Job 22:1-30
22 Elifas+ we i man Teman i ansa se:
2 “?Man i naf blong givhan long God?
?Man we i gat hed i save mekem wan gudfala samting blong God?+
3 ?God Ya We i Gat Olgeta Paoa, i kea* se yu wan stret man,No hem i kasem wan samting from we yu stap mekem stret fasin?+
4 ?Yu ting se bambae hem i panisim yuMo i tekem yu i go long kot from we yu stap respektem hem?
5 ?Yu no ting se yu kasem trabol ya from we rabis fasin blong yu i bigwan tumasMo ol rong blong yu oli no gat en blong olgeta?+
6 From we yu go tekemaot wan samting olsem wan garanti long ol brata blong yu, blong nating nomo,Mo yu pulumaot ol kaliko blong ol man, yu lego olgeta oli stap neked nomo.*+
7 Yu no givim wota long olgeta we oli taed tumas,Mo yu no givim kakae long olgeta we oli hanggri.+
8 Graon ya i blong man ya we i gat paoa,+Mo man we oli laekem hem, hem nomo i stap long hem.
9 Be yu sanemaot ol wido oli go we han blong olgeta i emti nomo,Mo yu stap brebrekem han blong ol pikinini we oli no gat papa.*
10 Hemia nao from wanem ol trap* oli raonemgud yu,+Mo wantaem nomo ol samting blong fraet oli mekem yu fraet.
11 Hemia nao from wanem ples i tudak tumas nao yu no save lukluk,Mo bigfala wota i ron i kam kavremap yu.
12 ?I no God we i stap antap olgeta long heven?
Mo traem luk ol sta ya, oli stap antap we antap.
13 Be yu talem se: ‘?God i rili save wanem?
?Hem i save jajem man tru long smok we i dak we i dak?
14 Ol klaod oli blokem hem mekem se hem i no lukTaem hem i stap wokbaot i goraon long heven.’*
15 ?Bambae yu folem rod ya blong bifoWe ol rabis man oli bin wokbaot long hem?
16 Hemia ol man ya we ded i karemaot* olgeta bifo stret taem blong olgeta,Mo we bigfala wota* i bin wasemaot fandesen blong olgeta.+
17 Oli stap talem long tru God se: ‘!Yu lego mifala!’
Mo ‘?God Ya We i Gat Olgeta Paoa, i save mekem wanem long yumi?’
18 Be hem nao Man ya we i fulumap ol haos blong olgeta wetem ol gudfala samting.
(Rabis tingting olsem i longwe olgeta long tingting blong mi.)
19 Ol stret man bambae oli luk samting ya mo oli glad,Mo ol man we oli no gat fol bambae oli jikim olgeta mo oli se:
20 ‘Oli spolem ol enemi blong mifala finis,Mo wan faea bambae i kakae evri samting blong olgeta we i stap yet.’
21 Yu traem save gud Hem, mo bambae yu stap long pis,Nao ol gudfala samting bambae oli kamtru long yu.
22 Yu akseptem loa we i kamaot long maot blong hem,Mo yu kipim ol tok we hem i stap talem long hat blong yu.+
23 Sipos yu gobak long God Ya We i Gat Olgeta Paoa, bambae yu kambak olsem fastaem,+Sipos yu karemaot ol fasin we i no stret long tent blong yu,
24 Sipos yu save sakem gol* blong yu insaed long dasMo gol blong Ofiri+ insaed long medel blong ol bigfala ston long krik,*
25 Ale God Ya We i Gat Olgeta Paoa bambae i kam gol* blong yu,Mo bambae hem i beswan silva blong yu.
26 Biaen God Ya We i Gat Olgeta Paoa bambae i mekem yu yu glad,Mo bambae yu leftemap fes blong yu i go long God.
27 Bambae yu plis long hem, mo hem bambae i harem yu.Mo bambae yu mekem samting we yu promes blong mekem.
28 Eni samting we yu plan blong mekem, bambae i go gud,Mo laet bambae i saen long rod blong yu.
29 From we bambae yu sem taem yu tok flas,Be hem bambae i sevem man we i gat tingting daon.*
30 Bambae hem i tekemaot ol man we oli no gat fol long trabol.Taswe sipos han blong yu i klin, i sua se bambae hem i tekemaot yu long trabol.”
Ol futnot
^ NT: “glad.”
^ PT: “pulumaot kaliko blong ol man we oli neked.”
^ NT: “pikinini we oli no gat papa mo mama.”
^ PT: “trap blong pijin.”
^ NT: “wokbaot long ring blong heven.”
^ NT: “oli sotem laef blong olgeta.”
^ PT: “reva.”
^ NT: “ol smosmol pis gol.”
^ NT: “insaed long ol wadi.”
^ NT: “ol smosmol pis gol.”
^ NT: “man we ae blong hem i luklukdaon.”
