Seken Buk Blong Kronikel 24:1-27
24 Jehoas i gat seven yia taem hem i kam king,+ mo hem i rul long Jerusalem blong 40 yia. Nem blong mama blong hem Jibiah, mo hem i blong Bereseba.+
2 Jehoas i gohed blong mekem samting we i stret long ae blong Jehova long olgeta taem ya we pris ya Jehoeada i laef i stap.+
3 Jehoeada i jusum tu waef blong Jehoas, nao hem i kam papa blong ol boe mo ol gel.
4 Biaen Jehoas i wantem tumas long hat blong hem blong wokem gud haos blong Jehova.+
5 Ale hem i singaot ol pris mo ol Livaet oli kam wanples, mo i talem long olgeta se: “Yufala i go long ol taon blong Juda, mo tekem ol mane we olgeta man Isrel oli givim evri yia blong riperem haos blong God blong yufala.+ Yufala i mas hariap blong mekem samting ya.” Be ol Livaet oli no kwik blong tekem aksen.+
6 Ale king i singaot lida ya Jehoeada i kam, mo i talem long hem se:+ “Moses we i man blong wok blong Jehova, i bin talem long kongregesen blong Isrel blong oli givim tabu takis, blong oli yusum long tent we ol tok blong God i stap insaed long hem.+ ?From wanem yu no talem long ol Livaet blong oli go long Juda mo Jerusalem blong karem tabu takis ya i kam?+
7 Bifo, ol boe blong rabis woman ya Atalia+ oli go stil long haos blong tru God,+ nao oli yusum olgeta tabu samting blong haos blong Jehova blong mekem wosip long ol Bal.”
8 Nao folem oda blong king, olgeta oli wokem wan bokis+ mo oli putum aotsaed, long get blong haos blong Jehova.+
9 Biaen, oli sanemaot wan tok i go long olgeta ples blong Juda mo Jerusalem, se oli mas tekem tabu takis i kam long Jehova.+ Hemia tabu takis ya we Moses, man blong wok blong tru God, i bin talem long ol man Isrel se oli mas givim, taem oli stap long draeples.
10 Olgeta prins mo olgeta man oli glad tumas,+ nao oli gohed blong karem ol kontribusen blong olgeta i kam mo putum insaed long bokis ya go kasem we i fulap.*
11 Evri taem we ol Livaet oli karem bokis blong go givim long king, mo oli luk se i gat plante mane insaed, sekretari blong king mo haeman we i givhan long jif pris, tufala i kam tekemaot ol mane ya long bokis+ mo oli go putumbak long ples blong hem. Hemia nao samting we oli mekem evri dei, mo oli hivimap plante mane.
12 Nao king wetem Jehoeada, tufala i givim ol mane ya long olgeta we oli stap lukaot long ol wok we oli stap mekem long haos blong Jehova, nao ol man ya oli yusum ol mane ya blong pem olgeta we oli stap katem ol ston, wetem ol man we oli gat gudhan blong wokem ol samting, blong oli wokem gud haos blong Jehova.+ Mo tu, oli pem ol man we oli gat gudhan blong wok long aean mo kopa, blong oli riperem haos blong Jehova.
13 Nao olgeta we oli stap lukaot long ol wok oli statem wok ya, nao wok ya i gohed gud aninit long han blong olgeta. Mo oli mekem haos blong tru God i kam gud bakegen mo oli mekem i kam strong.
14 Mo taem oli finisim wok ya, oli go givim haf mane we i stap, long king mo Jehoeada, mo tufala i yusum mane ya blong wokem ol samting blong haos blong Jehova, hemia ol samting blong mekem minista wok, mo blong mekem ol ofring, mo ol kap wetem ol samting we oli wokem long gol mo silva.+ Mo long taem ya we Jehoeada i laef i stap, oltaem oli stap mekem sakrefaes ya we i bon fulwan+ long haos blong Jehova.
15 Jehoeada i ded taem hem i olfala we i olfala, mo hem i gat wan gudfala laef. Hem i gat 130 yia taem i ded.
16 Nao oli berem hem long Taon Blong Deved wetem ol king,+ from we hem i mekem samting we i gud long Isrel,+ antap moa taem i respektem tru God mo haos blong Hem.
17 Afta we Jehoeada i ded, ol prins blong Juda oli kam bodaon long king, mo king i lesin long olgeta.
18 Olgeta oli lego haos blong Jehova we i God blong ol olfala blong olgeta, mo oli stat blong mekem wosip long ol tabu pos* mo long ol aedol, nao kros blong God i kam agensem Juda mo Jerusalem from sin ya we oli mekem.
19 Jehova i gohed blong sanem ol profet i go long olgeta blong tekem olgeta oli kambak long hem, mo ol profet ya oli gohed blong givim woning* long olgeta, be olgeta oli no wantem lesin.+
20 Nao spirit blong God i kam long Sekaraea we i boe blong pris ya Jehoeada,+ nao hem i stanap long wan ples we i hae, mo i talem long ol man se: “Hemia samting we tru God i talem: ‘?From wanem yufala i brekem ol komanmen blong Jehova? !Bambae yufala i no save win! From we yufala i lego Jehova, hem tu bambae i lego yufala.’”+
21 Be olgeta oli mekem plan blong agensem hem,+ nao oli stonem hem i ded long yad blong haos blong Jehova, folem oda blong king.+
22 Long rod ya, King Jehoas i no tingbaot lav we papa blong hem* Jehoeada i bin soemaot long hem, nao hem i kilim boe blong Jehoeada, mo bifo we hem i ded, hem i talem se: “I gud Jehova i lukluk long bisnes ya mo i panisim yu from.”+
23 Nao long stat blong yia,* ol ami blong Siria oli kam blong faet agensem Jehoas, nao oli kam insaed long Juda mo Jerusalem.+ Biaen oli kilim i ded olgeta prins+ blong ol man, mo oli holemtaet olting blong olgeta nao oli sanem i go long king blong Damaskes.
24 Nating se ami blong Siria we i kam, i smol nomo, be Jehova i putum bigfala ami blong Juda long han blong olgeta,+ from we oli lego Jehova we i God blong ol olfala blong olgeta. Long rod ya, olgeta* oli mekem jajmen blong God i kamtru long Jehoas.
25 Mo taem oli lego hem (hem i kasem bigfala kil* taem oli lego hem), ol man blong wok blong hem oli mekem plan agensem hem, from we hem i bin mekem blad blong ol boe* blong pris ya Jehoeada+ i ron. Ale oli kilim hem i ded long prapa bed blong hem.+ Nao hem i ded mo oli berem hem long Taon Blong Deved,+ be oli no berem hem long beregraon blong ol king.+
26 Ol man we oli mekem plan agensem hem,+ i gat Sabad we mama blong hem Simeat blong Amon, mo Jehosabad we mama blong hem Simrit blong Moab.
27 Long saed blong ol boe blong hem, mo ol tok blong God we i kam agensem hem plante taem,+ mo wok blong riperem* haos blong tru God,+ olgeta samting ya oli raetemdaon long Buk Blong Ol King. Mo boe blong hem Amajia i kam king long ples blong hem.
Ol futnot
^ MNT: “kasem we olgeta evriwan oli givim.”
^ NT: “witnes agens.”
^ Hemia papa blong Sekaraea.
^ PT: “Long stat blong niufala yia.”
^ Hemia ol man Siria.
^ NT: “plante sik.”
^ NT: “boe.” Maet tok ya “ol” i blong soem respek.
^ PT: “stanemap.”
