Jeremaea 4:1-31
4 Jehova i talem se: “Isrel, sipos yu kambak,Yes, sipos yu kambak long miMo sipos yu tekemaot ol aedol blong yu we oli nogud we oli nogud long fes blong mi,Ale bambae yu no moa stap ronwe i go stap long ol defdefren ples.+
2 Mo sipos yu mekem strong promes se:‘!Long nem blong Jehova we i laef i stap!’ mo yu mekem wetem trutok, jastis mo stret fasin,Ale ol nesen bambae oli kasem blesing tru long hem,Mo bambae oli tok flas from hem.”+
3 From hemia samting we Jehova i talem long ol man Juda mo Jerusalem se:“Yufala i mas plao long ples we i gat gudfala graon,Mo yufala i no mas gohed blong saksakem sid long medel blong ol ropnil.+
4 Yufala ol man Juda, mo yufala we i stap long Jerusalem,Yufala i mas mekem sakomsaes mo kam long Jehova,Mo yufala i mekem sakomsaes long hat blong yufala,+Olsem nao kros blong mi bambae i no save laet bigwan olsem wan faeaNao i stap laet we i no gat man i save kilim i ded,From ol rabis fasin blong yufala.”+
5 Yufala i talemaot samting ya long Juda, mo yufala i talemaot samting ya long Jerusalem.
Yufala i go long olgeta ples long kantri ya, yufala i singaot mo yufala i blo long wan hon.+
Yufala i singaot bigwan mo talem se: “Yufala i kam wanples,Mo i gud yumi ronwe i go insaed long ol taon we i gat ol bigfala stonwol.+
6 Yufala i leftemap wan saen* i go long Saeon.
Lukaotem ples blong haed, mo yufala i no mas stanap nomo i stap,”From we naoia bambae mi karem bigfala trabol long not i kam,+ yes wan bigfala disasta.
7 Hem i kamaot finis olsem wan laeon we i kamaot long bus we hem i stap haed long hem,+Man blong distroem ol nesen, i stap go finis.+
Hem i aot finis long ples blong hem, blong go mekem kantri blong yu i kam olsem wan samting we man i fraet long hem.
Bambae oli brebrekem ol taon blong yu, mo bambae i no moa gat man long hem.+
8 Taswe, i gud yufala i werem ol klos we oli wokem long bag,+Yufala i harem nogud* mo yufala i krae bigwan,From we kros blong Jehova we i olsem faea, i no gowe nating long yumi.
9 Jehova i talem se: “Long dei ya, tingting* blong king bambae i no moa strong,+Mo tingting* blong ol prins tu bambae i no moa strong,Ol pris bambae oli fraet tumas, mo ol profet bambae oli sapraes.”+
10 Nao mi talem se: “!O no, Hae Masta Jehova! Tru, yu yu trikim gud ol man ya+ mo Jerusalem, yu se: ‘Bambae yufala i gat pis,’+ be naoia naef blong faet i stap long trot blong mifala.”*
11 Long taem ya bambae oli talem long ol man ya mo long Jerusalem se:“Wan hot win i aot long draeples, long ol hil ya we i no gat tri long olgetaBambae i blu i kamdaon long ol dota blong ol man blong mi,*Hem i no kam blong tekemaot doti blong wit no blong klinim ples.
12 Strong win ya i aot long ol ples ya i kam folem oda blong mi.
Naoia bambae mi talemaot ol jajmen blong mi agensem olgeta.
13 !Yufala i luk! Bambae hem i kam olsem ol klaod blong ren,Mo ol jariot blong hem oli olsem strong win.+
Ol hos blong hem oli spid moa bitim ol igel.+
!Sore tumas long yumi, from we yumi kam nogud finis!
14 O Jerusalem, yu wasemaot ol rabis fasin long hat blong yu, blong yu save sef.+
?Bambae yu holemtaet ol rabis tingting gogo kasem wetaem?
15 From wan voes i stap talemaot ol nius we i kamaot long Dan,+Mo i stap long ol bigfala hil long Efrem i stap talemaot trabol.
16 Yu talemaot, yes yu talemaot long ol nesen,Yu talemaot samting ya agensem Jerusalem.”“Ol soldia we oli stap lukluk,* oli aot long wan kantri longwe oli stap kam,Mo bambae oli singsingaot strong agensem ol taon blong Juda.
17 Oli kam agensem woman ya long evri saed olsem ol gad long open ples,+From we hem i rebel agensem mi.”+ Hemia nao tok blong Jehova.
18 “Ol fasin blong yu nomo mo ol aksen blong yu, bambae oli kasem yu bakegen.+
!Trabol we bambae i kasem yu, i nogud we i nogud,From we bambae i kasem hat blong yu stret!”
19 !O, mi mi safa tumas,* mi safa tumas!Mi harem hat* blong mi i soa tumas.
Mo insaed long mi, hat blong mi i pam we i pam.
Mi no save stap kwaet,From we mi* harem saon blong hon finis,Hemia saen we i soemaot se i gat wo.*+
20 Mi kasem nius blong wan trabol afta narawan,Oli distroem ful kantri ya finis.
Mi sek we oli distroem ol prapa tent blong mi finis,Oli spolem ol kaliko blong tent blong mi kwiktaem nomo.+
21 ?Bambae mi stap luk saen ya* gogo kasem wetaem??Mo mi gohed blong harem saon blong hon ya gogo kasem wetaem?+
22 “Hemia from we ol man blong mi oli no gat hed nating,+Oli no tingbaot mi nating.
Oli ol stupid pikinini we oli no kasemsave samting.
Oli waes gud blong mekem ol samting we i nogud,Be oli no save olsem wanem blong mekem samting we i gud.”
23 !Mi luk kantri ya, be mi sek blong luk we i emti finis mo i stap nating nomo!+Mi lukluk i go long heven, be mi no moa luk wan laet blong hem.+
24 !Mi luk ol bigfala hil, be mi sek blong luk we oli stap muvmuv,Mo ol hil oli stap seksek!+
25 !Mi luk, mo mi sek blong luk se i no moa gat man,Mo olgeta pijin long heven oli flae i go finis!+
26 Mi luk, mo mi sek blong luk se ples blong ol frut tri, naoia i kam wan draeples finis,Mo ol taon blong hem, ol man oli brebrekemdaon finis.+
Hemia from Jehova,From kros blong hem we i olsem faea.
27 From hemia samting we Jehova i talem i se: “Ful kantri ya bambae i emti, i stap nating nomo,+Be bambae mi no mekem se trabol i finisim gud evri samting.
28 From risen ya, bambae kantri ya i stap harem nogud,+Mo antap long heven bambae i kam tudak.+
Hemia from we mi mi talem finis mo mi mekem desisen finis,Mo bambae mi no jenisim tingting blong mi,* mo bambae mi no tanem baksaed long desisen ya.+
29 Evri man long taon ya oli ronwe,+Taem oli harem saon blong ol man we oli stap ron long hos, mo ol man blong sut long bonara.
Oli ronwe i go long ol bus,Mo oli klaem long ol bigbigfala ston.+
Oli lego evri taon blong olgeta,Mo i no gat man i stap long olgeta.”
30 Naoia we trabol i spolem gud yu finis, ?bambae yu mekem wanem?Bifo yu stap werem klos we oli laet red,Mo yu stap flasem yu long ol samting we oli wokem long gol,Mo yu stap pentem ae blong yu long blak pent blong mekem i bigwan.
Be yu stap flasem yu blong nating nomo,+From we olgeta we oli stap krangke long yu, oli lego yu finis,Naoia oli stap lukaotem rod blong tekemaot laef* blong yu.+
31 Mi mi harem wan noes we i olsem noes blong wan woman we i sik,Hem i harem nogud tumas olsem wan woman we i stap bonem fas bebi blong hem,Hemia voes blong dota blong Saeon we i stap traehad blong pulum win.
Taem hem i stap pusumaot han blong hem, hem i talem se:+“!Sore tumas long mi, from we mi mi* no moa gat paoa from ol man ya we oli stap kilim man!”
Ol futnot
^ NT: “saen pos.”
^ NT: “Yufala i kilkilim jes blong yufala.”
^ PT: “hat.”
^ PT: “hat.”
^ NT: “be naef blong faet i kasem sol blong mifala finis.”
^ Tok ya “Dota blong ol man blong mi,” hem i wan tok we oli yusum blong soemaot se man i harem nogud tumas mo i sore.
^ PT: “Ol wajman,” hemia olgeta we oli stap lukluk wan taon blong talem wetaem i stret blong go atakem.
^ PT: “O gat blong mi.”
^ PT: “ol wol blong hat.”
^ NT: “sol blong mi i.”
^ MNT: “noes blong ol man we oli stap faet.”
^ NT: “saen pos.”
^ NT: “bambae mi no rigret.”
^ NT: “lukaotem sol.”
^ NT: “sol blong mi i.”
