Seken Samuel 12:1-31
12 Ale Jehova i sanem Natan+ blong i go luk Deved. Natan i kam luk hem+ mo i talem long hem se: “I gat tu man we i stap long wan taon, wan i rij mo narawan i pua.
2 Man we i rij i gat plante sipsip mo buluk,+
3 be man we i pua i gat wan smol woman sipsip nomo we hem i pem.+ Hem i lukaot gud long sipsip ya, mo sipsip ya i gruap wetem ol pikinini blong hem. Smol kakae we hem i gat, hem i serem wetem sipsip ya, mo i mekem hem i dring long kap blong hem, mo i mekem hem i slip long han blong hem. Sipsip ya i kam olsem wan gel blong hem.
4 Biaen wan strenja i kam luk rijman ya, be rijman ya i no wantem kilim wan sipsip no wan buluk blong hem, blong mekemrere kakae blong strenja ya. Be hem i girap, i tekem smol sipsip blong pua man ya, i kilim mo i kukum blong strenja ya i kakae.”+
5 Nao Deved i kros tumas long rijman ya, mo i talem long Natan se: “!Long nem blong Jehova we i laef i stap,+ man we i mekem samting ya i mas ded!
6 Man ya i no gat sore, taswe hem i mas givim fo sipsip bakegen+ blong pembak smol sipsip ya.”
7 Ale Natan i talem long Deved se: “!Yu nao man ya! Hemia tok we Jehova, God blong ol man Isrel i talem: ‘Mi mi makemaot yu blong yu kam king blong ol man Isrel,+ mo mi tekemaot yu long han blong Sol.+
8 Mi mi glad nomo blong givim long yu evri samting blong masta blong yu+ mo ol waef blong hem,+ mo tu mi givim olgeta man Isrel mo Juda long yu.+ Mo sipos hemia i no naf, mi glad blong mekem sam moa samting blong yu.+
9 ?From wanem yu tanem baksaed long tok blong Jehova, taem yu mekem samting we i nogud long fes blong hem? !Yu yu kilim i ded Uria we i laen blong Het long naef blong faet!+ Mo afta we yu letem ol man Amon oli kilim hem i ded long naef blong faet,+ yu tekem waef blong hem blong i kam waef blong yu.+
10 Naoia long haos blong yu, oltaem bambae i gat trabol*+ from we yu tanem baksaed long mi taem yu tekem waef blong Uria we i laen blong Het, blong i kam waef blong yu.’
11 Hemia tok we Jehova i talem: ‘Bambae mi mekem trabol i kamaot long haos blong yu.+ Mo long fes blong yu, bambae mi tekem ol waef blong yu mo mi givim long wan narafala man,+ mo bambae hem i slip wetem olgeta long bigfala delaet.+
12 Yu yu mekem samting long fasin we i haed,+ be mi bambae mi mekem long fored blong olgeta man Isrel mo long bigfala delaet.’”
13 Nao Deved i talem long Natan se: “Mi mi mekem sin agens long Jehova.”+ Ale Natan i talem se: “Oraet, naoia Jehova i fogivim sin blong yu.*+ Bambae yu yu no ded.+
14 Be from we yu no respektem Jehova, boe blong yu we i jes bon bambae i ded.”
15 Nao Natan i gobak long haos blong hem.
Mo Jehova i kilim pikinini blong Deved we waef blong Uria i bonem, i mekem pikinini ya i sik.
16 Deved i askem strong long tru God blong i sevem boe ya. Mo hem i mekem fasting we i no kakae nating, mo long naet hem i ledaon long graon nomo.+
17 Ale ol elda long haos blong hem oli kam traem blong leftemap hem, be hem i no wantem girap mo i no wantem kakae wetem olgeta.
18 Nao long namba 7 dei, pikinini ya i ded, be ol man blong wok blong Deved oli fraet blong talemaot samting ya long Deved. Oli talem se: “Taem pikinini ya i laef yet, yumi toktok long hem be hem i no wantem lesin long yumi. ?Taswe olsem wanem bambae yumi talemaot long hem se pikinini ya i ded? I nogud hem i mekem wan samting we i no stret.”
19 Taem Deved i luk se ol man blong wok blong hem oli stap toktok smosmol long olgeta, hem i kasem save se pikinini ya i ded. Ale hem i askem long olgeta se: “?Pikinini ya i ded?” Nao oli ansa se: “Hem i ded.”
20 Nao Deved i girap long graon, i go swim, i rabem oel long hem,+ i jenisim ol klos blong hem, mo i go long haos+ blong Jehova, i bodaon blong ona long hem. Biaen hem i gobak long haos* blong hem mo i askem blong oli givim kakae long hem, mo hem i kakae.
21 Nao ol man blong wok blong hem oli askem long hem se: “?From wanem yu mekem olsem? Taem pikinini ya i laef yet, yu stap fasting mo yu stap krae, be taem hem i ded, wantaem nomo yu girap mo yu kakae.”
22 Nao Deved i talem se: “Taem pikinini ya i laef yet, mi mi mekem fasting+ mo mi stap krae from we mi stap tingting se: ‘Hu i save, maet Jehova bambae i sore long mi mo i letem pikinini ya i laef.’+
23 Naoia we hem i ded finis, ?from wanem bambae mi mekem fasting? Mi mi no save mekem hem i laef bakegen.+ Bambae mi joenem hem long ded,+ be hem bambae i no save kambak long mi.”+
24 Biaen Deved i leftemap tingting blong waef blong hem Batseba.+ Mo hem i slip wetem hem, nao biaen Batseba i bonem wan boe mo i putum nem blong hem se Solomon.*+ Mo Jehova i lavem Solomon,+
25 mo hem i sanem profet ya Natan+ blong i putum nem blong hem se Jedidia,* from we Jehova i lavem hem.
26 Joab i gohed blong faet agensem Raba+ we i taon blong ol man Amon,+ mo hem i holemtaet taon blong king.*+
27 Ale Joab i sanem sam man blong oli go talem long Deved se: “Mi mi faet agensem Raba,+ mo mi holemtaet taon blong wota.*
28 Naoia i gud yu tekem ol narafala soldia we oli stap, mo yu kam faet agensem taon ya mo holem. Sipos no, mi nao bambae mi holem taon ya, mo bambae oli leftemap mi from.”*
29 Ale Deved i hivimap ol narafala soldia we oli stap, mo hem i go faet agensem Raba mo i holemtaet.
30 Biaen hem i tekemaot hat blong king we i stap long hed blong Malkam. Hat ya oli wokem long gol mo hevi blong gol ya i wan talen,* mo i gat ol sas ston long hat ya, mo oli putum long hed blong Deved. Mo tu Deved i tekemaot plante narafala samting+ long taon ya.+
31 Mo hem i tekem ol man blong taon ya mo i mekem oli katem ol ston long so, oli wok wetem ol aean we oli sap, mo wetem akis we oli wokem long aean, mo oli mekem brikis. Hemia nao samting we hem i mekem long evri taon blong ol man Amon. Nao biaen Deved wetem olgeta soldia oli gobak long Jerusalem.
Ol futnot
^ PT: “naef blong faet.”
^ NT: “letem sin blong yu i go.”
^ NT: “pales.”
^ Hemia wan Hibru tok we i minim “Pis.”
^ Hemia i minim “Jehova i Lavem Hem.”
^ NT: “taon blong kingdom.”
^ Maet nem ya i blong tokbaot ol wota long taon ya.
^ PT: “bambae oli putum nem blong mi long hem.”
