Seken Buk Blong Ol King 15:1-38
15 Long namba 27 yia blong rul blong King Jeroboam* blong Isrel, Asaria*+ i kam king.+ Hem i boe blong King Amajia+ blong Juda.
2 Hem i gat 16 yia taem hem i kam king, mo hem i rul long Jerusalem blong 52 yia. Nem blong mama blong hem Jekolia mo hem i blong Jerusalem.
3 Asaria i gohed blong mekem samting we i stret long ae blong Jehova, stret olsem we papa blong hem Amajia i bin mekem.+
4 Be ol hae ples blong wosip oli stap nomo,+ mo ol man oli gohed yet blong mekem sakrefaes mo mekem oli smok long ol hae ples ya.+
5 Nao Jehova i mekem se king ya i kasem leprosi, mo sik ya i stap long hem+ long ful laef blong hem. From samting ya, hem i stap hem wan long wan haos,+ mo boe blong hem Jotam+ i bos long evri samting long haos,* i stap jajem ol man long kantri ya.+
6 Ol narafala stori blong Asaria,+ mo olgeta samting we hem i mekem, oli raetemdaon long buk blong histri blong ol king blong Juda.
7 Biaen Asaria i go spel wetem ol olfala blong hem,+ mo oli berem hem wetem ol olfala blong hem long Taon Blong Deved. Mo boe blong hem Jotam i kam king long ples blong hem.
8 Long namba 38 yia blong rul blong King Asaria+ blong Juda, Sekaraea+ we i boe blong Jeroboam i kam king. Hem i stap long Sameria mo i rulum Isrel blong sikis manis.
9 Sekaraea i mekem samting we i nogud long ae blong Jehova, stret olsem we ol olfala blong hem oli bin mekem. Mo hem i no lego ol sin ya we Jeroboam we i boe blong Nebat, i bin pulum ol man Isrel blong mekem.+
10 Biaen Salum we i boe blong Jabes, i mekem wan rabis plan blong agensem hem, nao i kilim hem i ded+ long taon ya Jibleam,+ mo i kam king long ples blong hem.
11 Ol narafala stori blong Sekaraea, oli raetemdaon long buk blong histri blong ol king blong Isrel.
12 Hemia i mekem tok we Jehova i talemaot long Jehu i kamtru, we i se: “Fo jeneresen blong ol boe blong yu+ bambae oli sidaon long jea blong king blong rulum Isrel.”+ Mo hemia nao samting we i hapen.
13 Nao long namba 39 yia blong rul blong King Usia+ blong Juda, Salum we i boe blong Jabes i kam king, hem i stap long Sameria mo i rul wan fulmanis.
14 Biaen Menahem we i boe blong Gadi i aot long Tijaha,+ i kam long Sameria mo i kilim i ded Salum+ we i boe blong Jabes, biaen hem i kam king long ples blong hem.
15 Ol narafala stori blong Salum, mo rabis plan we hem i mekem, oli raetemdaon long buk blong histri blong ol king blong Isrel.
16 Long taem ya nao Menahem i aot long Tijaha, mo i kam spolemgud taon ya Tifsaha wetem olgeta samting we oli stap long hem, mo ol teritori blong hem. Hemia from we oli no wantem openem get blong olgeta long hem. Ale hem i spolem taon ya mo i splitim bel blong ol woman we oli gat bel long ples ya.
17 Long namba 39 yia blong rul blong King Asaria blong Juda, Menahem we i boe blong Gadi i kam king. Hem i stap long Sameria mo i rulum Isrel blong ten yia.
18 Mo long ful laef blong hem, hem i gohed blong mekem samting we i nogud long ae blong Jehova. Mo hem i no lego olgeta sin ya we Jeroboam we i boe blong Nebat i bin pulum ol man Isrel blong mekem.+
19 Taem King Pul+ blong Asiria i kam long kantri ya, Menahem i givim 1,000 talen* blong silva mane long hem, blong Pul i givhan long hem blong mekem kingdom blong hem i kam strong.+
20 Blong hivimap ol silva mane ya, Menahem i tekemaot 50 silva sekel* long evri rijman mo evri haeman long Isrel.+ Mo taem hem i givim ol silva mane ya long king blong Asiria, king ya i tanemraon mo i aot long kantri ya.
21 Ol narafala stori blong Menahem,+ mo olgeta samting we hem i mekem, oli raetemdaon long buk blong histri blong ol king blong Isrel.
22 Biaen Menahem i go spel wetem ol olfala blong hem, mo boe blong hem Pekahia i kam king long ples blong hem.
23 Long namba 50 yia blong rul blong King Asaria blong Juda, Pekahia we i boe blong Menahem i kam king long Sameria, mo i rulum Isrel blong tu yia.
24 Hem i gohed blong mekem samting we i nogud long ae blong Jehova. Mo hem i no lego ol sin ya we Jeroboam we i boe blong Nebat, i bin pulum ol man Isrel blong mekem.+
25 Biaen, Peka+ we i boe blong Remalia, mo i wan soldia we i stap givhan long king mo we king i trastem, hem i mekem wan rabis plan blong agensem king, nao i kilim hem i ded wetem Agob mo Arie long Sameria, long strong taoa long haos* blong king. I gat 50 man Gilead we oli stap wetem hem. Afta we Peka i kilim king i ded, hem i tekem ples blong hem i kam king.
26 Ol narafala stori blong Pekahia, mo olgeta samting we hem i mekem, oli raetemdaon long buk blong histri blong ol king blong Isrel.
27 Long namba 52 yia blong rul blong King Asaria blong Juda, Peka+ we i boe blong Remalia i kam king long Sameria, mo i rulum Isrel blong 20 yia.
28 Hem i gohed blong mekem samting we i nogud long ae blong Jehova. Mo hem i no lego ol sin ya we Jeroboam we i boe blong Nebat, i bin pulum ol man Isrel blong mekem.+
29 Long taem ya we King Peka i stap rul long Isrel, King Tiglatpilesa+ blong Asiria i kam insaed long kantri mo i holemtaet ol taon ya: Aeon, Abelbetmahaka,+ Janoa, Kedes,+ Hajoro, wetem ples ya Gilead,+ mo Galili, olgeta graon blong Naftali,+ mo hem i tekem ol man blong ol ples ya, oli go kalabus long Asiria.+
30 Nao Hosia+ we i boe blong Elaha, i mekem wan rabis plan blong agensem Peka we i boe blong Remalia, nao i kilim hem i ded. Mo hem i kam king long ples blong Peka long namba 20 yia blong rul blong Jotam+ we i boe blong Usia.
31 Ol narafala stori blong Peka, mo olgeta samting we hem i mekem, oli raetemdaon long buk blong histri blong ol king blong Isrel.
32 Long seken yia blong rul blong Peka we i boe blong King Remalia blong Isrel, Jotam+ we i boe blong King Usia+ blong Juda, i kam king.
33 Hem i gat 25 yia taem hem i kam king, mo hem i rul 16 yia long Jerusalem. Nem blong mama blong hem Jerusa, mo hem i gel blong Jadok.+
34 Jotam i gohed blong mekem samting we i stret long ae blong Jehova, stret olsem we papa blong hem Usia i bin mekem.+
35 Nating se i olsem, ol hae ples blong wosip oli stap nomo, mo ol man oli gohed yet blong mekem sakrefaes mo mekem oli smok long ol hae ples ya.+ Jotam nao i wokem Hae Get long haos blong Jehova.+
36 Ol narafala stori blong Jotam, mo ol samting we hem i mekem, oli raetemdaon long buk blong histri blong ol king blong Juda.
37 Long ol taem ya, Jehova i stat blong sanem Resin we i king blong Siria mo Peka+ we i boe blong Remalia, blong tufala i go faet agensem Juda.+
38 Biaen Jotam i go spel wetem ol olfala blong hem, mo oli berem hem wetem ol olfala blong hem long Taon Blong Deved we i wan bubu blong hem. Mo boe blong hem Ahas i kam king long ples blong hem.
Ol futnot
^ Hemia Jeroboam 2.
^ Hemia i minim “Jehova i Bin Givhan.” Long 2Ki 15:13; 2Kr 26:1-23; Aes 6:1; mo Sek 14:5, oli singaot hem se Usia.
^ NT: “lukaot long pales.”
^ NT: “pales.”
