Esra 5:1-17
5 Nao profet Hagae+ mo profet Sekaraea+ we i smol bubu blong Ido,+ tufala i talemaot ol profet tok long ol man Jiu we oli stap long Juda mo Jerusalem, mo tufala i mekem olsem long nem blong God blong Isrel we i stap lukaot long olgeta.
2 Long taem ya nao, Serubabel+ we i boe blong Sealtiel mo Jesua+ we i boe blong Jehosadak, tufala i stat blong bildim bakegen haos blong God+ we i stap long Jerusalem, mo ol profet blong God oli stap wetem tufala mo oli sapotem tufala.+
3 Nao Tatenae we i hed gavman blong rijen Narasaed Long Reva,* mo Setara-bosenae, wetem olgeta we oli sapotem tufala, oli kam luk olgeta ya mo oli askem long olgeta se: “?Hu i givim raet long yufala blong bildim haos ya mo blong finisim ol wok ya?”*
4 Biaen oli askem long olgeta se: “?Wanem nem blong ol man we oli stap wokem haos ya?”
5 Be God i stap lukaot* long ol elda blong ol man Jiu,+ nao ol man ya oli no stopem olgeta go kasem we oli sanem ripot i go long Darias, mo kasem we wan leta i kambak long olgeta, long saed blong samting ya.
6 Hemia wan kopi blong leta we Tatenae we i hed gavman long rijen Narasaed Long Reva, mo Setara-bosenae wetem olgeta we oli sapotem hem, hemia ol haeman we oli daon moa we oli blong rijen Narasaed Long Reva, oli sanem i go long King Darias.
7 Oli sanem ripot i go long hem, mo hemia samting we oli raetem:
“King Darias:
“!Pis i stap wetem yu!
8 I gud king i save se mifala i go long provins blong Juda, long haos blong God ya we i hae, mo olgeta oli wokem haos ya long ol bigfala ston we oli rolem i go long stret ples blong hem, mo oli putum ol timba long ol stonwol. Ol man oli glad blong mekem wok ya, mo wok i gohed gud from we ol man oli wok had.
9 Biaen mifala i askem long ol elda blong olgeta se: ‘?Hu i givim raet long yufala blong bildim haos ya mo blong finisim ol wok ya?’*+
10 Mo tu, mifala i askem nem blong olgeta, olsem nao mifala i save raetemdaon nem blong ol man we oli stap lidim olgeta, blong mifala i save talemaot long yu.
11 “Hemia ansa we oli talem long mifala: ‘Mifala i man blong wok blong God blong heven mo wol, mo mifala i stap bildim bakegen haos ya we oli bin bildim plante yia bifo, wan king blong Isrel we i gat bigfala paoa, hem nao i bin bildim mo i finisim.+
12 Be from we ol papa blong mifala oli mekem God blong heven i kros,+ hem i putum olgeta long han blong King Nebukadnesa+ blong Babilon, hemia ol man Koldia, nao oli spolem haos ya+ mo oli tekem ol man oli go stap long Babilon.+
13 Be nating se i olsem, long faswan yia blong rul blong King Saeras blong Babilon, King Saeras i givim wan oda blong oli bildim bakegen haos ya blong God.+
14 Mo tu, ol samting we oli wokem long gol mo silva we oli stap yusum long haos blong God, hemia ol samting we Nebukadnesa i bin tekemaot long tempol long Jerusalem mo i go putum long tempol blong Babilon,+ King Saeras i tekemaot olgeta long tempol ya mo i givim long wan man we nem blong hem Sesbajara,*+ we Saeras i bin putumap hem i kam hed gavman.+
15 Mo Saeras i talem long hem se: “Yu tekem ol samting ya, mo yu go putum olgeta insaed long tempol we i stap long Jerusalem. Mo i gud oli bildim bakegen haos blong God long sem ples we i bin stap long hem.”+
16 Nao Sesbajara ya i kam mo i wokem ol fandesen blong haos blong God+ we i stap long Jerusalem, mo wok blong bildim haos ya i stat long taem ya i kam kasem naoia, be wok ya i no finis yet.’+
17 “Nao sipos king i luk se i stret, i gud hem i sanem wan man blong i jekemgud ples blong putum ol sas samting blong king long Babilon, blong faenemaot sipos King Saeras i bin givim wan oda blong oli bildim bakegen haos blong God long Jerusalem,+ mo i gud oli sanem desisen blong king long bisnes ya, i kam long mifala.”
Ol futnot
^ NT: “Yufretes Reva.”
^ NT: “mo putum ol timba ya.”
^ PT: “ae blong God blong olgeta i stap.”
^ NT: “mo putum ol timba ya.”
