Fas Samuel 19:1-24
19 Biaen Sol i talem long ol man blong wok blong hem mo boe blong hem Jonatan, se bambae hem i kilim Deved i ded.+
2 Be from we Jonatan, boe blong Sol, i laekem Deved tumas,+ hem i talem long Deved se: “Papa blong mi Sol, i wantem kilim yu yu ded. Plis, tumoro moning yu mas lukaot gud, mo yu go long wan ples blong haed mo yu stap ya.
3 Bambae mi go wetem papa blong mi klosap long ples we yu stap long hem, mo bambae mi stanap klosap long hem. Nao bambae mi tokbaot yu long papa blong mi, mo sipos mi harem sam samting, bambae mi talemaot long yu.”+
4 Ale Jonatan i toktok long papa blong hem Sol, mo i tokbaot ol gudfala samting we Deved+ i bin mekem. Hem i talem se: “King, yu no mas mekem sin agens long man blong wok blong yu Deved, from we hem i no mekem sin agens long yu, mo ol samting we hem i mekem i blong givhan long yu.
5 Hem i putum laef blong hem long denja blong kilim man Filistia ya i ded,+ nao Jehova i mekem se ol man Isrel oli winim faet.* Yu yu luk samting ya mo yu glad tumas. Taswe, ?from wanem yu wantem mekem sin agens long Deved we i no mekem wan rong samting? ?From wanem yu wantem kilim hem i ded blong nating nomo?”+
6 Nao Sol i lesin long Jonatan, mo hem i mekem wan strong promes se: “Long nem blong Jehova we i laef i stap, bambae mi mi no kilim Deved i ded.”
7 Biaen Jonatan i singaot Deved mo i talemaot evri samting long hem. Ale hem i tekem Deved i go long Sol, mo Deved i gohed blong mekem wok blong Sol olsem fastaem.+
8 Biaen ol man Filistia oli kam bakegen blong mekem faet, nao Deved i go faet agensem olgeta we i meksavegud olgeta mo i kilim plante long olgeta oli ded, nao ol man Filistia oli ronwe long hem.
9 Taem Sol i stap sidaon insaed long haos blong hem mo i holem spia blong hem, Jehova i letem rabis tingting i kam long hem.+ Long taem ya, Deved i stap plei miusik long hap.+
10 Nao Sol i traem blong sperem Deved i go fas long wol, be Deved i kamaot nao spia i go fas long wol. Ale Deved i ronwe mo long naet ya hem i aot.
11 Biaen Sol i sanem sam man blong oli go wajem haos blong Deved, mo blong oli kilim hem i ded long moning.+ Be waef blong Deved Mikal i talem long Deved se: “Sipos yu no ronwe long naet ya, tumoro bambae yu ded.”
12 Kwiktaem nomo Mikal i mekem Deved i gotru long windo mo i slakem hem i godaon blong hem i save ronwe mo aot long ples ya.
13 Biaen Mikal i tekem aedol ya terafim* mo i putum long bed, mo i karem wan net we oli wokem long hea blong nani, i putum long ples we Deved i stap pilo long hem, mo i kavremap aedol ya long wan kaliko.
14 Nao Sol i sanem ol man blong oli go tekem Deved i kam, be Mikal i talem se: “Deved i sik.”
15 Ale Sol i sanem olgeta bakegen mo i talem se: “Yufala i go karem hem wetem bed blong hem i kam, blong mi kilim hem i ded.”+
16 Taem ol man ya oli kam insaed long haos, aedol ya terafim* i stap long bed mo net we oli wokem long hea blong nani i stap long ples we Deved i stap pilo long hem.
17 Nao Sol i talem long Mikal se: “?From wanem yu trikim mi olsem, mo yu letem enemi blong mi+ i ronwe?” Ale Mikal i talem se: “Hem nao i talem long mi se, ‘!Yu letem mi mi go, sipos no bambae mi kilim yu yu ded!’”
18 Nao Deved i ronwe mo i go luk Samuel long Rama,+ mo hem i talemaot evri samting we Sol i mekem long hem. Biaen hem mo Samuel i aot mo tufala i go stap long Naeot.+
19 Biaen, sam man oli talem long Sol se: “!Yu luk! Deved i stap long Naeot long Rama.”
20 Nao kwiktaem nomo Sol i sanem sam man blong oli go holem Deved. Be taem oli kasem longwe, ol olfala profet oli stap talemaot ol profet tok mo Samuel i stanap mo i lidim olgeta. Taem ol man ya oli luk ol profet ya, spirit blong God i kam long olgeta, nao olgeta tu oli mekem olsem ol profet.
21 Taem oli talemaot samting ya long Sol, kwiktaem nomo hem i sanem sam man bakegen oli go, be olgeta tu oli mekem olsem ol profet. Nao Sol i sanem sam man bakegen oli go, hemia namba 3 grup we hem i sanem, be olgeta ya tu oli mekem olsem ol profet.
22 Ale hem tu i go long Rama. Taem hem i kasem bigfala hol blong wota we oli digim long Seku, hem i askem long ol man se: “?Wehem Samuel mo Deved?” Nao oli talem se: “Tufala i stap long Naeot+ long Rama.”
23 Taem Sol i aot long ples ya mo i stap wokbaot i go long Naeot long Rama, spirit blong God i kam long hem, nao hem tu i stap mekem olsem ol profet gogo kasem we hem i kamtru long Naeot long Rama.
24 Mo tu, hem i tekemaot ol klos blong hem mo i stap mekem olsem ol profet long fes blong Samuel. Mo hem i slip neked* long ples ya fuldei mo fulnaet. Hemia nao from wanem ol man oli talem se: “?Sol tu i wan profet?”+
