Seken Samuel 9:1-13
-
Deved i soem lav long Mefiboset (1-13)
9 Nao Deved i talem se: “?I gat wan man long haos blong Sol i stap yet, we mi save soemaot long hem se mi lavem hem oltaem from samting we Jonatan i mekem long mi?”+
2 Nao i gat wan man blong wok blong Sol we nem blong hem Jiba.+ Ale oli singaot hem i kam long Deved, mo king i askem long hem se: “?Yu yu Jiba?” Hem i ansa se: “Mi mi man blong wok blong yu.”
3 Nao king i gohed i se: “?I gat wan man long haos blong Sol i stap yet, we mi save soemaot lav blong God long hem oltaem?” Mo Jiba i ansa se: “I gat wan boe blong Jonatan i stap yet, be tufala leg blong hem i nogud.”+
4 Nao king i askem se: “?Hem i stap wea?” Mo Jiba i ansa se: “Hem i stap long Lodebara, long haos blong Makiri+ we i boe blong Amiel.”
5 Ale kwiktaem nomo King Deved i sanem sam man, nao oli go long Lodebara, long haos blong Makiri we i boe blong Amiel, mo oli tekem hem i kam.
6 Taem Mefiboset, boe blong Jonatan we i boe blong Sol, i luk Deved, wantaem nomo hem i foldaon we fes blong hem i go long graon mo i ona long Deved. Ale Deved i talem se: “!Mefiboset!” Nao hem i ansa se: “Man blong wok blong yu hemia.”
7 Nao Deved i talem long hem se: “Yu no fraet, bambae mi soemaot long yu we mi lavem yu oltaem+ from samting we papa blong yu Jonatan i mekem, mo bambae mi givimbak long yu olgeta graon blong bubu blong yu Sol, mo oltaem bambae yu kakae long tebol blong mi.”+
8 Nao Mefiboset i bodaon blong ona long hem mo i se: “Mi mi man blong wok blong yu, mi olsem wan dog we i ded finis,+ be yu yu wantem mekem i gud long mi.”
9 Nao king i singaot Jiba we i man blong wok blong Sol, mo i talem long hem se: “Evri samting we i blong Sol mo evri samting we i blong famle blong hem, naoia mi givim long Mefiboset we i smol bubu blong masta blong yu.+
10 Mo yu wetem ol boe blong yu mo ol man blong wok blong yu, bambae yufala i wokem garen blong hem. Mo bambae yu tekemaot ol kakae blong garen ya mo yu givim long ol man blong Mefiboset, blong oli kakae. Be Mefiboset we i smol bubu blong masta blong yu, oltaem bambae hem i kakae long tebol blong mi.”+
Jiba i gat 15 boe mo 20 man blong wok blong hem.+
11 Nao Jiba i talem long king se: “Mi mi man blong wok blong yu, mo bambae mi mekem olgeta samting we masta mo king blong mi i talem.” Ale Mefiboset i stap kakae long tebol blong Deved* olsem we i wan stret pikinini blong king.
12 Mefiboset i gat wan smol boe blong hem we nem blong hem Mika.+ Mo olgeta man we oli stap long haos blong Jiba, oli kam ol man blong wok blong Mefiboset.
13 Mo Mefiboset i stap nomo long Jerusalem, from we oltaem hem i stap kakae long tebol blong king,+ mo tufala leg blong hem i nogud.+
Ol futnot
^ MNT: “mi.”
