Job 2:1-13
2 Biaen, dei i kam blong ol pikinini blong tru God*+ oli kam stanap long fes blong Jehova.+ Mo Setan i kam insaed tu long medel blong olgeta, blong stanap long fes blong Jehova.+
2 Nao Jehova i askem long Setan se: “?Yu kam wea?” Setan i ansa long Jehova se: “Mi stap go olbaot long wol, mo mi stap wokbaot olbaot long hem.”+
3 Nao Jehova i talem long Setan se: “?Yu yu makem fasin blong* Job, man blong wok blong mi? I no gat wan man long wol we i olsem hem. Hem i wan gudfala man we fasin blong hem i stret gud,*+ i fraet* long God mo i stap longwe long samting we i nogud. Hem i gohed yet blong holemtaet ol gudfala fasin blong hem,+ nating se yu traem pulum mi blong agensem hem+ mo spolem* hem blong nating nomo.”
4 Be Setan i ansa long Jehova se: “Skin i pembak skin. Bambae man i lego evri samting we hem i gat blong sevem laef* blong hem.
5 Be yu traem mekem i defren, yu pusum han blong yu mo spolem bodi* blong hem, i sua se bambae hem i tok nogud long yu stret long fes blong yu.”+
6 Nao Jehova i talem long Setan se: “!Yu luk! !Naoia hem i stap long han blong yu!* !Be yu no mas tekemaot laef* blong hem!”
7 Nao Setan i aot long fes blong Jehova i go, mo i mekem ol boela we oli soa bitim mak,*+ oli kasem Job, stat long leg blong hem daon i go kasem hed blong hem.
8 Nao Job i tekem wan pis graonpot we i brok finis blong skrasem hem long hem, mo i stap sidaon long ples blong asis.+
9 Biaen waef blong hem i talem long hem se: “?Yu yu gohed yet blong holemstrong long God? !Yu tok nogud long God mo yu ded!”
10 Be hem i talem long waef blong hem se: “Yu yu stap toktok olsem wan woman we i no gat hed. ?Bambae yumi akseptem nomo ol gudfala samting we i kam long tru God, be yumi no akseptem ol rabis samting tu?”+ Long olgeta samting ya, Job i no mekem sin wetem maot blong hem.+
11 Tri fren blong Job* oli harem nius blong ol trabol we i kasem hem. Ale oli aot long ol ples blong olgeta oli kam—Elifas+ we i man Teman, Bildad+ we i man Suaha,+ mo Jofara+ we i man Nahama. Nao oli agri blong kam wanples, blong oli go mo harem nogud wetem Job mo mekem hem i harem gud.
12 Taem oli stap longwe yet, oli luk Job be oli no moa luksave hem. Nao oli stat blong krae bigwan mo oli terem klos blong olgeta, mo oli sakem das i go antap mo long hed blong olgeta tu.+
13 Biaen oli sidaon long graon wetem hem blong seven dei mo seven naet. I no gat wan long olgeta i talem wan tok long Job, from we oli luk we hem i stap harem nogud bitim mak.+
Ol futnot
^ Hemia wan tok long lanwis Hibru we i tokbaot ol enjel se oli pikinini blong God.
^ PT: “yu putum hat blong yu long.”
^ NT: “man we i no gat poen long hem mo i wan gudfala man.”
^ NT: “tinghevi”
^ PT: “solemdaon.”
^ NT: “sol.”
^ PT: “bun mo mit.”
^ NT: “naoia yu yu bos long hem.”
^ NT: “sol.”
^ NT: “mekem ol bigbigfala soa.”
^ NT: “Tri man we oli save Job.”
