Aesea 3:1-26
3 !Yufala i luk! Jehova komanda blong ol ami, we hem i tru Masta,I stap tekemaot olgeta samting we i stap sapotem mo givim kakae long ol man Jerusalem mo Juda,Yes, olgeta samting we i stap givim bred mo wota long olgeta,+
2 Strong man mo man blong faet,Jaj mo profet,+ man we i stap talemaot fiuja mo elda,
3 Lida we i lukaot long 50 man,+ impoten man, mo advaesa,Nambawan man blong mekem majik, mo man we i savegud fasin blong kwaetem snek.+
4 Bambae mi mekem ol yang boe oli kam prins blong olgeta,Mo ol man we oli stap jenisim tingting blong olgeta oltaem, oli rul long olgeta.
5 Ol man bambae oli stap mekem i strong long olgeta bakegen,Bambae oli stap mekem olsem long ol fren blong olgeta.+
Yang boe bambae i mekem nogud long ol olfala,Mo man we ol narafala oli luklukdaon long hem, bambae i no wantem obei long man we ol narafala oli respektem hem.+
6 Ol man ya wanwan bambae oli go long haos blong papa blong olgeta, oli holem brata blong olgeta mo oli talem se:“Yu yu gat wan longfala kot, yu kam komanda blong yumi.
Yu kam lukaot long ol hip samting ya we ol man oli brekemdaon olgeta i stap.”
7 Be long dei ya, bambae hem i tok agensem olgeta i se:“Bambae mi mi no man blong fasem soa blong yufala.*Mi mi no gat kakae o klos long haos blong mi.
Yufala i no mekem mi mi kam komanda blong ol man.”
8 Jerusalem i stambol finis,Mo Juda i foldaon finis,From we ol man blong ples ya oli agensem Jehova long ol toktok mo fasin blong olgeta.
Hem i hae we i hae, be olgeta oli stap mekem ol samting we i nogud long fes blong hem.+
9 Fes blong olgeta i olsem wan witnes we i talemaot poen agensem olgeta bakegen,Mo oli talemaot sin blong olgeta olsem ol man Sodom oli mekem,+Oli no traem blong haedem nating.
!Sore tumas long olgeta,* from we oli stap singaot trabol i kam long olgeta nomo!
10 Yufala i talem long ol stret man se laef blong olgeta bambae i stap gud,Bambae oli kasem blesing from samting we oli mekem.*+
11 !Sore tumas long man nogud!!Bambae trabol i kasem hem,From we ol samting ya we hem i mekem, bambae ol man oli mekem long hem tu!
12 Long saed blong ol man blong mi, ol bos blong ol slef, oli stap mekem i strong tumas long olgeta,Mo ol woman oli rul long olgeta.
Ol man blong mi, ol lida blong yufala oli stap mekem yufala i wokbaot olbaot,Mo oli mekem yufala i konfius, nao yufala i no moa save stret rod blong yufala i folem.+
13 Jehova i stap rere blong talemaot ol poen we hem i gat agensem ol man,Hem i stanap rere finis blong jajem ol man.
14 Jehova bambae i mekem kot long ol elda mo ol prins blong ol man blong hem, i talemaot poen blong olgeta.
Hem i talem long olgeta se: “Yufala i bin bonem plantesen blong grep,Mo ol samting we yufala i bin stilim long ol puaman, oli stap long haos blong yufala.”+
15 Hae Masta, Jehova komanda blong ol ami, i talem tu se: “I no stret nating we yufala i spolem ol man blong mi,Mo yufala i mekem i strong tumas long ol puaman, olsem we man i granem fes blong olgeta i sakem long doti.”+
16 Jehova i talem se: “From we ol woman Saeon oli flas tumas,Oli stap wokbaot we hed blong olgeta i stap antap nomo,*Oli stap pulum narafala wetem ae blong olgeta, oli stap jamjam i go olsem we oli stap danis,Nao ol samting we i stap long leg blong olgeta oli stap mekem noes,
17 Jehova bambae i mekem soa i kavremapgud hed blong ol woman Saeon tu,Mo Jehova bambae i mekem se i no gat hea long fored blong hed blong olgeta.+
18 Long dei ya Jehova bambae i tekemaot ol samting we i flasem leg blong olgeta,Mo ol samting blong putum long hed, mo ol flas samting we sep blong olgeta i olsem niu mun,+
19 Ol iaring,* ol braslet, mo ol kaliko blong kavremap fes,
20 Ol samting blong flasem hed, ol jen blong leg, mo ol flas strap,Ol botel senta* mo ol naes jen we oli joen wetem gudlak mo badlak,*
21 Ol ring blong fingga mo ol ring blong nus,
22 Ol dres blong werem long spesel lafet, ol longfala dres, ol longfala kot, mo ol paos,
23 Ol mira we oli gat handel,+ mo ol klos we oli wokem long linen,*Ol kaliko blong fasem hed, mo ol kaliko blong blokem fes.
24 Oli sud smel gud olsem balsam oel,+ be bambae oli smel nogud,Oli sud yusum wan strap, be bambae oli yusum wan ropOli sud mekem naes stael long hea blong olgeta, be bambae oli bolhed,+Oli sud werem wan sas klos, be bambae oli werem klos we oli wokem long bag,+Mo bodi blong olgeta i sud naes, be bambae i gat wan mak* long hem.
25 Ol man blong yu bambae oli ded long naef blong faet,Mo ol strong man blong yu bambae oli ded long faet.+
26 Taon ya i olsem wan woman. Ol doa blong hem blong kam insaed, bambae oli harem nogud oli krae we oli krae,+Mo bambae hem i sidaon i stap long graon, we hem i no moa gat wan samting.”+
Ol futnot
^ NT: “no man blong mekem soa blong yufala i kam gud bakegen.”
^ NT: “sol blong olgeta.”
^ PT: “Bambae oli kakae frut blong ol samting we oli mekem.”
^ PT: “we oli mekem nek (trot) blong olgeta i longfala.”
^ NT: “Ol flas samting we oli hang long ol jen.”
^ PT: “Ol haos blong sol.”
^ NT: “ol naes nekles we oli wokem long sel.”
^ NT: “ol smol klos we man i werem insaed long klos.”
^ Hemia wan mak we oli bonem long bodi blong wan slef no wan prisena.
