Siria, nao olgeta oli faet agensem hem.+
18 Be ol man Siria oli ronwe long ol man Isrel, mo Deved i kilim i ded 7,000 man Siria we oli ron long jariot, mo 40,000 soldia we oli wokbaot, mo tu, hem i kilim i ded lida blong ami blong olgeta, hemia Sovak.
19 Taem ol man blong wok blong Hadadesa oli luk se ol man Isrel oli winim olgeta,+ kwiktaem nomo oli mekem pis wetem Deved mo oli stap aninit long rul blong hem.+ Mo ol man Siria oli no moa wantem givhan long ol man Amon bakegen.
Ol futnot
^ PT: “Aram-naharaem.”
^ PT: “putum ol narafala soldia long han blong Abisae.”
^ Hemia Yufretes Reva.
