Eksodas 39:1-43
39 Mo oli wokem ol gudfala klos we i blong werem blong mekem minista wok long holi ples, oli wokem ol klos ya long blu tred, pepol wul, mo tred we i laet red.+ Oli wokem ol tabu klos we i blong Eron,+ stret olsem we Jehova i bin talem long Moses.
2 Hem i wokem efod+ long tred we oli wokem long gol, blu tred, pepol wul, tred we i laet red, mo gudfala tred ya linen we oli wivim tugeta.
3 Oli hamarem gol i kam tintin, mo Bejalehel i katem long ol longlongfala pis olsem tred, nao oli wivim wetem blu tred, pepol wul, tred we i laet red, mo gudfala tred ya linen.
4 Mo oli wokem tu pis kaliko we i blong putum long solda, blong joenem tufala en blong efod antap.
5 Mo strap ya we oli wokem long kaliko mo we i joen long efod ya blong fasemtaet efod ya,+ oli wokem long sem samting olsem efod, hemia tred we oli wokem long gol, blu tred, pepol wul, tred we i laet red, mo gudfala tred ya linen we oli wivim tugeta. Oli wokem stret olsem we Jehova i bin talem long Moses.
6 Biaen oli putum tu ston ya onikis long ples blong tufala we oli wokem long gol. Mo oli katem nem blong ol boe blong Isrel long tufala, olsem we oli katem nem long wan stamp.+
7 Hem i putum tufala ston ya long joen blong efod long solda, mo tufala i olsem wan saen blong tingbaot ol boe blong Isrel.+ Hem i mekem stret olsem we Jehova i bin talem long Moses.
8 Biaen hem i wokem spesel paos we i blong hangem long jes.+ Hem i wokem long tred we oli wokem long gol, blu tred, pepol wul, tred we i laet red, mo gudfala tred ya linen we oli wivim tugeta, olsem we hem i wokem efod.+
9 Spesel paos ya taem oli benem, hem i skwea mo longfala blong hem, saes blong hem i wan open han mo bigfala blong hem, saes blong hem i wan open han.*
10 Oli putum ol ston antap long hem long fo laen. Long faswan laen i gat ston ya rubi, topas, mo emeral.
11 Long seken laen i gat takwoes, safaea, mo jaspa.
12 Long namba 3 laen i gat ston ya lesem,* agat, mo ametis.
13 Long namba 4 laen i gat krisolaet, onikis, mo jed. Oli mekem ples blong ol ston ya long gol, blong holemtaet olgeta.
14 Ol ston ya oli folem nem blong ol 12 boe blong Isrel. Oli katem nem long olgeta wanwan olsem we oli katem nem long wan stamp. Ol nem ya wanwan oli representem ol 12 traeb blong Isrel.
15 Biaen oli yusum gol we i klin gud blong wokem ol jen we oli tantanem olsem rop long spesel paos ya.+
16 Mo oli wokem tu ples blong holem ston long gol, mo tu ring long gol blong spesel paos ya, mo oli fasem tufala ring ya long tufala kona blong spesel paos ya.
17 Biaen oli pusum tufala rop ya we oli wokem long gol, i gotru long tufala ring long ol kona blong spesel paos ya.
18 Mo biaen oli pusum en blong tufala rop ya i gotru long tufala ples blong holem ston mo oli fasem tufala antap long solda, blong spesel paos ya i save hang long fran blong efod ya.
19 Biaen oli wokem tu ring long gol, mo oli putum tufala long en blong spesel paos, long baksaed blong hem we i fesem efod.+
20 Biaen oli wokem tu ring bakegen long gol mo oli putum long fored blong efod. Tufala ring ya i stap aninit long tufala ples we efod ya i joen long hem antap, be i no bitim strap blong efod we oli wivim long kaliko. Tufala i stap klosap long strap ya.
21 Biaen oli fasemtaet spesel paos ya long blu rop. Blong mekem olsem, oli pusum blu rop ya i go long ol ring blong spesel paos ya, mo oli fasem long ol ring we i stap long efod. Hemia i blong mekem se spesel paos ya i stap strong long efod ya, antap long strap blong efod we oli wivim. Oli wokem ol samting ya stret olsem we Jehova i bin talem long Moses.
22 Biaen hem i yusum blu tred blong wokem wan kot we i no gat han blong hem, blong hae pris i werem aninit long efod.+
23 Medel blong nek blong klos ya i open i kamdaon, olsem hemia blong aean klos. Oli wivim wan samting i goraon long ples ya we i open, blong kaliko ya i no brok.
24 Biaen oli tantanem blu tred, pepol wul, mo tred we i laet red, blong mekem ol frut blong grenadin mo oli hangem i goraon long en blong kot ya.
25 Mo oli wokem ol bel long gol we i klin gud mo oli hangem bitwin long ol grenadin ya raon long en blong kot ya.
26 Oli hangem wan bel mo wan grenadin, wan bel mo wan grenadin raon long kot ya we hae pris bambae i werem blong mekem minista wok. Oli wokem ol samting ya stret olsem we Jehova i bin talem long Moses.
27 Wan man i wivim ol kaliko long gudfala tred ya linen, mo oli yusum ol kaliko ya blong wokem ol longfala klos blong Eron wetem ol boe blong hem,+
28 mo kaliko blong fasem long hed,+ ol hat we oli flasem,+ ol kalsong*+ we oli wokem long gudfala kaliko ya linen we oli tantanem,
29 mo strap we oli wokem long gudfala tred ya linen we oli wivim tugeta, blu tred, pepol wul, mo tred we i laet red. Oli wokem ol samting ya stret olsem we Jehova i bin talem long Moses.
30 Biaen oli yusum gol we i klin gud blong wokem plet ya we i saen we i saen, hemia tabu saen blong dedikesen,* mo oli katem ol tok ya long hem olsem we oli katem nem long wan stamp: “Jehova i stamba blong olgeta samting we i tabu.”+
31 Oli fasem wan blu rop long plet ya, blong putum antap long kaliko we i stap long hed blong hae pris. Oli wokem samting ya stret olsem we Jehova i bin talem long Moses.
32 Nao ol laen blong Isrel oli finisim olgeta wok blong tabenakel,* hemia tent blong miting.* Oli mekem evri samting olsem we Jehova i bin talem long Moses.+ Oli mekem stret olsem we God i talem.
33 Biaen oli karem tabenakel+ ya i kam long Moses, hemia tent+ mo olgeta samting blong hem. I gat ol huk blong hem,+ ol frem blong hem,+ ol stik blong hem,+ ol bigfala pos blong hem mo ol stamba ples blong olgeta,+
34 mo bigfala kaliko we oli wokem long skin blong man sipsip mo oli pentem i red,+ mo kaliko we oli wokem long skin blong animol ya sil, mo bigfala kaliko+ we i blong blokem Bokis,
35 mo bokis blong Loa,* wetem ol stik blong hem,+ mo lid blong hem,+
36 mo tebol wetem ol samting blong yusum+ long tebol ya, mo sobred,
37 ples blong putum laet we oli wokem long gol we i klin gud,+ ol laet we oli stap long laen, wetem ol samting blong hem,+ mo oel blong yusum long laet,+
38 mo olta+ we oli wokem long gol, oel blong makemaot man,+ mo insens we i gat gudfala smel,+ mo skrin+ blong doa blong tabenakel,
39 mo olta we oli wokem long kopa+ mo netwaea blong hem we oli wokem long kopa, mo ol stik blong hem,+ mo evri samting blong yusum long olta ya,+ besin mo ol leg blong hem,+
40 ol bigfala kaliko blong blokem yad, ol bigfala pos mo ol stamba ples blong olgeta,+ skrin+ we i blong blokem doa blong yad ya, ol aean blong holemtaet rop+ mo ol rop blong hem, mo olgeta samting blong yusum long tabenakel, hemia tent blong miting,
41 ol gudfala klos we oli wivim blong mekem minista wok long tabu ples, ol tabu klos blong Eron we i pris,+ mo ol klos blong ol boe blong hem we oli wok olsem ol pris.
42 Hemia nao olsem wanem ol laen blong Isrel oli mekem olgeta wok we Jehova i bin talem long Moses.+
43 Taem Moses i jekem olgeta wok we oli mekem, hem i luk se oli mekem evri samting stret olsem we Jehova i bin talem, nao Moses i blesem olgeta.
Ol futnot
^ Hemia wan sas ston we man i no save, maet hem i ston ya amba, yasin, opal, o tumalen.
^ NT: “sot traosis.”
^ NT: “tabu hat.”
^ PT: “bokis we i olsem Witnes.”
