Aesea 43:1-28
43 Nao hemia tok blong Jehova,God We i Wokem yu, Jekob, mo Hem nao i mekem yu, Isrel. Hem i se:+“Yu no fraet, from we mi mi pembak yu finis.+
Mi mi singaot yu long nem blong yu.
Yu yu blong mi.
2 Taem yu pastru long ol wota, bambae mi stap wetem yu,+Mo taem yu pastru long ol reva, bambae oli no draonem yu.+
Taem yu pastru long faea, bambae faea i no bonem yu,Mo laet blong faea bambae i no kasem yu nating.
3 From we mi Jehova, mi God blong yu,Mi Tabu Man Blong Isrel, mi Sevia blong yu.
Mi mi givim Ijip finis olsem wan ransom* blong yu,Mi givim Itiopia mo Siba olsem jenis blong tekembak yu.
4 From we long ae blong mi, yu olsem wan sas samting,+Yu kasem ona, mo mi mi lavem yu.+
Taswe bambae mi givim ol man oli go blong tekem ples blong yu,Mo mi givim ol nesen i go olsem jenis blong laef* blong yu.
5 Yu no fraet, from we mi mi stap wetem yu.+
Bambae mi tekem ol pikinini* blong yu long is oli kamMo mi tekem yufala long wes i kam wanples.+
6 Bambae mi talem long not se: ‘!Yu lego olgeta oli kam!’+Mo mi talem long saot se: ‘!Yu no holemtaet olgeta!Yu tekem ol boe blong mi we oli stap longwe mo ol dota blong mi tu we oli stap long ol ples long en blong wol, oli kam,+
7 Yes, olgeta evriwan ol man oli stap singaot olgeta long nem blong mi,+Mo mi mi mekem olgeta blong mi kasem glori,Yes, mi nao mi wokem olgeta mo mi mekem olgeta.’+
8 Yu tekem ol man ya we oli gat ae, be oli blaen,Mo oli gat sora, be sora blong olgeta i fas, oli kam.+
9 I gud olgeta nesen oli hivap long wan ples,Mo i gud olgeta man oli kam joen wanples.+
?Hu long olgeta i save talem samting ya??Mo oli save mekem yumi harem ol faswan samting?*+I gud oli tekem ol witnes blong olgeta oli kam blong pruvum se oli stret,Mo i gud oli lesin mo oli talem se: ‘!Yes, hemia i trutok!’”+
10 Jehova i talem se: “Yufala i witnes blong mi,+Yes, yufala nao man blong wok blong mi we mi bin jusumaot,+Blong yufala i save mo bilif long* mi,Mo kasemsave se mi mi sem God ya nomo.+
Bifo long mi, i no gat wan God i stap,Mo afta long mi, i no gat wan narafala God.+
11 Mi mi Jehova,+ mo i no gat wan narafala sevia bakegen.”+
12 Jehova i talem se: “Long taem ya we i no gat wan god blong narafala kantri long medel blong yufala yet+Mi nao Man we i stap talemaot ol samting, i sevem ol man, mo i mekem ol man oli harem nius blong ol wok ya,Taswe yufala nao i witnes blong mi, mo mi nao mi God.+
13 Mo tu, oltaem mi mi sem Wan nomo.+
Mo i no gat wan man i save pulumaot eni samting long han blong mi.+
Taem mi tekem aksen, ?hu i save blokem?”+
14 Hemia tok blong Jehova, Man We i Pembak yufala+ mo i Tabu Man Blong Isrel i talem, i se:+“Bambae mi mekem wan samting from yufala, bambae mi sanem ol ami oli go long Babilon mo mi brekemdaon ol aean blong ol get,+Mo ol man Koldia we oli stap long ol sip blong olgeta, bambae oli krae from oli harem nogud.+
15 Mi mi Jehova, mi Tabu Man blong yufala,+ mi nao mi God We i Wokem Isrel,+ mo mi King blong yufala.”+
16 Hemia tok blong Jehova,Man ya we i mekem wan rod i pastru long solwotaMo tu i mekem wan rod tru long wota we i raf we i raf,+
17 Hem nao Man ya we i sakemaot wo jariot mo ol hos,+Wetem ol ami mo ol strong man blong faet. Hem i talem se:“Bambae oli ledaon mo oli no moa girap.+
Bambae oli ded, yes bambae oli ded olsem wik blong laet we i ded kwiktaem taem man i blo long hem.”
18 “Yufala i no mas tingbaot ol samting blong bifo,Mo yufala i no mas stap tingting long ol samting we oli pas finis.
19 !Yufala i luk! Mi mi stap mekem wan niufala samting,+Mo i stap kamtru naoia.
?Yufala i no luksave?Bambae mi mekem wan rod i pastru long draeples,+Mo ol reva oli ron krosem draeples.+
20 Ol wael animol blong open ples, wetem ol wael dog ya jakol mo ol ostrij,Bambae oli ona long mi,From we mi mi mekem se i gat wota long draeples,Mo ol reva long ples we i drae,+Blong ol man blong mi, yes, ol man ya we mi jusumaot olgeta finis,+ oli dring,
21 Ol man ya, mi mi wokem olgeta se oli blong miBlong oli save talemaot ol bigbigfala wok blong mi.+
22 Be yu yu no bin singaot i kam long mi, O Jekob,+From we yu kam taed long mi, O Isrel.+
23 Yu no bin karem sipsip i kam long mi blong mekem ol ofring blong yu we oli bon fulwan,Mo blong presem mi long ol sakrefaes blong yu.
Mi mi no fosem yu blong givim presen long mi,No mi mekem yu yu kam taed, from we oltaem mi stap askem frangkinsens long yu.+
24 Yu yu no pem ol swit waelken* long mane blong yu, blong givim long mi,Mo ol gris blong ol sakrefaes blong yu, oli no mekem mi mi harem gud.+
Be yu mekem mi mi hevi long ol sin blong yu,Mo yu mekem mi mi taed gud long ol rong blong yu.+
25 Mi, yes mi nao Man ya we i stap ravemaot ol sin* blong yufala,+ from nem blong mi,+Mo bambae mi no moa tingbaot ol sin blong yufala.+
26 Yufala i talem long mi bakegen sipos mi foget. I gud yumitu talemaot ol poen we yumitu gat agensem yumitu,Yu talem ol tok blong yu blong pruvum se yu stret.
27 Faswan olfala blong yu i mekem sin,Mo ol man we oli stap toktok long bihaf blong yu,* oli rebel agensem mi.+
28 Taswe bambae mi mekem ol prins blong holi ples, oli no moa tabu,Mo bambae mi letem Jekob i go blong trabol i spolem hem,Mo mi letem ol man oli tok nogud long Isrel.+
Ol futnot
^ NT: “sol.”
^ PT: “sid.”
^ Maet hemia i minim ol faswan samting we bambae oli kam long fiuja.
^ NT: “trastem.”
^ Hemia wan kaen waelken we i gat gudfala smel.
^ NT: “krangke fasin.”
^ Maet hemia i stap minim ol tija blong Loa.
