Jajes 17:1-13
-
Ol aedol blong Maeka mo pris blong hem (1-13)
17 I gat wan man i stap long rijen blong ol hil blong Efrem, nem blong hem Maeka.
2 Hem i talem long mama blong hem se: “Lastaem yu talem se wan man i karem 1,100 silva mane blong yu, mo mi harem we yu singaot trabol i kam long hem. !Be yu luk! Silva mane ya i stap wetem mi, mi nao mi tekem.” Nao mama blong hem i talem se: “I gud Jehova i blesem boe blong mi.”
3 Ale hem i givimbak 1,100 silva mane ya long mama blong hem, be mama blong hem i talem long hem se: “Bambae mi mas mekem silva mane ya blong mi i tabu, i blong Jehova. Mi wantem se yu yusum blong wokem wan pija mo wan aedol* blong yu long hem. Long fasin ya, mi givimbak silva ya long yu bakegen.”
4 Taem hem i givimbak silva mane ya long mama blong hem, mama blong hem i karemaot 200 silva mane i go givim long wan blaksmit. Nao man ya i yusum blong wokem wan pija mo wan aedol* long hem, mo oli go putum long haos blong Maeka.
5 Maeka i gat wan haos blong ol god, mo hem i mekem wan efod mo wan aedol ya terafim,* mo i putumap wan long ol boe blong hem i kam pris blong hem.
6 Long taem ya, i no gat king yet long Isrel. Olgeta man wanwan oli stap mekem samting we long ae blong olgeta, oli luk se i stret.*
7 Nao i gat wan yang man blong Betlehem we i stap long Juda mo i famle blong Juda. Hem i wan Livaet mo i stap long ples ya longtaem finis.
8 Man ya i aot long taon ya Betlehem long Juda, i stap lukaot wan ples blong stap long hem. Mo taem hem i stap wokbaot, hem i kamtru long rijen blong ol hil blong Efrem, i kam long haos blong Maeka.
9 Nao Maeka i askem long hem se: “?Yu kam wea? Hem i ansa se: “Mi mi wan Livaet, mo mi kam long Betlehem long Juda, mo mi stap lukaot wan ples blong stap long hem.”
10 Nao Maeka i talem long hem se: “Yu stap wetem mi, mo yu kam olsem wan papa* blong mi, mo yu kam wan pris blong mi. Evri yia bambae mi givim ten silva mane long yu wetem sam klos mo kakae.” Ale Livaet ya i go stap wetem hem.
11 Livaet ya i agri nomo blong stap wetem Maeka, mo Livaet ya i kam olsem wan stret pikinini blong hem.
12 Mo tu Maeka i putumap Livaet ya i kam wan pris blong hem, mo hem i stap long haos blong Maeka.
13 Nao Maeka i talem se: “Naoia mi mi save se Jehova bambae i mekem i gud long mi, from we wan Livaet i kam pris blong mi.”
Ol futnot
^ NT: “aedol we oli wokem long silva, gol, o kopa.”
^ NT: “aedol we oli wokem long silva, gol, o kopa.”
^ NT: “oli mekem samting we oli ting se i stret.”
^ NT: “wan advaesa.”
