Fas Samuel 11:1-15
11 Nao i gat wan man Amon+ we nem blong hem Nahas, hem i kam mekem kamp blong hem blong faet agensem ol man Jabes+ long Gilead. Mo ol man Jabes oli talem long Nahas se: “Yu mekem wan kontrak* wetem mifala, mo bambae mifala i wok blong yu.”
2 Nao man Amon ya Nahas i talem long olgeta se: “Bambae mi mekem kontrak wetem yufala sipos mi stikimaot evri raet ae blong yufala. Bambae mi mekem olsem blong mekem olgeta man Isrel oli sem.”
3 Ale ol elda blong Jabes oli talem long hem se: “Yu givim seven dei long mifala, blong mifala i save sanem sam mesenja i go long olgeta teritori blong Isrel. Biaen, sipos i no gat man i kam blong givhan long mifala, bambae mifala i sarenda long yu.”
4 Nao ol mesenja oli kam long ples blong Sol long Gibea,*+ mo oli talemaot tok ya long ol man, nao evriwan oli krae we oli krae bigwan.
5 Be Sol i stap kambak long garen mo i wokbaot biaen long ol buluk, nao hem i se: “?Wanem i rong long ol man ya? ?From wanem oli stap krae?” Ale oli talemaot ol tok we ol man Jabes oli talem.
6 Taem Sol i harem ol tok ya, spirit blong God i givim paoa long hem+ nao hem i kros bitim mak.
7 Ale hem i tekem tu bul mo i katkatem tufala long ol smosmol pis, mo i givim long ol mesenja, blong oli karem i go long olgeta teritori blong Isrel. Mo olgeta ya oli talem long ol man se: “!Man we i no wantem folem Sol mo Samuel, bambae oli mekem samting ya long ol buluk blong hem!” Nao ol man oli fraet long Jehova mo olgeta evriwan oli kamaot we oli gat wan tingting nomo.
8 Biaen hem i kaontem olgeta long Besek, mo i gat 300,000 man Isrel mo 30,000 man Juda.
9 Nao oli talem long ol mesenja we oli bin kam long Jabes, se: “Hemia tok we yufala i mas talem long ol man Jabes long Gilead: ‘Tumoro long medel dei,* bambae mifala i sevem yufala.’” Ale ol mesenja oli kambak mo oli talemaot tok ya long ol man Jabes, mo evriwan oli glad tumas.
10 Nao ol man Jabes oli talem long ol man Amon se: “Tumoro bambae mifala i sarenda long yufala, mo yufala i save mekem eni samting long mifala olsem we yufala i wantem.”+
11 Long nekis dei taem ples i tudak* yet, Sol i seraotem ol man i go long tri grup, nao oli go insaed long medel blong kamp blong ol man Amon, ale oli kilim i ded ol man Amon+ gogo kasem we san i strong. Mo olgeta we oli no ded, oli ronwe mo oli ron wanwan olbaot.
12 Nao ol man oli talem long Samuel se: “Wehem ol man ya we oli stap talem se: ‘?Sol nao bambae i kam king blong yumi?’+ Yu tekem olgeta oli kam, bambae mifala i kilim olgeta oli ded.”
13 Be Sol i talem se: “I no gat man bambae i ded tede,+ from we tede Jehova i sevem ol man Isrel.”
14 Biaen Samuel i talem long ol man se: “Yufala i kam, yumi go long Gilgal+ blong talemaot bakegen se Sol i king.”+
15 Ale olgeta evriwan oli go long Gilgal, mo long ples ya oli mekem Sol i king long fored blong Jehova. Biaen oli mekem sakrefaes blong pis long fored blong Jehova,+ mo Sol wetem evri man Isrel oli mekem lafet we oli glad we oli glad.+
Ol futnot
^ NT: “wan agrimen.”
^ PT: “Gibea blong Sol.”
^ PT: “taem san i strong.”
^ Hemia samwe 2 klok long moning kasem 6 klok long moning.
