Aesea 49:1-26
49 Ol aelan, yufala i lesin long mi,Ol nesen we yufala i stap longwe, yufala i lesin gud.+
Bifo we mi mi bon,* Jehova i singaot mi finis.+
Taem mi stap yet long bel blong mama blong mi, hem i talemaot nem blong mi finis.
2 Hem i mekem maot blong mi olsem wan naef blong faet we i sap gud.
Hem i haedem mi long sado blong han blong hem.+
Hem i mekem mi mi olsem wan ara we oli polisim gud,Hem i haedem mi insaed long basket blong ara blong hem.
3 Hem i talem long mi se: “Isrel, yu yu man blong wok blong mi,+Bambae mi yusum yu blong soemaot ol gudgudfala samting we mi mekem.”+
4 Be mi talem se: “Mi mi wok had blong nating nomo.
Mi yusum ful paoa blong mi long wan samting we i no save kamtru, i blong nating nomo.
Be mi sua se Jehova nomo bambae i jajem mi,*Mo ol pei* blong mi i stap wetem God blong mi.”+
5 Mo naoia Jehova, hemia Man ya we i mekem mi mi kam olsem man blong wok blong hem, taem mi stap yet long bel blong mama blong mi,Hem i tokbaot mi se bambae mi tekem Jekob i kambak long hem,Blong mekem ol man Isrel oli save kam joen wetem hem.+
Bambae mi kasem ona long fes blong Jehova,Mo God blong mi bambae i kam olsem paoa blong mi.
6 Mo hem i talem se: “Yu yu man blong wok blong miBlong mekem ol traeb blong Jekob oli girap bakegen,Mo blong tekembak olgeta we oli laef i stap yet long Isrel, be hemia i no naf.
Mi mi mekem yu yu kam olsem laet blong ol nesen tu,+Blong mi save sevem ol man long olgeta ples long wol.”+
7 Hemia tok blong Jehova, Man ya we i pembak Isrel, mo i Tabu Man blong Isrel.+ Hem i talem long man ya we ol man oli lukluk rabis long hem,*+ mo long man ya we ol nesen oli no laekem hem nating, mo long man blong wok blong ol rula, i se:“Ol king bambae oli luk mo oli girap,Mo ol prins bambae oli bodaonFrom Jehova, we man i save trastem hem,+Mo i Tabu Man Blong Isrel we i jusumaot yu.”+
8 Hemia samting we Jehova i talem, i se:“Long taem blong kaen long man,* mi mi ansa long yu,+Mo long dei blong sevem man, mi mi halpem yu,+Mi mi gohed blong lukaot gud long yu, blong mekem yu yu kam olsem wan kontrak we mi mi mekem wetem ol man,+Blong mekem ol man oli go stap long graon ya bakegen,Mo blong mekem we oli tekem ol ples blong olgeta we oli stap nating nomo,+
9 Mo blong talem long ol prisena se: ‘!Yufala i kamaot!’+Mo long olgeta we oli stap long tudak+ se: ‘!Yufala i kamkamaot!’Bambae oli kakae ol samting long saed blong ol rod,Mo ol gras we oli gru folem ol rod ya we oli nogud finis,* bambae i blong olgeta.
10 Bambae oli no hanggri mo oli no tosta,+Mo hot blong san mo laet blong san bambae i no bonem olgeta.+
From we Man we i sore long olgeta bambae i lidim olgeta,+Mo bambae i lidim olgeta oli pas long ol ples we i gat springwota.+
11 Bambae mi mekem ol bigfala hil blong mi oli kam wan rod,Mo ol bigrod blong mi, bambae mi leftemap i kam antap.+
12 !Yu luk! Olgeta ya oli aot longwe oli stap kam,+!Mo yu luk! Oli aot long not mo long wes oli kam,Mo oli aot long ples ya Sinim oli kam.”+
13 Heven, yu glad yu singaot, mo wol, yu harem gud.+
I gud ol bigfala hil oli hapi, oli stap singsingaot from.+
From we Jehova i mekem ol man blong hem oli harem gud finis,+Mo hem i sore long ol prapa man blong hem we oli stap safa.+
14 Be Saeon i gohed blong talem se:“Jehova i lego mi finis,+ mo Jehova i fogetem mi finis.”+
15 ?Wan woman i save fogetem pikinini blong hem we i stap titi,Mo i no sore long pikinini blong hem we i kamaot long bel blong hem?Nating sipos ol woman ya oli fogetem pikinini blong olgeta, be mi bambae mi neva fogetem yu.+
16 !Yu luk! Mi mi raetem nem blong yu long han blong mi finis.
Ol wol blong yu, oli stap oltaem long fes blong mi.
17 Ol pikinini blong yu oli gobak kwiktaem.
Olgeta we oli brebrekemdaon yu, mo oli spolem gud yu, bambae oli ronwe long yu.
18 Yu lukluk i go antap mo yu lukluk raon.
Olgeta evriwan oli stap hivap wanples.+
Oli stap kam long yu.
Jehova i talem se: “Mi mi laef i stap, from samting ya,Olgeta ya bambae oli kam olsem ol flas samting we oli kavremap yu olsem wan klos,Mo bambae oli kam olsem ol flas samting we yu fasem long yu, olsem wan woman we i rere blong mared i mekem.
19 Nating se ol ples blong yu oli nogud finis mo oli stap nating nomo mo graon blong yu i kam nogud finis,+Naoia bambae i smol tumas, i no naf long olgeta we oli stap long hem,+Mo olgeta we oli solemdaon yu+ bambae oli stap longwe.+
20 Ol pikinini we oli bon long taem ya we yu stap harem nogud, bambae oli talem long yu se:‘Ples ya i fasfas tumas.
Yu mekem se i gat moa spes blong mi stap long hem.’+
21 Mo long hat blong yu bambae yu talem se:‘?Ol pikinini ya we oli givim long mi, hu i papa blong olgeta?From we mi mi lusum ol pikinini finis mo mi no save bonem pikinini,Mo ol man oli tekem mi mi go long defren kantri mo oli tekem mi mi go kalabus.
?Hu i lukaot long ol pikinini ya?+
!Yu luk! Oli lego mi mi stap mi wan nomo,+?Taswe olgeta ya oli kam wea?’”+
22 Hemia samting we Hae Masta Jehova i talem i se:“!Yu luk! Bambae mi leftemap han blong mi i go long ol nesen,Mo bambae mi leftemap saen blong mi* long ol man.+
Bambae oli karem ol boe blong yu long han blong olgeta i kam*Mo oli karem ol dota blong yu long solda blong olgeta.+
23 Ol king bambae oli kam ol man blong lukaot long yu,+Mo ol dota blong ol king blong olgeta bambae oli stap givim titi long yu.
Bambae oli bodaon long yu, we fes blong olgeta i kasem graon,+Mo oli likim das long leg blong yu,+Mo bambae yu save se mi mi Jehova.
Olgeta we oli putum hop blong olgeta long mi, ol man bambae oli no mekem olgeta oli sem.”+
24 Sipos wan strong man i holemtaet sam man, ?hu i save go tekemaot olgeta?Mo sipos man we i stap mekem i strong tumas long narafala, i holemtaet sam man, ?hu i save go tekemaot olgeta?
25 Be hemia samting we Jehova i talem i se:“Ol man we wan strong man i holemtaet olgeta, bambae mi karemaot olgeta,+Mo olgeta we man ya we i stap mekem i strong tumas, i holemtaet olgeta, bambae mi karemaot olgeta.+
Bambae mi agensem olgeta we oli agensem yu,+Mo bambae mi sevem ol prapa pikinini blong yu.
26 Bambae mi mekem olgeta we oli stap spolem yu, oli kakae mit blong olgeta bakegen,Mo bambae oli drong long blad blong olgeta bakegen, olsem we oli drong long swit waen.
Mo olgeta man* bambae oli save se mi mi Jehova,+Sevia blong yu,+ mo Man we i pembak yu,+Mi God ya blong Jekob we i gat Bigfala paoa.”+
Ol futnot
^ PT: “taem mi stap long bel blong mama blong mi.”
^ NT: “Jehova bambae i letem mi kasem jastis.”
^ NT: “Mo praes.”
^ NT: “lukluk rabis long sol blong hem.”
^ NT: “taem blong mekem i gud long man.”
^ MNT: “evri hil we i no gat samting long hem.”
^ NT: “saen pos.”
^ PT: “klosap long jes blong olgeta.”
^ PT: “mit.”
