Seken leta i go long Korin 4:1-18
4 Taswe, from we God i gat sore long mifala, nao hem i givim minista wok ya long mifala, mifala i no givap.
2 Mifala i lego ol fasin blong haed mo blong sem finis. Mifala i no mekem ol giaman fasin, mo mifala i no tanem tok blong God i kam narafala.+ Be long fes blong God, taem mifala i talemaot trutok long klia ples, mifala i soemaot wan gudfala eksampol long olgeta man, blong bambae long tingting blong olgeta, oli save glad long mifala.+
3 Sipos gud nius ya we mifala i stap talemaot, i olsem samting we i haed,* be i stap haed long olgeta ya nomo we oli stap lus.
4 Long olgeta ya, i gat sam man we oli no bilif, mo god blong sistem blong wol*+ ya i stap blaenem tingting blong olgeta,+ nao oli no save luk laet ya+ we i kamaot long nambawan gud nius blong Kraes we i pija blong God.+
5 Taem mifala i prij, mifala i no tokbaot mifala, be mifala i talemaot Jisas Kraes se hem i Masta mo se mifala i olsem slef blong yufala from nem blong Jisas.
6 God nao i talem se: “I gud laet i saenaot long tudak,”+ mo hem i mekem laet i kasem hat blong mifala blong mekem i saenaot.+ Laet ya hem i nambawan save blong God we mifala i luk long fes blong Kraes.
7 Be mifala ya we mifala i stap holem spesel wok ya, mifala i olsem ol graonpot we i gat ol gudgudfala samting+ insaed long olgeta.+ Taswe paoa ya we i bigwan bitim mak hem i blong God, i no blong mifala.+
8 Mifala i stap long medel blong ol trabol, be oli no fasem mifala we mifala i no save muvmuv. Tingting blong mifala i paspas, be mifala i save faenem rod yet blong kamaot.*+
9 Ol man oli ronem mo kilim mifala, be oltaem i gat man blong givhan long mifala.+ Oli sakem mifala i godaon long graon, be mifala i no ded.+
10 Long evri ples we mifala i go, mifala i fesem ded olsem Jisas,+ mo samting ya i soemaot se mifala i stap safa olsem hem.
11 Mifala ya we mifala i stap laef, mifala i stap fesem ded oltaem+ from nem blong Jisas, blong ol man oli save luk se mifala i safa olsem Jisas.
12 Olsem nao, mifala i stap fesem ded, nao yufala i kasem laef.
13 Long Baebol, oli raetem se: “Mi mi bilif, taswe mi toktok.”+ Mifala tu i soemaot se mifala i gat sem bilif ya, from samting ya mifala i toktok.
14 Mifala i save se Man ya we i mekem Jisas i laef bakegen, bambae i mekem mifala tu i laef bakegen wetem Jisas, mo bambae hem i tekem mifala wetem yufala, yumi evriwan yumi go stanap long fes blong hem.+
15 Olgeta samting ya oli blong givhan long yufala, blong God i save kaen long plante moa man from we plante moa man oli stap talem tangkiu long hem, mo long rod ya, oli stap givim glori long hem.+
16 From samting ya nao yumi no givap, mo nating se bodi blong yumi i stap kam nogud moa oltaem, be hat mo tingting blong yumi i stap kam niuwan evri dei.
17 Nomata se ol trabol ya we oli kasem yumi oli smol nomo, mo oli no save stap longtaem, be bambae oli mekem se yumi kasem wan glori we i bigwan tumas* mo we i no save lus samtaem.+
18 Be blong mekem olsem, yumi no mas tingbaot ol samting we yumi save luk long ae blong yumi, be yumi tingbaot ol samting we yumi no save luk.+ From we ol samting we yumi save luk oli blong smoltaem nomo, be ol samting we yumi no save luk, oli no save lus samtaem.
Ol futnot
^ NT: “i olsem wan samting we kaliko i haedem.”
^ MNT: “be tingting blong mifala i no foldaon.”
^ PT: “we i hevi.”
