Habakuk 2:1-20
2 Bambae mi gohed blong stanap long ples we mi stap gad long hem,+Mo bambae mi stanap antap long stonwol.
Bambae mi wet blong harem tok we bambae hem i yusum mi blong talem,Mo wanem tok we bambae mi talem taem man i tok strong long mi.
2 Nao Jehova i ansa long mi, i se:“Yu raetemdaon vison ya, mo yu katem ol tok blong hem long ol flat ston, yu mekem we oli klia gud,+Blong man we i stap ridim long bigfala voes, i save ridim isi* nomo.+
3 From we vison ya i stap wet long stret taem blong hem,Mo i stap muv kwik i go from en blong hem,* mo bambae i no giaman.
!Nating sipos hem i tektaem,* be yu mas gohed blong wet long hem!+From we bambae hem i mas kamtru.
!Bambae hem i no let!
4 Yu traem luk man we i praod,Hat blong hem i no stret.
Be stret man bambae i laef from hem i holemstrong oltaem.*+
5 I tru, waen i save trikim man,Taswe man we i praod i no save kasem mak blong hem.
Hem i olsem bigfala Gref,* i wantem tumas blong kakae,Hem i olsem ded mo neva hem i talem se i naf.
Hem i gohed blong hivimap ol nesen oli kam long hemMo i stap tekemaot olgeta man oli blong hem.+
6 Bambae olgeta ya evriwan oli talem wan proveb,* wan tok haed, mo wan ridel agensem hem.+
Bambae oli talem se:‘!Sore tumas long man we i stap hivimap ol samting we oli no blong hem,?Bambae hem i gohed kasem wetaem?Mo we i stap mekem kaon blong hem i kam bigwan moa!
7 Ol man we yu kaon long olgeta bambae oli girap wantaem nomo oli kam agensem yu.
Bambae oli wekap mo oli seksekem yu strong,Mo bambae oli tekemaot evri samting blong yu.+
8 Mo from we bifo yu stap tekemaot ol samting blong plante nesen,Olgeta nesen bambae oli tekemaot evri samting blong yu,+Yes, from we yu stap mekem blad blong ol man i ronMo from ol raf fasin blong yu long wol ya,We yu stap mekem long ol taon mo long olgeta we oli stap long olgeta.+
9 !Sore tumas long man we i mekem rabis fasin blong kasem samting blong halpem haos blong hem,Nao i save mekem nes blong hem long ples we i hae,Blong mekem se trabol i no kasem hem!
10 Yu yu pulum sem nomo i kam long haos blong yu.
Taem yu kilim i ded plante man, yu mekem sin agensem yu wan nomo.*+
11 From wan ston long stonwol bambae i singaot bigwan,Mo wan rafta antap long ruf bambae i ansa long hem.
12 !Sore tumas long man we i mekem blad i ron blong i save bildim wan taon,Mo i mekem fasin we i no stret blong stanemap wan taon!
13 !Yu luk! Jehova komanda blong ol ami nao i mekem se ol man bambae oli wok had blong putum faeawud long faea,Mo i mekem se ol nesen bambae oli wok had gogo oli taed gud, be i blong nating nomo.+
14 From wol bambae i fulap long save long saed blong glori* blong JehovaOlsem we wota i kavremap gud solwota.+
15 !Sore tumas long man we i givim wan samting long ol fren blong hem blong oli dring,Mo i ademap bigfala kros mo kros long hem, blong mekem oli drong,Nao hem i save luk olgeta taem oli neked!
16 Bambae ol man oli no givim glori long yu, be bambae oli mekem yu sem bigwan.
Yu tu, i gud yu dring mo yu soemaot bodi ya blong yu we oli no bin mekem sakomsaes long hem.*Kap we i stap long raethan blong Jehova, bambae i tanraon i kambak long yu,+Mo sem bambae i kavremap glori blong yu.
17 From we raf fasin we oli bin mekem long Lebanon bambae i kam kavremap yu,Mo trabol we i mekem ol wael animol oli fraet bitim mak bambae i kasem yu,From we yu stap mekem blad blong ol man i ronMo from raf fasin blong yu long wol ya,We yu stap mekem long ol taon mo long ol man we oli stap long olgeta.+
18 Taem man i katem wan aedol finis,?Aedol ya i givhan long hem olsem wanem??Wan aedol* mo wan tija blong ol giaman toktok, i givhan long man olsem wanem,Nating se man we i wokem i trastem hem,Nao i stap wokem ol god we oli nating nomo, we oli no save toktok?+
19 Sore tumas long man we i talem long wan pis wud se: “!Yu wekap!”No long wan ston we i no save toktok, i se: “!Yu wekap! !Yu tijim mifala!”!Yu luk! Oli blokem wud ya long gol mo silva,+Mo i no gat win insaed long hem.+
20 Be Jehova i stap long tabu tempol blong hem.+
!Fulwol i mas stap kwaet long fes blong hem!’”+
Ol futnot
^ NT: “gud.”
^ NT: “i go blong i kamtru.”
^ NT: “sipos i luk olsem se bambae i tektaem.”
^ MNT: “from bilif blong hem.”
^ NT: “agensem sol blong yu.”
^ MNT: “mo yu wokbaot lelei.”
^ NT: “aedol we oli wokem long silva, gol, o kopa.”
