Leta i go long Jemes 1:1-27
1 Mi Jemes,+ mi slef blong God mo blong Masta Jisas Kraes.
Mi talem halo long ol 12 traeb we oli stap wanwan olbaot long wol:
2 Ol brata blong mi, taem ol defdefren samting oli kam traem yufala, yufala i mas tingbaot olgeta olsem samting blong harem gud,+
3 from we yufala i save se taem ol samting oli traem bilif blong yufala olsem, hemia i givhan long yufala blong yufala i stanap strong.+
4 Mo taem yufala i stanap strong oltaem, bambae yufala i trenem gud yufala, nao yufala i save kam stret gud* mo yufala i save mekem evri samting mo yufala i no sot long wan samting.+
5 Sipos wan long yufala i sot long waes, i gud hem i gohed blong askem long God,+ nao bambae hem i kasem from we God i glad blong givim samting long olgeta man,+ mo hem i no save daonem* man we i askem samting long hem.+
6 Be i gud man olsem i gohed blong askem wetem bilif,+ we hem i no mas gat tu tingting nating,+ from we man we i gat tu tingting, hem i olsem wef blong solwota we win i blu long hem, i mekem i go olbaot.
7 Man olsem, hem i no mas ting se hem i save kasem samting long Jehova.*
8 Hem i gat tu tingting oltaem,+ mo oltaem hem i stap tingbaot blong go long tu rod.
9 Be i gud brata we i man nating nomo, hem i glad* from we hem i kasem haenem,+
10 mo i gud brata we i rij, i glad se hem i no moa gat hae posisen,+ from we wan rijman i olsem wan flaoa long garen we bambae i lus.
11 Taem san i kam antap, mo i hot tumas, hem i mekem tri i drae nao flaoa blong hem i foldaon mo tri ya i no moa naes. Long sem fasin, rijman tu bambae i lus, taem hem i stap mekem ol bisnes blong hem.+
12 Man we i stap gohed blong stanap strong long ol trabol, hem i glad,+ from we taem God i agri long hem, bambae hem i kasem praes* blong laef+ we Jehova* i promes blong givim long olgeta we oli gohed blong lavem Hem.+
13 Taem wan samting i traem yumi, yumi no mas talem se: “God ya i stap traem mi,” from we ol samting nogud oli no save traem God, mo tu God i no save yusum ol samting nogud blong traem ol man.
14 Ol samting blong traem man i save kam strong long hem taem hem i wantem tumas wan samting, nao samting ya i pulum hem,* mo i trikim hem.+
15 Nao taem tingting ya i kam strong long hem, hem i mekem sin, mo sin i lidim hem i go long ded.+
16 Ol gudfala brata blong mi, yufala i no mas letem ol man oli lidim yufala i go krangke.
17 Olgeta gudfala presen mo ol presen we oli nambawan oli kamaot long heven,+ long Papa ya we i mekem olgeta laet long skae.+ Hem i no save jenis olsem sado we i stap muv mo i stap jenis oltaem.+
18 Hem i yusum trutok blong mekem yumi laef, from we hemia wil blong hem.+ Hem i mekem olsem blong yumi kam ol fas man we hem i jusum long medel blong olgeta samting we hem i wokem, olsem se yumi ol fasfrut blong garen.+
19 Ol gudfala brata blong mi, yufala i mas save samting ya: Evri man i mas rere oltaem blong lesin, i no mas hariap blong toktok,+ mo i no mas hariap blong kros,+
20 from we taem man i kros, hem i no save mekem samting we i stret long fes blong God.+
21 Taswe, yufala i mas lego olgeta doti samting mo olgeta rabis fasin,*+ mo yufala i mas stap daon blong letem God i planem tok blong hem insaed long yufala, we i save sevem laef* blong yufala.
22 Yufala i mas mekem samting we tok ya i talem,+ be yufala i no mas lesin nomo, nao yufala i stap giaman nomo long yufala bakegen.
23 Man we i stap lesin long tok ya be i no stap mekem ol samting we tok ya i talem,+ hem i olsem man we i stap lukluk fes blong hem long mira.
24 Hem i save luklukgud fes blong hem, be taem hem i gowe, wantaem nomo hem i fogetem se fes blong hem i olsem wanem.
25 Be man we i stap luklukgud long loa ya we i stret gud+ mo i save mekem man i fri, mo hem i gohed blong folem, hem i no harem tok ya nao biaen i fogetem, be hem i mekem samting we hem i harem. Mo bambae hem i glad long samting we hem i mekem.+
26 Sipos man i ting se hem i man blong wosipim God, be hem i no kontrolem tang* blong hem,+ hem i stap giaman long hem wan. Wosip blong man ya i blong nating nomo.
27 Long fes blong God ya we i Papa blong yumi, wosip we i klin mo i no gat doti long hem, i olsem: Man i mas lukaot gud long ol pikinini we oli no gat papa mama blong olgeta+ mo long ol wido+ taem oli kasem trabol,+ mo hem i mas holem laef blong hem i klin, blong wol i no mekem hem i doti.+
Ol futnot
^ NT: “fulwan.”
^ NT: “faenem poen long.”
^ PT: “tok flas.”
^ PT: “hat blong king.”
^ NT: “nao samting ya i kam olsem wan bet we i kasem hem.”
^ MNT: “ol hip blong rabis fasin.”
^ NT: “sol.”
^ NT: “be hem i no putum rop long maot.”
