Fas Samuel 18:1-30
18 Stret afta we Deved i toktok wetem Sol, Jonatan+ mo Deved tufala i kam gudfala fren, mo Jonatan i stat blong lavem Deved olsem we i lavem hem wan.+
2 Mo stat long dei ya, Sol i holemtaet Deved i stap wetem hem, mo hem i no letem Deved i gobak long haos blong papa blong hem.+
3 Mo Jonatan i lavem Deved olsem we hem i lavem hem wan,+ taswe hem mo Deved, tufala i mekem wan kontrak.+
4 Jonatan i tekemaot kot we hem i stap werem we i no gat han blong hem, nao i givim long Deved, wetem klos blong faet, naef blong faet, bonara, mo strap blong hem.
5 Nao Deved i stat blong go faet, mo taem Sol i sanem hem blong go faet, oltaem hem i stap win.*+ Ale Sol i putum hem blong i bos long ol man blong faet,+ mo hemia i mekem evri man wetem ol man blong wok blong Sol, oli glad.
6 Taem Deved wetem ol narafala soldia oli kilim ol man Filistia i ded mo oli stap kambak, ol woman long evri taon blong Isrel oli glad tumas, nao oli kamaot wetem ol tamborin+ mo ol lut,* mo oli singsing+ mo oli danis blong mitim King Sol.
7 Ol woman we oli stap danis oli singsing se:
“Sol i kilim taosen man oli ded,Mo Deved i kilim plante taosen moa.”+
8 Sol i kros tumas,+ mo hem i no glad long singsing ya, nao hem i talem se: “Oli leftemap Deved se hem i kilim plante taosen man, be mi, oli talem se mi kilim taosen man nomo. !Wan samting nomo we oli no mekem yet, hemia blong putumap hem i kam king!”+
9 Nao stat long dei ya i go, Sol i stap tingting nogud long Deved.
10 Long nekis dei, God i letem rabis tingting blong Sol i mekem hem i fraet,+ nao hem i stat blong mekem sam samting we i narakaen* insaed long haos, nao Deved i plei miusik long hap+ olsem we i stap mekem long ol narafala taem. Long taem ya, Sol i holem wan spia long han blong hem,+
11 nao hem i sakem spia ya,+ mo i stap tingting se: ‘!Bambae mi sperem Deved i go fas long wol!’ Be Deved i ronwe long hem tu taem.
12 Nao Sol i fraet long Deved, from we Jehova i stap wetem hem+ be i no stap wetem Sol.+
13 Ale Sol i no moa letem Deved i stap wetem hem, be i putumap hem blong i kam lida blong taosen man, mo Deved i lidim ol soldia blong hem blong oli go faet.+
14 Mo Deved i stap win+ long evri samting we hem i mekem,* mo Jehova i stap wetem hem.+
15 Mo taem Sol i luk se hem i stap wingud, hem i fraet long hem.
16 Be olgeta man Isrel mo long Juda oli lavem Deved, from we hem i stap lidim olgeta long ol faet.
17 Biaen Sol i talem long Deved se: “Hemia fasbon gel blong mi Merab.+ Bambae mi givim hem blong i kam waef blong yu.+ Be yu mas gohed blong gat strong tingting mo faet long ol faet blong Jehova.”+ Sol i talem olsem from we hem i stap tingting se: ‘I no mi we bambae mi kilim hem i ded, be ol man Filistia nao bambae oli kilim hem i ded.’+
18 Nao Deved i talem long Sol se: “Mi mi no wan haeman mo ol famle blong papa blong mi long Isrel oli no haeman. ?Mi mi hu blong king i kam palika blong mi?”+
19 Be bifo long taem ya we Sol i sud givim gel blong hem Merab long Deved, hem i givim Merab blong i kam waef blong Adriel,+ we i wan man Mehola.
20 Nao Mikal+ we i gel blong Sol, hem i laekem Deved, mo Sol i glad taem i harem samting ya.
21 Ale Sol i talem se: “Bambae mi givim gel ya long Deved olsem wan trap blong hem, blong ol man Filistia oli kilim hem i ded.”+ Nao Sol i talem seken taem long Deved se: “Tede bambae yumitu mekem wan agrimen blong mared.”
22 Biaen Sol i talem long ol man blong wok blong hem se: “Yufala i go talem kwaet nomo long Deved se, ‘!Yu luk! King i glad tumas long yu, mo olgeta man blong wok blong hem oli laekem yu. Taswe, i gud yutufala i mekem wan agrimen blong mared.’”
23 Taem ol man blong wok blong Sol oli talemaot samting ya long Deved, Deved i talem se: “?Yufala i ting se i wan smol samting ya blong man i mekem wan agrimen blong mared wetem king? !Mi mi pua mo mi no gat nem!”+
24 Nao ol man blong wok blong Sol oli talemaot tok ya long Sol, mo oli se: “Hemia nao ol tok we Deved i talem.”
25 Nao Sol i talem se: “Hemia tok we bambae yufala i talem long Deved: ‘King i no wantem se yu pem gel blong hem,+ be hem i wantem 100 skin+ blong tabu pat blong ol man Filistia, blong givimbak samting we ol enemi blong hem oli bin mekem.’” Sol i mekem plan ya, blong ol man Filistia oli kilim Deved i ded.
26 Ale ol man blong wok blong hem oli talemaot ol tok ya long Deved, mo Deved i glad blong mekem wan agrimen blong mared, wetem king.+ Be bifo long samting ya,
27 Deved wetem ol man blong hem oli go kilim i ded 200 man Filistia, mo Deved i tekem skin blong tabu pat blong olgeta evriwan mo i go givim long king blong mekem wan agrimen blong mared, wetem hem. Ale Sol i givim gel blong hem Mikal blong i kam waef blong Deved.+
28 Nao Sol i luksave se Jehova i stap wetem Deved,+ mo se gel blong hem Mikal i laekem Deved.+
29 Samting ya i mekem Sol i fraet tumas long Deved, mo hem i kam enemi blong Deved long ful laef blong hem.+
30 Taem ol prins blong Filistia oli go blong faet, oltaem Deved i stap winim olgeta* i bitim ol narafala man blong wok blong Sol,+ nao plante man oli tinghae long nem blong hem.+
Ol futnot
^ NT: “mekem evri samting long waes fasin.”
^ Hemia wan instramen blong miusik we i olsem gita be hem i gat tri string nomo.
^ NT: “mekem olsem wan profet.”
^ NT: “mekem evri samting long waes fasin.”
^ NT: “mekem evri samting long waes fasin.”
