Fas Leta i go long Tesalonaeka 2:1-20
2 Ol brata. Yufala i save we long taem ya we mifala i kam visitim yufala, visit blong mifala i no blong nating, i gat frut blong hem.+
2 Yufala i save we long Filipae, ol man oli mekem mifala i safa, mo oli mekem i nogud long mifala.+ Be nating se i olsem, God i mekem tingting blong mifala i strong* blong mifala i kam talemaot gud nius blong hem long yufala,+ long fes blong plante man we oli agens.*
3 Ol advaes we yufala i harem long mifala, oli no kamaot long sam krangke tingting no long sam tingting we i doti, mo mifala i no traem blong trikim yufala,
4 be God i luklukgud long laef blong mifala, mo hem i luk se mifala i stret blong talemaot gud nius ya, taswe mifala i toktok blong mekem God ya we i stap luklukgud long hat blong mifala, i glad, be i no blong mekem man i glad.+
5 Yufala i save se taem mifala i kam luk yufala, mifala i neva tok swit long yufala, mo mifala i neva kam luk yufala from we mifala i kavetem sam samting blong yufala, nogat.+ !God i witnes se tok ya i tru!
6 Mo mifala i no traem blong mekem ol man oli givim glori long mifala, nomata se yufala no ol narafala man. Be mifala i aposol blong Kraes, taswe sipos mifala i wantem, mifala i save mekem yufala i spenem mane blong yufala blong givhan long mifala, nao mifala i kam wan baden long yufala.+
7 Be mifala i mekem i defren, mifala i kaen long yufala olsem wan mama we i stap fidim bebi blong hem we hem i lavem tumas.
8 Mifala i lavem yufala tumas, taswe mifala i glad blong talemaot gud nius blong God long yufala mo blong givim laef* blong mifala, blong givhan long yufala.+ Mifala i mekem olsem from we yufala i kam ol fren we mifala i lavem tumas.+
9 Ol brata, yufala i save finis se mifala i stap wok had mo mifala i stap taetem bun blong mifala. Mifala i wok long dei mo long naet, blong mekem se taem mifala i talemaot gud nius blong God long yufala, bambae yufala i no spenem mane blong yufala blong givhan long mifala, olsemia mifala i no kam wan baden long yufala.+
10 Yufala i witnes blong mifala, mo God tu i witnes blong mifala se fasin we mifala i mekem long yufala ol man blong bilif, hem i tabu, i stret gud, mo i no gat poen long hem.
11 Yufala i savegud we mifala i stap gohed blong toktok blong pulum yufala evriwan, mo mifala i stap leftemap tingting blong yufala evriwan, mo mifala i stap givim advaes long yufala evriwan,+ stret olsem wan papa+ i stap mekem long ol pikinini blong hem.
12 Mifala i mekem olsem blong yufala i gohed blong wokbaot stret olsem we God i wantem.+ God ya i stap singaot yufala blong yufala i kam long Kingdom blong hem,+ mo glori blong hem.+
13 Taswe mifala i talem tangkiu long God evritaem,+ from we taem mifala i talemaot tok blong God long yufala, yufala i akseptem. Yufala i no tekem olsem we i tok blong man nomo, be yufala i kasemgud se hem i tok blong God. Tok ya i stap wok tu long laef blong yufala ya we i bilif.
14 Ol brata, yufala i stap folem fasin blong ol kongregesen blong God long Judia we i joen wetem Kraes Jisas, from we ol man ples blong yufala oli spolem yufala+ stret olsem we ol man Jiu oli stap spolem olgeta long Judia.
15 Olgeta ya oli kilim Masta Jisas+ mo ol profet mo oli stap ronem mo kilim yumi.+ Mo oli no stap mekem God i glad, be oli agensem samting we i save givhan long ol man.
16 Oli mekem olsem taem oli traem blong blokem mifala blong mifala i no toktok long ol man blong ol narafala nesen, blong God i sevem olgeta.+ Long fasin ya, oltaem oli stap ademap sin blong olgeta. Be saye, kros blong God i kasem olgeta.+
17 Ol brata, taem ol man oli fosem mifala blong lego yufala blong smoltaem, (mifala i no stap wetem yufala, be hat blong mifala i stap wetem yufala), mifala i mekem evri samting we mifala i naf blong mekem, blong kam luk yufala from we mifala i wantem tumas blong luk yufala* bakegen.
18 Taswe mifala i wantem kam luk yufala, yes, mi Pol, mi traem tu taem finis, be Setan i stap blokem rod blong mifala.
19 ?Yufala i ting se mifala i putum tingting blong mifala long wanem? ?Wanem samting i mekem mifala i stap glad? ?Wanem praes* we mifala i save flas from long fes blong Masta blong yumi Jisas, long taem we hem i stap?* Yufala ya nao.+
20 Yes, yufala ya nao i mekem mifala i kasem glori mo mifala i glad.
Ol futnot
^ NT: “mekem mifala i no fraet.”
^ MNT: “we mifala i traehad bitim mak.”
^ NT: “sol.”
^ PT: “luk fes blong yufala.”
^ PT: “hat blong king.”
