Esikel 41:1-26
41 Biaen, hem i tekem mi mi go insaed long tabu ples aotsaed,* mo hem i mesarem ol bigfala pos we oli stap long saed. Mo bigfala blong olgeta i sikis kiubit* long wan saed, mo sikis kiubit long narasaed.
2 Mo entrens blong ples ya, bigfala blong hem i ten kiubit, mo ol wol long saed* blong entrens ya, wansaed i faef kiubit mo narasaed i faef kiubit. Hem i mesarem longfala blong rum ya, we i 40 kiubit mo bigfala blong hem i 20 kiubit.
3 Biaen, hem i go insaed* mo i mesarem bigfala pos we i stap long saed blong entrens ya, mo hem i tu kiubit tik, mo entrens ya, bigfala blong hem i sikis kiubit. Mo ol wol long saed blong hem oli* seven kiubit.
4 Biaen, hem i mesarem rum we i lukluk i go long tabu ples aotsaed, mo longfala blong rum ya i 20 kiubit, mo bigfala blong hem i 20 kiubit.+ Mo hem i talem long mi se: “Hemia Rum We i Tabu We i Tabu.”+
5 Biaen hem i mesarem tik blong wol blong tempol ya, mo hem i sikis kiubit tik. Mo ol rum long saed, we oli stap raon long tempol, bigfala blong olgeta i fo kiubit.+
6 Ol rum long saed, oli tri stori, we wan i stap antap long narawan, mo i gat 30 rum long wanwan stori ya. Mo raon long wol blong tempol, i gat ol ples blong ol sapot blong ol rum ya oli sidaon long hem, blong mekem se ol sapot ya oli no gotru long wol blong tempol.+
7 Long tugeta saed blong tempol ya, i gat wan ples blong wokbaot we i goraon,* we saes blong hem i kam bigwan moa taem i go long ol rum we oli stap antap.+ Taem man i stat daon mo i pastru long medel stori blong go kasem stori we i stap antap, saes blong ol stori ya i kam bigwan moa.
8 Mi luk we raon long tempol ya, i gat wan platfom we i hae lelebet, mo ol fandesen blong ol rum long saed, i stat long graon i go kasem long kona, hae blong olgeta i wan ful waelken blong sikis kiubit.
9 Aotsaed wol blong ol rum long saed, bigfala blong hem i faef kiubit. Mo long saed blong ol rum ya, i gat wan open spes* we i pat blong tempol.
10 Bitwin tempol mo ol rum blong kakae,*+ i gat wan eria we bigfala blong hem i 20 kiubit long wan saed mo narasaed.
11 I gat wan entrens bitwin ol rum long saed mo open spes we i stap long saed i go long not, mo i gat wan narafala entrens we i stap long saed i go long saot. Mo raon long open spes ya, bigfala blong hem i faef kiubit.
12 Bilding we i stap long saed i go long wes we i lukluk i go long open eria, bigfala blong hem i 70 kiubit mo longfala blong hem i 90 kiubit. Mo olgeta wol blong bilding ya, tik blong hem i faef kiubit.
13 Nao hem i mesarem tempol, mo longfala blong hem i 100 kiubit. Longfala blong open eria, wetem bilding ya,* mo ol wol blong hem, i 100 kiubit tu.
14 Bigfala blong fored blong tempol we i lukluk i go long is, wetem open eria, hem i 100 kiubit.
15 Nao hem i mesarem longfala blong bilding we i fesem open eria biaen, wetem ol ples blong wokbaot we oli stap long tugeta saed blong hem, mo saes blong hem i 100 kiubit.
Mo tu, hem i mesarem tabu ples aotsaed, tabu ples insaed,+ mo ol rum long doa blong yad,
16 wetem spes long fored blong ol doa, ol windo we aotsaed i smol be insaed i bigwan,+ mo ol ples blong wokbaot we oli stap long trifala eria ya. I gat ol flat wud klosap long spes long fored blong doa,+ stat long floa i go antap kasem ol windo, mo oli kavremap ol windo ya.
17 Nao hem i tekem mesamen blong antap long entrens, mo insaed long tempol, mo aotsaed blong hem, wetem olgeta wol we i goraon long hem.
18 Mo i gat ol pija blong ol jerubim+ mo pamtri we oli katem long wol ya,+ we wan pamtri i stap long medel blong tu jerubim, mo wanwan long ol jerubim ya oli gat tu fes.
19 Fes blong man i lukluk i go long pamtri long wan saed, mo fes blong laeon* i lukluk i go long pamtri we i stap narasaed.+ Pija ya nao oli katem raon long ful tempol ya.
20 Long wol blong tabu ples ya, stat long floa i go kasem eria antap long entrens, oli katem pija blong ol jerubim mo ol pamtri.
21 Ol pos blong doa* blong tabu ples ya oli skwea.+ Mo long fored blong holi ples* i gat wan samting we i olsem
22 wan olta we oli wokem long wud,+ we hae blong hem i tri kiubit mo longfala blong hem i tu kiubit. Olta ya i gat ol pos long kona blong hem, mo stamba* blong hem wetem ol saed blong hem, oli wokem long wud. Biaen, man ya i talem long mi se: “Hemia nao tebol we i stap long fored blong Jehova.”+
23 Tabu ples aotsaed wetem holi ples, tufala tugeta i gat tu doa.+
24 Ol doa ya oli gat tu haf blong hem we oli save swingim, wanwan doa i gat tu haf blong hem.
25 Oli katem ol pija blong ol jerubim mo ol pamtri long ol doa blong tabu ples ya, olsem we oli mekem long ol wol.+ Mo tu, i gat wan smol ruf we oli wokem long wud, we i stap aotsaed, long fored blong rum long doa.
26 Mo tu, i gat ol windo we aotsaed blong olgeta i smol be insaed i bigwan+ mo ol pija blong ol pamtri, we oli stap long tugeta saed blong rum long doa, long ol wol blong rum long saed blong tempol, mo long ol smol ruf we oli wokem.
Ol futnot
^ PT: “tempol.” Long japta 41 mo 42, tok ya i minim tabu ples aotsaed (Rum We i Tabu), o ful tabu ples (hemia tempol wetem Rum We i Tabu mo Rum We i Tabu We i Tabu).
^ PT: “ol saed.”
^ Hemia, i go insaed long tabu ples insaed olgeta, o Rum We i Tabu we i Tabu.
^ PT: “bigfala blong entrens ya hem i.”
^ Hemia i minim wan lada we i raon.
^ Hemia wan smol ples blong wokbaot raon long tempol ya.
^ NT: “ol rum.”
^ Hemia bilding we i stap long wes blong tabu ples.
^ NT: “wan man laeon we i yang mo i gat plante hea long nek blong hem.”
^ PT: “Pos blong doa.” I luk olsem entrens blong go insaed long Rum We i Tabu.
^ I luk olsem se Rum We i Tabu We i Tabu.
^ PT: “longfala.”
