Seken Buk Blong Kronikel 13:1-22
13 Long namba 18 yia blong rul blong King Jeroboam, Abaejah i kam king blong Juda.+
2 Hem i rul tri yia long Jerusalem, mo mama blong hem, nem blong hem Mikaea,+ we i gel blong Uriel blong Gibea.+ Mo i gat faet bitwin Abaejah wetem Jeroboam.+
3 Nao Abaejah i tekem 400,000 strong man blong faet we oli trengud,* ale oli go blong faet.+ Mo Jeroboam wetem 800,000 strong man blong faet we oli trengud,* oli stanap rere long ol grup blong faet agensem olgeta.
4 Nao Abaejah i stanap antap long Hil ya Jemaraem, we i stap long rijen blong ol hil blong Efrem, mo i talem se: “O Jeroboam mo olgeta man Isrel, yufala i lesin long mi.
5 Jehova we i God blong Isrel, i bin givim kingdom blong Isrel long Deved blong olwe,+ hem i givim long Deved wetem ol boe blong hem,+ mo hem i mekem olsem taem i mekem wan kontrak blong sol.*+ ?Yufala i no save?
6 Be Jeroboam+ we i boe blong Nebat, mo i man blong wok blong Solomon we i boe blong Deved, hem i girap mo i rebel agensem masta blong hem.+
7 Ol man we oli stap westem taem nomo, mo oli gud blong nating nomo, oli stap kam hivap raon long Jeroboam. Mo oli mekem hem i kam strong moa i winim Rehoboam we i boe blong Solomon. Long taem ya, Rehoboam i wan yangfala mo tingting blong hem i no strong, mo hem i no naf blong blokem olgeta.
8 “Mo naoia yufala i ting se yufala i save winim kingdom blong Jehova we i stap long han blong ol boe blong Deved, from we yufala i plante mo yufala i gat ol smol buluk ya long gol we Jeroboam i bin wokem blong oli kam ol god blong yufala.+
9 Yufala i bin ronemaot ol pris blong Jehova finis,+ hemia olgeta we oli kamaot biaen long Eron mo ol Livaet, mo yufala i putumap ol prapa pris blong yufala olsem we ol man blong ol narafala nesen oli stap mekem.+ Eni man we i kam wetem wan yang bul mo seven man sipsip, hem i save kam pris blong ol samting ya we oli no ol god.
10 Be long saed blong mifala, Jehova i God blong mifala,+ mo mifala i no lego hem. Ol pris blong mifala, hemia olgeta we oli kamaot biaen long Eron, olgeta oli stap mekem minista wok blong Jehova, mo ol Livaet oli stap givhan long olgeta.
11 Evri moning mo evri sapa, olgeta oli stap bonem ofring ya we i bon fulwan blong i smok i go long Jehova+ wetem insens ya we i gat gudfala smel blong hem.+ Mo ol bred we oli stakemap*+ oli stap antap long tebol we oli wokem long gol we i klin gud. Mo ples blong putum laet we oli wokem long gol,+ wetem ol laet blong hem, oli laetem evri sapa.+ Mifala i mekem olsem from we mifala i stap lukaot gud long ol wok we mifala i mekem blong God blong mifala Jehova. Be yufala i lego hem finis.
12 !Naoia yufala i luk! Tru God i stap wetem mifala, i stap lidim mifala, wetem ol pris blong hem we oli gat ol trampet blong blo long hem blong mifala i kam faet agensem yufala. O ol man Isrel, yufala i no faet agensem Jehova we i God blong ol olfala blong yufala, from we bambae yufala i no win.”+
13 Be Jeroboam i putum sam soldia blong oli haed mo go stap biaen long ol man Juda. Nao Jeroboam mo ami blong hem oli stap long fored blong ol man Juda, be ol soldia ya oli stap biaen long olgeta.
14 Nao taem ol man Juda oli tanem olgeta, oli luk we oli mas faet agensem ol soldia we oli stap long fored blong olgeta mo biaen tu. Nao oli stat blong krae i go long Jehova,+ mo long semtaem, ol pris oli blo long ol trampet.
15 Nao ol man Juda oli singaot bigwan blong faet, mo taem oli singaot bigwan blong faet, tru God i winim Jeroboam mo olgeta man Isrel long fored blong Juda mo Abaejah.
16 Nao ol man Isrel oli ronwe long fored blong Juda, mo God i putum olgeta long han blong Juda.
17 Abaejah wetem ol man blong hem oli kilim plante long olgeta oli ded, mo ol man Isrel oli gohed blong foldaon, hemia 500,000 man we oli trengud* blong faet.
18 Long fasin ya, ol man Isrel oli sem bigwan long taem ya, be ol man Juda oli kam strong from we oli dipen* long Jehova we i God blong ol olfala blong olgeta.+
19 Abaejah i gohed blong ronem Jeroboam mo i tekemaot ol bigfala taon ya long hem: Betel+ wetem ol taon we oli dipen* long hem, Jesana wetem ol taon we oli dipen long hem, mo Efren+ wetem ol taon we oli dipen long hem.
20 Mo Jeroboam i neva kasembak paoa blong hem bakegen long taem blong Abaejah. Biaen Jehova i kilim hem i ded.+
21 Be Abaejah i stap kam strong moa. Mo sam taem biaen hem i tekem 14 waef+ mo hem i kam papa blong 22 boe mo 16 gel.
22 Ol narafala samting long histri blong Abaejah, ol samting we hem i mekem mo ol tok blong hem, oli raetemdaon wetem ol tok blong profet Ido.+
Ol futnot
^ PT: “jusumaot olgeta.”
^ PT: “jusumaot olgeta.”
^ Hemia wan kontrak we i stap oltaem mo i no save jenis.
^ Hemia sobred.
^ PT: “jusumaot olgeta.”
^ PT: “lei.”
^ NT: “ol taon raonabaot.”
