Jeremaea 28:1-17
-
Jeremaea mo giaman profet ya Hanania (1-17)
28 Long sem yia ya, long stat blong rul blong King Jedekia+ blong Juda, long namba 4 yia, long namba 5 manis, profet Hanania boe blong Ajuru blong ples ya Gibeon,+ i talem long mi insaed long haos blong Jehova, long fes blong ol pris mo olgeta man se:
2 “Hemia samting we Jehova komanda blong ol ami, we i God blong Isrel i talem, i se: ‘Bambae mi brekem yok blong king blong Babilon.+
3 Bifo we tu yia i pas,* bambae mi karembak olgeta samting we oli stap yusum long haos blong Jehova, i kambak long ples ya. Hemia ol samting we King Nebukadnesa blong Babilon i bin karem olgeta long ples ya mo tekem i go long Babilon.’”+
4 “‘Mo bambae mi tekembak Jekonia+ boe blong Jehoeakim,+ king blong Juda, mo olgeta man Juda we oli bin go stap long Babilon, oli kambak long ples ya,’+ hemia nao tok blong Jehova, ‘from bambae mi brekem yok blong king blong Babilon.’”
5 Nao profet ya Jeremaea i toktok long Hanania we i profet, long fes blong ol pris mo olgeta man we oli stap stanap insaed long haos blong Jehova.
6 Profet ya Jeremaea i talem se: “!Amen!* !I gud Jehova i mekem samting ya! !I gud Jehova i mekem ol tok we yu talemaot oli kamtru, taem i tekembak ol samting we oli stap yusum long haos blong Jehova we oli stap long Babilon, wetem olgeta man we oli bin go stap longwe, oli kambak long ples ya!
7 Be plis, yu harem mesej ya we mi stap talem long sora blong yu mo long sora blong olgeta man.
8 Bifo olgeta, ol profet we oli stap fastaem long mi mo oli stap fastaem long yu, oltaem oli stap talemaot profet tok long saed blong plante kantri mo ol strong kingdom, oli tokbaot wo, trabol mo strong sik.
9 Sipos wan profet i stap talemaot ol profet tok long saed blong pis mo tok blong profet ya i kamtru, ale ol man bambae oli save se i tru we Jehova nao i sanem profet ya.”
10 Afta long tok ya, profet ya Hanania, i tekemaot yok ya long nek blong profet Jeremaea mo i brekem.+
11 Nao long fes blong olgeta man, Hanania i talem se: “Hemia samting we Jehova i talem, i se: ‘Long sem fasin ya nao, bambae mi brekemaot yok blong King Nebukadnesa blong Babilon long nek blong olgeta nesen, bifo we tu yia i pas.’”+ Mo profet ya Jeremaea i aot i go.
12 Afta we profet ya Hanania i brekemaot yok long nek blong profet ya Jeremaea, Jeremaea i kasem mesej ya long Jehova se:
13 “Yu go mo yu talem long Hanania se: ‘Hemia samting we Jehova i talem, i se: “Yu yu bin brekem ol yok long wud,+ be jenis blong olgeta, bambae yu mekem ol yok long aean.”
14 From hemia samting we Jehova komanda blong ol ami, we i God blong Isrel i talem, i se: “Bambae mi putum wan aean yok long nek blong olgeta nesen ya, blong oli wok blong King Nebukadnesa blong Babilon, mo oli mas wok blong hem.+ Mo ol wael animol blong open ples tu bambae mi givim olgeta i go long hem.”’”+
15 Biaen profet ya Jeremaea i talem long profet ya Hanania+ se: “!O Hanania, plis yu lesin! Jehova i no bin sanem yu, be yu yu mekem ol man ya oli trastem wan samting we i giaman.+
16 Taswe hemia samting we Jehova i talem, i se: ‘!Yu luk! Bambae mi tekemaot yu long wol ya. Long yia ya bambae yu yu ded, from we yu pulum ol man blong oli rebel agensem Jehova.’”+
17 Taswe profet ya Hanania i ded long yia ya, long namba 7 manis.
