Jajes 1:1-36
1 Afta we Josua i ded, ol laen blong Isrel* oli askem long Jehova se: “?Hu long mifala bambae i go fastaem blong faet agensem laen blong Kenan?”
2 Nao Jehova i ansa se: “Laen blong Juda bambae i go fastaem. !Yufala i luk! Naoia mi mi givim* graon ya long hem.”
3 Nao ol laen blong Juda oli talem long laen blong Simeon se: “Yufala i kam wetem mifala, yumi go long teritori ya we oli makemaot* se i blong mifala, blong yumi faet agensem laen blong Kenan. Nao biaen bambae mifala i save kam wetem yufala long teritori ya we oli makemaot se i blong yufala, blong givhan long yufala.” Ale ol laen blong Simeon oli go wetem olgeta.
4 Taem laen blong Juda i go, Jehova i putum ol man Kenan mo ol man Perij long han blong olgeta, mo tu oli winim 10,000 man long Besek.
5 Long taem ya we oli winim ol laen blong Kenan mo ol man Perij, oli faenem Adonibesek long Besek tu, nao oli faet agensem hem long ples ya.
6 Taem Adonibesek i ronwe, oli ronem hem gogo oli holem hem, nao oli katemaot tufala bigfala fingga blong han mo leg blong hem.
7 Nao Adonibesek i talem se: “I gat 70 king we mi mi katemaot ol bigfala fingga blong han mo leg blong olgeta, mo oli stap pikimap ol kakae aninit long tebol blong mi. Taswe naoia God i givimbak fasin ya long mi.” Biaen oli tekem hem i go long Jerusalem, mo hem i ded longwe.
8 Mo tu, ol man Juda oli faet agensem ol man Jerusalem, mo oli holem taon ya, oli kilim evriwan long ples ya long naef blong faet, mo oli bonem ples ya long faea.
9 Afta, ol man Juda oli go faet agensem ol laen blong Kenan we oli stap long rijen blong ol hil, mo long Negeb mo long Sefela.
10 Ale, ol laen blong Juda oli go faet agensem ol laen blong Kenan, we oli stap long Hebron we fastaem hem i Kiriataba, mo oli kilim i ded evriwan long Sesae, Ahiman, mo Talmae.
11 Oli maj i stat long ples ya, mo oli go faet agensem ol man Debiri. (Bifo nem blong Debiri hem i Kiriatsefa.)
12 Nao Keleb i talem se: “Man we i go faet agensem ol man Kiriatsefa mo i winim olgeta, bambae mi givim gel blong mi Aksaha long hem, blong i kam waef blong hem.”
13 Ale Otniel boe blong Kenas we i smol brata blong Keleb, i winim olgeta. Nao Keleb i givim gel blong hem Aksaha, blong i kam waef blong hem.
14 Taem Aksaha i stap gohom, hem i fosem hasban blong hem blong i go askem wan graon long papa blong hem.* Ale Aksaha i kamdaon long dongki blong hem.* Nao Keleb i askem long hem se: “?Yu wantem wanem?”
15 Ale Aksaha i talem se: “Plis yu givim wan samting long mi olsem wan blesing, from we yu yu givim wan pis graon long mi finis long saot.* Be mi wantem se yu givim Gulot-maem* long mi tu.” Nao Keleb i givim Gulot Antap mo Gulot Daon long hem.
16 Mo olgeta we oli kamaot biaen long Kenaet we i palika blong Moses, olgeta wetem ol man Juda oli aot long taon blong ol pamtri, oli go long draeples blong Juda long saot blong Arad. Oli go stap wetem ol man ples ya.
17 Be laen blong Juda wetem laen blong brata blong hem Simeon, oli go mekem faet long ol laen blong Kenan we oli stap long Jefat, nao oli winim olgeta mo oli spolemgud olgeta. Taswe oli putum nem blong taon ya se Homa.*
18 Biaen laen blong Juda i winim ples ya Gasa mo i holem wetem ol teritori blong hem, mo Askelon wetem ol teritori blong hem, mo Ekron wetem ol teritori blong hem.
19 Jehova i stap wetem laen blong Juda, nao oli holem ol rijen blong ol hil i blong olgeta, be oli no save ronemaot ol man we oli stap long levelples, from we olgeta oli gat ol wo jariot we i gat naef long ol wil blong olgeta.*
20 Nao oli givim Hebron i go long Keleb stret olsem we Moses i promes. Mo hem i ronemaot trifala pikinini boe blong Anak long ples ya.
21 Be ol laen blong Benjamin oli no ronemaot ol man Jebus we oli stap long Jerusalem. Taswe ol man Jebus oli stap nomo wetem ol laen blong Benjamin long Jerusalem kam kasem tede.
22 Long taem ya, olgeta we oli kamaot biaen long Josef, oli go faet agensem ol man Betel, mo Jehova i stap wetem olgeta.
23 Olgeta we oli kamaot biaen long Josef oli go spae long Betel we fastaem hem i Lus.
24 Nao olgeta we oli go spae, oli luk wan man we i stap goaot long taon ya, ale oli askem long hem se: “Plis yu soem wan rod long mifala blong go insaed long taon ya, olsem bambae mifala i mekem i gud long yu.”*
25 Ale man ya i soem wan rod we oli save folem blong go insaed long taon ya. Nao oli kilim olgeta man long taon ya long naef blong faet, be oli no kilim man ya wetem ol famle blong hem, oli letem olgeta oli go.
26 Nao man ya i go long graon blong ol laen blong Het, i wokem wan taon blong hem, mo i putum nem blong taon ya se Lus, mo nem ya i stap kam kasem tede.
27 Laen blong Manase i no holem ples ya Betsean wetem ol taon we oli dipen* long hem, Tahanak wetem ol taon we oli dipen long hem, mo oli no holem ol man Doro wetem ol taon we oli dipen long hem, ol man Jibleam wetem ol taon we oli dipen long hem, mo ol man Megido wetem ol taon we oli dipen long hem. Ol man Kenan we oli stap long ol ples ya oli no wantem kamaot.
28 Nao taem ol laen blong Isrel oli kam strong moa, oli fosem ol man Kenan blong oli wok slef blong olgeta, be oli no ronemaot olgeta evriwan long graon ya.
29 Mo laen blong Efrem tu i no ronemaot ol man Kenan we oli stap long Gesa. Taswe ol laen blong Kenan oli stap nomo wetem olgeta long Gesa.
30 Mo laen blong Sebulun i no ronemaot ol man we oli stap long Kitron mo Nahalal. Taswe ol laen blong Kenan ya oli stap nomo wetem laen blong Sebulun, be oli stap wok slef blong olgeta.
31 Mo laen blong Asere i no ronemaot ol man we oli stap long Akoho, Saedon, Ahilab, Aksib, Helbaha, Afik, mo Rehob.
32 Taswe ol laen blong Asere oli laef wanples wetem ol laen blong Kenan we oli stap long ol ples ya, from we oli no ronemaot olgeta.
33 Laen blong Naftali i no ronemaot ol man Betsemes mo Betanat, be olgeta oli laef wanples wetem ol laen blong Kenan we oli stap long tufala ples ya. Taswe oli fosem ol man Betsemes mo Betanat blong oli wok slef blong olgeta.
34 Ol laen blong Amoro oli blokem ol laen blong Dan oli stap nomo long rijen blong ol hil, oli no letem olgeta oli kamdaon long levelples.
35 Ol laen blong Amoro oli no wantem kamaot, taswe oli stap nomo long Hil Ya Heres, mo long Aealon mo long Sahalbim. Be taem olgeta we oli kamaot biaen long Josef oli kam plante moa, mo oli kam strong moa, oli fosem ol laen ya blong Amoro, blong oli wok slef blong olgeta.
36 Teritori blong ol laen blong Amoro i stat long rod we i go antap long Akrabim, mo i stat long Sela i folem i go antap.
Ol futnot
^ PT: “ol boe blong Isrel.”
^ NT: “mi mi givim finis.”
^ PT: “oli sakem spesel ston nao oli makemaot.”
^ Hemia Keleb.
^ MNT: “hem i klapem han taem hem i stap sidaon long dongki.”
^ NT: “Negeb.”
^ Hemia i minim “Ol Besin (Bol) Blong Wota.”
^ Hemia i minim “Spolemgud.”
^ PT: “ol jariot wetem aean.”
^ PT: “bambae mifala i soemaot se mifala i lavem yu.”
^ NT: “oli stap raonabaot.”
