Leta i go long man Hibru 6:1-20
6 From samting ya, naoia we yumi livim finis ol stamba tijing+ we oli tokbaot Kraes, i gud yumi stap gohed kwik blong yumi kam bigman.+ I nogud yumi stap putum fandesen nomo oltaem olsem, fasin blong tanem tingting from ol wok we oli ded, mo bilif long God,
2 mo ol tijing we i tokbaot baptaes, putum han long wan man,+ laef bakegen long ded,+ mo jajmen ya we i blong olwe.
3 Yumi mas gohed kwik blong kam bigman. Mo bambae yumi mekem olsem sipos God i wantem.
4 Samfala oli kam finis long laet blong God,+ mo oli kasem finis fri presen ya we God i givim, mo olgeta tu oli kasem tabu spirit,
5 mo oli testem finis gudfala tok blong God mo paoa blong niufala sistem blong wol,* we i stap kam.
6 Be biaen oli gowe long bilif.+ Naoia i no moa posibol blong pulum olgeta blong oli tanem tingting bakegen, from we i olsem se olgeta oli stap nilim Pikinini blong God long pos bakegen, mo oli stap mekem hem i sem long fes blong olgeta man.+
7 Taem graon i stap kasemgud ren, bambae i gat gudfala kakae i gru long hem, nao i save givhan gud long ol man we oli planem kakae ya. Hemia i olsem we God i stap blesem graon ya.
8 Be sipos ol ropnil mo ol rabis gras oli gru long graon ya, ol man bambae oli no wantem graon ya, mo oli rere blong spolem, mo long en blong hem, bambae oli bonem.
9 Ol gudfala fren. Nating se mifala i stap toktok olsem, be mifala i save gud se yufala i stap mekem samting we i stret, we God bambae i sevem yufala from.
10 Oltaem God i stap mekem i stret nomo. Hem i no save fogetem ol wok ya we yufala i mekem. Hem bambae i stap tingbaot we yufala i lavem nem blong hem,+ taem yufala i mekem minista wok mo yufala i stap gohed yet blong givhan long ol tabu man.
11 Be mifala i wantem se yufala evriwan i gohed blong wok had olsem we yufala i stap mekem fastaem. Samting ya bambae i mekem se yufala i bilif strong long hop ya+ gogo kasem en.+
12 Olsem nao, bambae yufala i no kam les,+ be yufala i folem fasin blong olgeta ya we oli kasem ol samting we God i promes blong givim, from we oli bilif mo oli gat longfala tingting.
13 Taem God i mekem promes long Ebraham, hem i yusum nem blong hem nomo blong mekem tok blong hem i strong, from we i no gat man we i hae moa long hem.+
14 Hem i talem se: “Bambae mi blesem yu mo bambae mi mekem ol pikinini blong yu oli kam plante.”+
15 Nao from we Ebraham i gat longfala tingting, hem i wet gogo promes ya i kamtru.
16 Taem ol man oli mekem wan promes, oli yusum nem blong wan haeman blong mekem tok blong olgeta i strong. Hemia i stopem eni rao, from we tok ya i pruvum se samting we oli talem i tru.+
17 Long sem fasin, God i yusum nem blong hem bakegen blong mekem promes blong hem i strong, blong pruvum se tok blong hem i tru. Hem i mekem olsem, blong soemaot klia long olgeta we bambae oli kasem promes ya,+ se stamba tingting* blong hem bambae i no jenis.
18 Tufala samting ya* we God i mekem, tufala i no save jenis mo God i neva save giaman.+ Mo yumi ya we yumi ronwe i go long sefples finis, tufala samting ya i mekem yumi kam strong, nao yumi holemtaet hop ya we i stap long fored blong yumi.
19 Hop ya we yumi gat,+ hem i olsem wan angka blong holem sol* blong yumi, hem i fas strong mo yumi save trastem, mo i lidim yumi i go insaed biaen long bigfala kaliko.+
20 Jisas i go insaed long ples ya finis long bihaf blong yumi, blong openem rod blong yumi.+ Hem i kam hae pris olsem Melkisedek, mo bambae hem i pris oltaem gogo i no save finis.+
