Aesea 34:1-17
34 Ol nesen, yufala i kam klosap, yufala i harem,Mo yufala ol man, yufala i lesin gud.
I gud wol ya mo olgeta samting we i stap long hem, oli lesin,Hemia graon mo evri samting we i kamaot long hem.
2 From we Jehova i kros tumas long olgeta nesen,+Mo hem i letem kros blong hem i go agensem ol ami blong olgeta.+
Bambae hem i flatem olgeta evriwan,Bambae hem i givim olgeta i go long man we i stap kilim man i ded.+
3 Bambae oli sakemaot dedbodi blong olgeta,Mo smel blong ol dedbodi blong olgeta, bambae i go antap,+Blad blong olgeta bambae i mekem ol bigfala hil oli melt.*+
4 Ol ami blong heven bambae oli roten oli lus,Mo bambae oli rolemap heven, olsem we oli rolem skrol.
Ol ami olbaot long heven bambae oli kam slak,Olsem wan lif blong grep we i slak gogo i foldaon,Mo olsem wan frut blong figtri we i slak gogo i drae.
5 “From we naef blong faet blong mi long heven, bambae i wetwet gud.+
Bambae i kamdaon long Edom blong mekem jajmen,+Long ol man we mi plan finis blong kilim olgeta oli ded.
6 Jehova i gat wan naef blong faet. Bambae blad i kavremap gud.+
Bambae i fulap gud long gris,Mo long blad blong ol yang man sipsip mo ol nani,Mo long gris blong kidni blong man sipsip.
From we Jehova i mekem wan sakrefaes long Bojeraha,Yes, hem i kilim plante man oli ded long kantri blong Edom.+
7 Ol wael bul bambae oli godaon wetem olgeta,Ol yang bul wetem olgeta we oli strong.
Graon blong olgeta bambae i wetwet gud long blad,Mo das blong olgeta bambae i fulap gud long gris.”
8 From we Jehova i makemaot finis wan dei blong givimbak,+Mo wan yia blong givim panis long bihaf blong Saeon, blong stretem bisnes blong hem.+
9 Ol reva blong woman* ya bambae oli jenisim i kam kolta,Mo das blong hem bambae i kam salfa,Mo graon blong hem bambae i kam olsem kolta we faea i stap bonem.
10 Bambae faea ya i no save ded long naet no long dei,Smok blong hem bambae i gohed blong go antap blong olwe.
Nating se ol jeneresen oli ded mo ol narawan oli bon i kam, be bambae taon ya i nogud i stap nomo,Bambae i no gat man i wokbaot i pastru bakegen long ples ya samtaem, gogo i no save finis.+
11 Ol pijin ya pelikan mo animol ya pokupaen* bambae oli tekem ples ya i blong olgeta,Mo ol hoknaet we sora blong olgeta i longfala mo ol reven bambae oli kam stap long ples ya.
Bambae hem i pulum teplaen i gokros long ples blong hem we i emti finisMo i pulum ledlaen* long hem, hemia ledlaen blong spolem olgeta samting.
12 Bambae i no gat wan haeman blong hem i kam king,Mo ol prins blong hem bambae oli kam olsem nating nomo.
13 Ol ropnil bambae oli gru long ol strongfala taoa blong hem,Ol plant ya nitel mo ol grasnil bambae oli gru long ol strong ples blong haed blong hem.
Bambae hem i kam hom blong wael dog ya jakol,+Mo bambae i kam fenis blong ol ostrij.
14 Ol animol blong draeples bambae oli kam mit wetem ol animol we oli stap singaot bigwan,Mo wael nani* bambae i stap singaot i go long fren blong hem.
Yes, pijin ya naetja bambae i kam stap long ples ya mo i mekem ples blong spel long ples ya.
15 Ara snek bambae i mekem nes blong hem mo i putum ol eg blong hem long ples ya,Mo bambae i brekem olgeta mo i hivimap olgeta aninit long sado blong hem.
Yes, bambae ol woman pijin ya kaet oli kam hivap long ples ya, we olgeta wanwan oli kam wetem fren blong olgeta.
16 Yufala i lukaotem long buk blong Jehova mo yufala i ridimaot long bigfala voes:Bambae i no gat wan long olgeta i lus,Bambae i no gat wan long olgeta i stap we i no gat fren,From we oda ya i kamaot long maot blong Jehova,Mo spirit blong hem nao i hivimap olgeta wanples.
17 Hem nao i Man ya we i bin sakem ol spesel ston long bihaf blong olgeta,Mo long prapa han blong hem, hem i makemaot ples we i blong olgeta.*Bambae oli tekem ol ples ya i blong olgeta blong olwe,Yes, bambae oli stap long ples ya long olgeta jeneresen we i kam.
Ol futnot
^ NT: “bambae i ron i kamdaon long ol bigfala hil.”
^ Hemia i minim Bojeraha, kapital blong Edom.
^ Hemia wan kaen rat we i gat ol nidil blong protektem hem. Long Inglis nem blong hem porcupine.
^ PT: “ol ston.”
^ MNT: “Mo ol dimon we oli luk olsem nani.”
^ PT: “hem i yusum teplaen blong seraotem ol ples ya long olgeta.”
