Seken Buk Blong Ol King 12:1-21
12 Long namba 7 yia blong rul blong Jehu,+ Jehoas+ i kam king, mo hem i rul long Jerusalem blong 40 yia. Nem blong mama blong hem Jibiah, mo hem i blong Bereseba.+
2 Jehoas i gohed blong mekem samting we i stret long ae blong Jehova long olgeta taem ya we pris ya Jehoeada i stap givim advaes long hem.
3 Be ol hae ples blong wosip+ oli stap nomo, mo ol man oli gohed yet blong mekem sakrefaes mo mekem oli smok long ol hae ples ya.
4 Nao Jehoas i talem long ol pris se: “Yufala i go tekem olgeta mane we ol man oli tekem i kam long haos blong Jehova blong givim olsem ol tabu ofring,+ hemia mane we evri man oli mas givim,+ mane we oli givim blong pemaot wan man,* mo olgeta mane we hat blong man i pusum hem blong givim i go long haos blong Jehova.+
5 Bambae ol pris oli tekem mane ya long ol man we oli givim,* nao sipos sam samting long haos ya oli kam nogud,* bambae olgeta oli yusum mane ya blong riperem.”+
6 Be kam kasem namba 23 yia blong rul blong King Jehoas, ol pris oli no mekem wan samting nating blong riperem haos ya.+
7 Ale King Jehoas i singaot pris ya Jehoeada+ wetem ol narafala pris oli kam, mo i talem long olgeta se: “?From wanem yufala i no riperem haos ya? Naoia bambae yufala i no moa tekem mane long ol man we oli stap givim mane long yufala, bambae yufala i tekem nomo sipos i blong yusum blong riperem haos ya.”+
8 Nao ol pris oli agri se bambae oli no moa tekem mane long ol man mo se wok ya blong riperem haos ya bambae i no moa stap long han blong olgeta.
9 Nao pris ya Jehoeada i tekem wan bokis,+ i mekem wan hol long lid blong hem, mo i putum klosap long olta, long raetsaed blong man we i kam insaed long haos blong Jehova. Nao taem ol man oli tekem mane i kam long haos blong Jehova, ol pris we oli stap gad long doa oli putum ol mane ya insaed long bokis ya.+
10 Evritaem we oli luk se i gat plante mane insaed long bokis ya, sekretari blong king mo hae pris, tufala i kam tekem* ol mane ya we ol man oli tekem i kam long haos blong Jehova, mo tufala i kaontem olgeta.+
11 Biaen tufala i givim ol mane ya long olgeta we oli lukaot long ol wok we oli stap mekem long haos blong Jehova. Mo ol man ya oli yusum mane ya blong pem ol kapenta, ol man blong bildim haos we oli stap wok long haos blong Jehova,+
12 mo olgeta we oli stap wokem haos long ston mo oli stap katem ol ston. Mo tu, oli yusum mane ya blong pem ol timba mo ol ston we ol man oli katemrere finis blong riperem haos blong Jehova, mo oli yusum mane ya blong pem ol narafala samting we oli nidim blong wokem gud haos ya.
13 Be oli no yusum eni mane we ol man oli tekem i kam long haos blong Jehova, blong wokem ol besin long silva, ol sisis blong katem wik, ol bol, ol trampet,+ o blong wokem eni narafala samting long gol no silva blong putum long haos blong Jehova.+
14 Oli givim ol mane ya long olgeta ya nomo we oli mekem wok, mo olgeta ya oli yusum mane ya blong riperem haos blong Jehova.
15 Mo taem oli givim mane long olgeta ya, blong oli pem olgeta we oli wok, oli no stap jekem se oli yusum mane ya olsem wanem, from we oli trastem olgeta.+
16 Be mane we i blong ol ofring blong tekemaot fol blong man+ mo blong ol ofring blong sin, oli no tekem i kam long haos blong Jehova, hem i blong ol pris.+
17 Long taem ya nao, Hasael+ we i king blong Siria i go antap blong faet agensem Gat,+ mo hem i holemtaet taon ya, mo biaen hem i mekem plan blong go faet agensem* Jerusalem.+
18 Ale King Jehoas blong Juda i go tekemaot evri tabu ofring we ol olfala blong hem we oli king blong Juda, hemia Jehosafat, Jehoram, mo Ahasia, oli bin mekem i tabu, mo i tekem tu ol tabu ofring blong hem, wetem olgeta gol we oli stap long ples blong putumgud ol sas samting long haos blong Jehova mo long haos* blong king, mo i sanem evriwan i go long Hasael we i king blong Siria.+ Nao Hasael i gowe long Jerusalem.
19 Ol narafala stori blong Jehoas, mo olgeta samting we hem i mekem, oli raetemdaon long buk blong histri blong ol king blong Juda.
20 Be ol man blong wok blong Jehoas oli mekem plan blong agensem hem,+ nao oli kilim hem i ded long haos we i stap long Smol Hil,*+ long rod we i godaon long Sila.
21 Tufala wokman blong hem we nem blong tufala Josakara we i boe blong Simeat, mo Jehosabad we i boe blong Somere, tufala nao i kilim hem i ded.+ Mo oli berem hem wetem ol olfala blong hem long Taon Blong Deved, mo boe blong hem Amajia i kam king long ples blong hem.+
Ol futnot
^ NT: “sol.”
^ NT: “ol man we oli save.”
^ NT: “oli krak.”
^ NT: “fulumap long ol bag.” PT: “fasemtaet.”
^ PT: “Hasael i tanem fes blong hem blong i go agensem.”
^ NT: “pales.”
^ NT: “long Betmilo.”
