Leta i go long Jemes 3:1-18
3 Ol brata blong mi, i no yufala evriwan we i mas kam tija, from we yufala i save se God bambae i luklukgud long wok blong yumi ol tija, mo bambae hem i jajem yumi folem ol samting ya.+
2 Yumi evriwan i stambol* plante taem.+ Sipos wan man i no stambol samtaem long toktok blong hem, man ya i stret gud olgeta, mo hem i naf blong kontrolem* ful bodi blong hem.
3 Sipos yumi putum rop long maot blong hos, blong mekem hem i obei long yumi, yumi stap lidim ful bodi blong hem tu.
4 Mo yufala i traem tingbaot sip: Nating se hem i bigwan, mo bigfala win i stap pusum hem, be smol pis wud nomo we i stap biaen long sip ya i stap stiarem hem i go long eni ples we man we i holem stia ya i wantem.
5 Long sem fasin, tang i wan haf blong bodi we i smol, be hem i save tok flas bitim mak. Yufala i traem tingbaot. !Wan smol faea nomo, be hem i save bonem wan bigfala bus we i finisim gud!
6 Tang tu hem i wan faea.+ Hem i wan pat blong bodi we i mekem samting we i nogud tumas mo i spolem ful bodi.+ Hem i save spolem laef blong man, mo hem i olsem Gehena,* from we hem i bonem evri samting.
7 Ol defdefren kaen wael animol mo ol pijin mo ol animol olsem snek mo lised* mo ol animol long solwota, ol man oli save mekem olgeta oli stap aninit long olgeta mo oli bos long olgeta.
8 Be i no gat man i save bos long tang blong hem. Tang i no save kontrolem hem wan, i save givim kil long man, mo i fulap long posen we i save kilim man i ded.+
9 Yumi yusum tang blong presem Jehova* we i Papa, be yumi yusum hem tu blong tok nogud long ol man we God i wokem olgeta “long pija blong hem.”+
10 Long sem maot nomo, yumi stap presem God mo yumi stap tok nogud.
Ol brata blong mi, samting ya i no sud hapen olsem.+
11 ?Yufala i ting se freswota* mo konkon wota, tufala i save kamaot long sem springwota nomo?
12 Ol brata blong mi, ?yufala i ting se wan figtri i save karem frut blong olif? ?Mo rop blong grep i save karem frut blong fig? Nogat.+ Long sem fasin, freswota i no save kamaot long wota we i konkon.
13 ?Hu long yufala we i waes mo i kasemsave samting? I gud hem i soemaot samting ya long ol gudfala fasin blong hem, mo long ol wok we hem i mekem wetem kwaet fasin ya we i kamaot long waes.
14 Be sipos long hat blong yufala, yufala i stap jalus+ mo yufala i wantem rao,*+ yufala i no mas tok flas from waes blong yufala.+ Sipos yufala i mekem olsem, yufala i stap giaman.
15 Hemia i no waes we i kamaot long heven, hem i waes blong wol ya,+ mo blong olgeta ya we oli folem samting we bodi nomo i wantem, mo hem i waes blong ol dimon.
16 Taem ol man oli jalus mo oli wantem rao oltaem,* evri samting bambae i olbaot mo olgeta nogud samting oli stap kamaot.+
17 Be nambawan samting long waes we i kamaot long heven, hemia se hem i klin gud,+ mo i mekem man i gat pis,+ i rere blong lego prapa tingting blong hem,+ i rere blong obei, i gat sore oltaem mo i mekem ol gudfala wok blong givhan long narafala,*+ hem i no mekem i moa gud long wan man i bitim narafala man,+ mo hem i no gat tu fes.+
18 Mo ol man we oli joen gud wetem ol narafala, oli givhan blong mekem pis i stap,+ nao oli stap mekem samting we i stret.+
Ol futnot
^ NT: “mekem mastik.”
^ NT: “hem i naf blong putum rop long.”
^ NT: “ol animol we oli stap krol.”
^ PT: “wota we i swit.”
^ MNT: “wantem tumas samting we i blong givhan long yufala nomo.”
^ MNT: “wantem tumas samting we i blong givhan long olgeta nomo.”
^ NT: “i karem plante gudfala frut.”
