Jajes 19:1-30
-
Ol laen blong Benjamin oli mekem rabis fasin blong seks long Gibea (1-30)
19 Bifo, taem i no gat king yet long Isrel, wan Livaet we i laef long rijen blong ol hil blong Efrem, long wan ples we i aotsaed olgeta, i tekem wan narafala woman we i blong Betlehem long Juda, i kam waef blong hem.
2 Be narafala woman ya blong hem, i no stap tru long hem, mo i aot long man ya i go long haos blong papa blong hem long Betlehem long Juda. Hem i stap fo manis long ples ya.
3 Biaen hasban blong hem i go from hem, blong traem toktok gud long hem blong tekem hem i kambak. Hem i tekem man blong wok blong hem, mo tu dongki oli go wetem hem. Ale woman ya i tekem hem i go insaed long haos blong papa blong hem. Taem papa blong hem i luk man ya, hem i glad tumas blong mitim hem.
4 Ale palika blong hem, hemia papa blong yangfala woman ya, i talem plante samting long man ya, blong hem i save stap wetem hem tri dei. Ale long tri dei ya tufala i kakae mo dring, mo long naet hem i slip long ples ya.
5 Long namba 4 dei, taem oli girap long eli moning blong go, papa blong yangfala woman ya i talem long man ya se: “Yu kakae wan samting blong givim paoa long yu, biaen yufala i save go.”
6 Ale tufala i sidaon mo tufala i kakae mo tufala i dring. Biaen papa blong yangfala woman ya i talem long man ya se: “Plis, yufala i stap fastaem, yufala kakae bakegen long naet blong mekem yufala i harem gud, ale biaen yufala i save go.”
7 Taem man ya i girap blong i go, palika blong hem i plis long hem blong i stap, ale hem i stap wan moa naet.
8 Long namba 5 dei, taem hem i girap long eli moning blong i go, papa blong yangfala woman ya i talem se: “Plis, yu kakae wan samting blong givim paoa long yu.” Ale tufala i stap gogo i let nao, mo tufala i gohed blong kakae.
9 Taem man ya wetem narafala woman blong hem, mo man blong wok blong hem, oli girap blong go, palika blong man ya, hemia papa blong yangfala woman ya i talem long hem se: “!Yu luk! Klosap san i godaon nao. Plis, yufala i stap wan moa naet. Naoia ples i stap kam tudak nao. Yufala i stap fastaem, yufala kakae bakegen long naet blong mekem yufala i harem gud. Ale tumoro yufala i save girap long eli moning, mo yufala i gobak long haos* blong yufala.”
10 Be man ya i no moa wantem stap wan moa naet bakegen. Ale hem i girap mo oli wokbaot, oli go klosap long Jebus, hemia Jerusalem. Hem i tekem tu dongki we i gat sarel long hem, wetem narafala woman blong hem mo man blong wok blong hem.
11 Taem oli kam klosap long Jebus, klosap en blong dei nao. Nao man blong wok ya i talem long masta blong hem se: “?I oraet yumi go long taon blong ol man Jebus, yumi slip long ples ya?”
12 Be masta blong hem i talem long hem se: “Yumi no mas stop long wan taon blong ol man blong narafala kantri we oli no man Isrel. Bambae yumi mas wokbaot gogo kasem Gibea.”
13 Nao hem i talem long man blong wok blong hem se: “Yu kam, bambae yumi traem wokbaot kasem Gibea, no Rama, mo bambae yumi slip long wan long tufala ples ya.”
14 Nao oli gohed long rod blong olgeta, mo taem oli kam klosap long Gibea we i blong ol laen blong Benjamin, san i stat blong draon.
15 Ale oli stop long Gibea, oli go insaed long taon ya, oli slip long ples ya. Taem oli go insaed, oli go sidaon long bigfala open ples long taon ya. Be i no gat wan man i kam tekem olgeta oli go slip long haos blong hem.
16 Long sapa ya, wan olfala man i jes finis wok long garen, i stap kambak. Hem i blong rijen blong ol hil blong Efrem, mo longtaem lelebet hem i stap long Gibea. Be ol man we oli stap long taon ya oli laen blong Benjamin.
17 Taem olfala man ya i luk i go antap mo i luk olgeta long bigfala open ples long taon ya, hem i askem long olgeta se: “?Yufala i stap go wea? ?Mo yufala i kam wea?”
18 Nao man ya i ansa se: “Mifala i aot long Betlehem long Juda, mifala i stap go long rijen blong ol hil blong Efrem, long wan eria we i aotsaed olgeta, mo mi mi blong ples ya nao. Mi mi go long Betlehem long Juda, mo mi stap go long haos blong Jehova,* be i no gat wan man i tekem mi mi go long haos long hem.
19 Mifala i gat naf kakae blong ol dongki blong mifala, mo i gat naf bred mo waen blong mi wetem woman blong mi, mo man blong wok blong mi. Mifala i no sot long wan samting.”
20 Be olfala man ya i talem se: “!Pis i stap wetem yufala! Bambae mi mi givim eni samting we yufala i nidim. Be i nogud yufala i slip long bigfala open ples ya long naet.”
21 Ale hem i tekem man ya i go insaed long haos blong hem, mo i givim kakae long ol dongki blong hem. Biaen oli wasem leg blong olgeta, nao oli kakae mo oli dring.
22 Taem oli stap harem gud insaed, sam stronghed man long taon ya oli kam raonem haos ya, oli stap faetem doa mo oli stap talem long olfala man ya we i ona blong haos ya se: “Yu tekem man ya we i kam insaed long haos blong yu, i kam aotsaed, blong mifala i save mekem seks wetem hem.”
23 Be ona blong haos ya i go aotsaed, i talem long olgeta se: “Ol brata blong mi, plis yufala i no mekem nogud fasin ya. Man ya i wan gest long haos blong mi. Yufala i no mas mekem krangke fasin ya.
24 Be hemia gel blong mi we i no save man yet, mo hemia narafala woman blong man ya. Bambae mi tekem tufala i kam long yufala, mo yufala i save mekem i nogud long tufala sipos yufala i wantem. Be yufala i no mas mekem krangke fasin ya long man ya.”
25 Be ol man ya oli no wantem lesin long olfala ya, ale man ya i holem narafala woman blong hem, i pusum hem i go aotsaed long olgeta. Nao oli repem hem, mo oli mekem nogud long hem fulnaet gogo kasem long moning. Biaen taem ples i stap delaet, oli letem hem i go.
26 Long eli moning, woman ya i kam, i foldaon long doa blong haos blong olfala ya we hasban* blong hem i stap long hem, mo i slip long ples ya gogo kasem we san i kam antap.
27 Taem hasban blong hem i girap long eli moning, i openem doa blong i go aotsaed mo i gohed long rod blong hem, hem i luk narafala woman ya blong hem i stap slip long fored blong haos ya, we han blong hem i kam kasem doa.
28 Ale hem i talem long woman ya se: “Yu girap, yumi go.” Be woman ya i no toktok. Ale man ya i leftemap woman ya, i putum hem long dongki, mo i tekem hem i go long haos blong hem.
29 Taem hem i kasem haos blong hem, hem i tekem naef blong kilim animol, nao i holem woman ya, i katkatem hem long 12 pis, mo i sanem ol pis ya i go long ol wanwan laen blong Isrel long ol teritori blong olgeta.
30 Nao olgeta man we oli luk samting ya, oli talem se: “Samting olsem i neva hapen bifo, mo stat long taem we ol laen blong Isrel oli aot long Ijip, kam kasem tede, yumi neva luk wan samting olsem. Yufala i mas tingting gud long samting ya, yufala i tokbaot, mo yufala i talem long mifala wanem blong mekem.”
